ಚಿಕ್ಕಬಳ್ಳಾಪುರದಲ್ಲಿ ಶಾಂತಿಯುತ ಮತದಾನ... 103ರ ಹಿರಿಜೀವದಿಂದ ಹಕ್ಕು ಚಲಾವಣೆ

ಚಿಕ್ಕಬಳ್ಳಾಪುರದಲ್ಲಿ ಲೋಕಸಭಾ ಕ್ಷೇತ್ರದಲ್ಲಿ ಶಾಂತಿಯುತವಾಗಿ ಮತದಾನ ಮುಕ್ತಾಯಗೊಂಡಿತು. ಒಟ್ಟು ಶೇ. 76.75 ರಷ್ಟು ಮತದಾನ ನಡೆದಿದ್ದು, 2284 ಮತಗಟ್ಟೆಗಳಲ್ಲಿ ಮತದಾರರು ವೋಟ್​ ಹಾಕಿದರು.

ಚಿಕ್ಕಬಳ್ಳಾಪುರ:ಚಿಕ್ಕಬಳ್ಳಾಪುರ ಲೋಕಸಭಾ ಚುನಾವಣೆಯ 8 ವಿಧಾನಸಭಾ ಕ್ಷೇತ್ರಗಳಲ್ಲಿ ಶಾಂತಿಯುತ ಮತದಾನವಾಗಿದೆ. ಒಟ್ಟು 2284 ಮತಗಟ್ಟೆಗಳಲ್ಲಿ ಮತದಾರರು ತಮ್ಮ ಹಕ್ಕನ್ನು ಚಲಾಯಿಸಿದ್ದು, ಸದ್ಯ ಮತ ಎಣಿಕೆಯ ದಿನಕ್ಕೆ ಲೆಕ್ಕ ಶುರುಮಾಡಿದ್ದಾರೆ.

ಬಿರು ಬಿಸಿಲಿನ ನಡುವೆಯೂ ಮತದಾನ ನಡೆಸಿದ ಹಿರಿಯ ನಾಗರಿಕರು...

ನ್ನೆ ಬೆಳಿಗ್ಗೆ 7 ಗಂಟೆಗೆ ಆರಂಭವಾದ ಮತದಾನ ಪ್ರಕ್ರಿಯೆ ಸಂಜೆ 6 ಗಂಟೆಗೆ ಮುಕ್ತಾಯಗೊಂಡಿತು. ಮತದಾನ ಆರಂಭಗೊಂಡಾಗಿನಿಂದಲೂ ಅಂಗವಿಕಲರು, ಹಿರಿಯ ನಾಗರಿಕರು ಸೇರಿದಂತೆ ಮೊದಲ ಬಾರಿ ಮತಹಾಕಲು ಬಂದ ಯುವಜನತೆ ಉತ್ಸಾಹದಿಂದ ಬಿಸಿಲನ್ನೂ ಲೆಕ್ಕಿಸದೆ ಮತವನ್ನು ಚಲಾವಣೆ ಮಾಡಿದರು. ಇನ್ನು ಹಿರಿಯ ನಾಗರಿಕರಿಗೆ ವೀಲ್ ಚೇರ್ ಹಾಗೂ ಆಟೋ ವ್ಯವಸ್ಥೆ ಮಾಡಲಾಗಿತ್ತು. ಈ ನಡುವೆ ಚಿಕ್ಕಬಳ್ಳಾಪುರ ಹೃದಯಭಾಗದ ಮತಗಟ್ಟೆ 182ರ ನಗರಸಭೆ ಆವರಣದಲ್ಲಿ ಬಿಜೆಪಿ ಕಾರ್ಯಕರ್ತೆಯೊಬ್ಬರು ಕಮಲದ ರವಿಕೆ ತೊಟ್ಟು ಮತ ಚಲಾಯಿಸಿದರು.

ಅರ್ಧಗಂಟೆಗೂ ಅಧಿಕ ಕಾಲ ಕ್ಯೂನಲ್ಲಿ ನಿಂತು ಮೊಯ್ಲಿ ಮತದಾನ...

ದೋಸ್ತಿ ಅಭ್ಯರ್ಥಿ ಹಾಗೂ ಎರಡು ಬಾರಿ ಸಂಸದರಾಗಿದ್ದ ಕೈ ಅಭ್ಯರ್ಥಿ ವೀರಪ್ಪ ಮೊಯ್ಲಿ, ಬೆಳಿಗ್ಗೆ 8:30ರ ಸುಮಾರಿಗೆ ನಗರಸಭೆಯ ಮತಗಟ್ಟೆ ಬಳಿ ಧಾವಿಸಿ, ಸುಮಾರು ಅರ್ಧ ಗಂಟೆಗೂ ಅಧಿಕ ಸಮಯ ಕ್ಯೂನಲ್ಲಿ ನಿಂತು ಮತ ಚಲಾಯಿಸಿದರು. ಇದೇ ವೇಳೆ ಪತ್ನಿ ಮಾಲತಿ ಮೊಯ್ಲಿ, ಮಗ ಹರ್ಷ ಮೊಯ್ಲಿ, ಪುತ್ರಿ ಹಂಸ ಮೊಯ್ಲಿ ಕೂಡಾ ಮತ ಚಲಾಯಿಸಿದರು.

103 ನೇ ವಯಸ್ಸಿನಲ್ಲಿಯೂ ಉತ್ಸಾಹದಿಂದ ಮತದಾನ ಮಾಡಿದ ಅಜ್ಜಿ...

ಇನ್ನು ಶಿಡ್ಲಘಟ್ಟ ವಿಧಾನಸಭಾ ಕ್ಷೇತ್ರಕ್ಕೆ ಸೇರಿದ ಮತಗಟ್ಟೆ 161ರಲ್ಲಿ, 103ನೇ ವಯಸ್ಸಿನ ಮುತ್ತಮ್ಮ ಎಂಬ ಅಜ್ಜಿ ಮತ ಚಲಾಯಿಸಿ ಎಲ್ಲರಿಗೂ ಮಾದರಿಯಾದರು.

ಒಟ್ಟಾರೆ ನಿನ್ನೆ ನಡೆದ ಚಿಕ್ಕಬಳ್ಳಾಪುರ ಲೋಕಸಭಾ ಚುನಾವಣೆಯಲ್ಲಿ ಶಾಂತಿಯುತ ಮತದಾನ ನಡೆದಿದ್ದು ಯಾವುದೇ ಗೊಂದಲವಿಲ್ಲದೆ ಮುಕ್ತಾಯಗೊಂಡಿದೆ.