ಮಾದಪ್ಪನ ಬೆಟ್ಟದಲ್ಲಿ ಯುವಕ ಜಲಸಮಾಧಿ: ಸ್ನೇಹಿತರ ಎದುರೇ ಕೊಚ್ಚಿಹೋದ ಗೆಳೆಯ

ಮಲೆಮಹದೇಶ್ವರ ಬೆಟ್ಟದಲ್ಲಿನ ಅಂತರಗಂಗೆ ಹಿನ್ನೀರಿನಲ್ಲಿ ಈಜಲು ಹೋದ ಯುವಕ ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ್ದಾನೆ.

ಚಾಮರಾಜನಗರ: ಸ್ನೇಹಿತರ ಎದುರೇ ಗೆಳೆಯನೋರ್ವ ನೀರಿನಲ್ಲಿ ಮುಳುಗಿ ಸಾವನ್ನಪ್ಪಿದ ದುರ್ಘಟನೆ ಮಲೆಮಹದೇಶ್ವರ ಬೆಟ್ಟದಲ್ಲಿನ ಅಂತರಗಂಗೆ ಹಿನ್ನೀರಿನಲ್ಲಿ ನಡೆದಿದೆ.

ಬೆಂಗಳೂರಿನ ಜಯನಗರ ನಿವಾಸಿ ಪ್ರಭು ಮೃತಪಟ್ಟ ದುರ್ದೈವಿ.

ಈತ 9 ಮಂದಿ ಸ್ನೇಹಿತರೊಂದಿಗೆ ಪ್ರವಾಸಕ್ಕೆಂದು ಬಂದ ವೇಳೆ ಈ ಅವಘಡ ಸಂಭವಿಸಿದೆ.

ಪ್ರವಾಸಕ್ಕೆ ತೆರಳಿದ್ದ ಸ್ನೇಹಿತರಲ್ಲಿ ಈಜು ಬರುತ್ತಿದ್ದದ್ದು ಮೃತ ಪ್ರಭುವಿಗೆ ಮಾತ್ರ ಎಂದು ತಿಳಿದುಬಂದಿದೆ. ಉಳಿದವರು ದಡದಲ್ಲಿ ನೀರಿನಾಟ ಆಡುತ್ತಿರಬೇಕಾದರೇ ಈತ ಈಜಾಡುವುದಕ್ಕೆ ಶುರು ಮಾಡಿದ್ದಾನೆ ಎನ್ನಲಾಗಿದೆ.

ಮುಳುಗುತ್ತಿದ್ದ ಸ್ನೇಹಿತನನ್ನು 8 ಮಂದಿ ಈಜು ಬಾರದ ಗೆಳೆಯರು ಮೂಕಪ್ರೇಕ್ಷಕರಾಗಿ ಕೂಗಾಡಿ ಕೊನೆಗೆ ಪೊಲೀಸ್ ಠಾಣೆಗೆ ಮಾಹಿತಿ ನೀಡಿದ್ದಾರೆ‌.

ಮಲೆಮಹದೇಶ್ವರ ಬೆಟ್ಟ ಪೊಲೀಸರು ಶವ ಹುಡುಕಾಟದ ಕಾರ್ಯಾಚರಣೆಯಲ್ಲಿ ತೊಡಗಿದ್ದಾರೆ.