ಬಾಗಿನ ಕೊಟ್ಟು ಮನೆಗೆ ಬರುವಾಗ ಅಪಘಾತ: ಕಾಫಿನಾಡಲ್ಲಿ ತಂದೆ - ಮಗಳು ಸಾವು

ಗೌರಿ - ಗಣೇಶ ಹಬ್ಬದ ಬಾಗಿನ ಕೊಟ್ಟು, ವಾಪಸ್​ ಆಗುತ್ತಿದ್ದ ವೇಳೆ ಅಪಘಾತ ಸಂಭವಿಸಿ ಅಪ್ಪ, ಮಗಳು ಮೃತಪಟ್ಟಿದ್ದಾರೆ.

ಚಿಕ್ಕಮಗಳೂರು: ಮಗಳ ಮನೆಗೆ ಗೌರಿ - ಗಣೇಶ ಹಬ್ಬದ ಬಾಗಿನ ಕೊಟ್ಟು, ವಾಪಸ್​​ ಆಗುತ್ತಿದ್ದ ವೇಳೆ ಟಿವಿಎಸ್ ಹಾಗೂ ಗ್ಯಾಸ್ ಲಾರಿ ನಡುವೆ ಅಪಘಾತ ಸಂಭವಿಸಿ ಅಪ್ಪ, ಮಗಳು ಸಾವನ್ನಪ್ಪಿದ್ದಾರೆ. ಹಬ್ಬದ ದಿನವೇ ಚಿಕ್ಕಮಗಳೂರು ತಾಲೂಕಿನ ಉದ್ದೇಬೋರನಹಳ್ಳಿ ಬಳಿ‌ ಮನಕಲಕುವ ಘಟನೆ ಸಂಭವಿಸಿದೆ.

ಗ್ಯಾಸ್​ ಲಾರಿ ಪಲ್ಟಿ

ಜಯಣ್ಣ (58) ಹಾಗೂ ರಕ್ಷಿತಾ (19) ಮೃತ ದುರ್ದೈವಿಗಳಾಗಿದ್ದಾರೆ. ಗೌರಿ - ಗಣೇಶ ಹಬ್ಬದ ಹಿನ್ನೆಲೆಯಲ್ಲಿ ಜಯಣ್ಣ ತಮ್ಮ ದೊಡ್ಡ ಮಗಳ ಮನೆಗೆ ಬಾಗಿನ ನೀಡಲೆಂದು ಚಿಕ್ಕ ಮಗಳು ರಕ್ಷಿತಾ ಜೊತೆ ಟಿವಿಎಸ್​ ಬೈಕ್​ನಲ್ಲಿ ತೆರಳಿದ್ದರು. ಪಿಳ್ಳೇನಹಳ್ಳಿಯ ಮಗಳ ಮನೆಯಿಂದ ತಮ್ಮ ಊರಾದ ಮುಗುಳವಳ್ಳಿಗೆ ವಾಪಸ್​​ ಆಗುವಾಗ ಮಾರ್ಗ ಮಧ್ಯೆ ಉದ್ದೇಬೋರನಹಳ್ಳಿ ಬಳಿ‌ ಅಪಘಾತವಾಗಿದೆ. ಇಬ್ಬರೂ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ.

ಘಟನೆಯಲ್ಲಿ ಗ್ಯಾಸ್​ ಲಾರಿಯೂ ಪಲ್ಟಿಯಾಗಿದ್ದು, ಅದೃಷ್ಟವಶಾತ್​ ಹೆಚ್ಚಿನ ಅನಾಹುತ ಸಂಭವಿಸಿಲ್ಲ. ಸಕರಾಯಪಟ್ಟಣ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ಸಂಭವಿಸಿದ್ದು, ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ, ಪರಿಶೀಲನೆ ನಡೆಸಿದ್ದಾರೆ.

ಇದನ್ನೂ ಓದಿ:COVID ಆಸ್ಪತ್ರೆಯಲ್ಲಿ ಭೀಕರ ಅಗ್ನಿ ಅವಘಡ: 10 ಮಂದಿ ದುರ್ಮರಣ