ಅಧಿಕ ಬಡ್ಡಿ ಆಸೆ ತೋರಿಸಿ ಜನರಿಗೆ ಟೋಪಿ ಹಾಕಿದ ಟಾಪ್​​​ 12 ವಂಚಕ ಕಂಪನಿಗಳು!

ಇತ್ತೀಚೆಗೆ ಜನರಿಗೆ ಟೋಪಿ ಹಾಕುವ ಕಂಪನಿಗಳು ಸಾಕಷ್ಟು ಹುಟ್ಟಿಕೊಂಡಿವೆ. ಇಂತಹ ಮೋಸದ ಕಂಪನಿ ಬಗ್ಗೆ ಅರಿವು ಇದ್ದರೂ ಸಹ ಸಾರ್ವಜನಿಕರು ಹಣ ಹೂಡಿ ಮತ್ತೆ ಮತ್ತೆ ಮೋಸದ ಬಲೆಗೆ ಬೀಳುತ್ತಿದ್ದಾರೆ. ಒಟ್ಟಿನಲ್ಲಿ ಇಲ್ಲಿಯವರೆಗೆ ಬಡ್ಡಿ ಆಸೆ ತೋರಿಸಿ ಜನರಿಗೆ ಟೋಪಿ ಹಾಕಿದ ಟಾಪ್​ 12 ವಂಚಕ ಕಂಪನಿಗಳ ಮಾಹಿತಿ ಇಲ್ಲಿ ಕೊಡಲಾಗಿದೆ.

ಬೆಂಗಳೂರು:ಬಹುಕೋಟಿ ವಂಚನೆ ಕಂಪನಿಗಳ ವಿರುದ್ಧ ಇತ್ತ ಸಮರ ಸಾರಿದ ಬೆಂಗಳೂರು ಪೊಲೀಸರು ತನಿಖೆ ನಡೆಸುತ್ತಿದ್ದು, ಅತ್ತ 12 ವಂಚಕ ಕಂಪನಿಗಳ ಇತಿಹಾಸವನ್ನು ಸಿಸಿಬಿ ಪೊಲೀಸರು ಜಾಲಾಡಿದ್ದಾರೆ. ಆ ಎಲ್ಲ ಟೋಪಿವಾಲಾ ಕಂಪನಿಗಳ ಬಗ್ಗೆ ಮಾಹಿತಿ ಇಲ್ಲಿದೆ.

1) ಐ- ಮಾನಿಟರಿ ಅಡ್ವೈಸರಿ (ಐಎಂಎ) - ಎಸ್ಐಟಿ

ಮೊಹಮ್ಮದ್ ಮನ್ಸೂರ್ ಖಾನ್ ನೇತೃತ್ವದಲ್ಲಿ ಶಿವಾಜಿನಗರದಲ್ಲಿ 2006ರಲ್ಲಿ ಆರಂಭವಾಗಿದ್ದ ಐ-ಮಾನಿಟರಿ ಅಡ್ವೈಸರಿ ಕಂಪನಿ (ಐಎಂಎ) ಸಾರ್ವಜನಿಕರಿಗೆ ತಿಂಗಳಿಗೆ ಶೇ. 8ರಿಂದ 10ರಷ್ಟು ಲಾಭಾಂಶ ನೀಡುವುದಾಗಿ ಆಮಿಷವೊಡ್ಡಿ ಹಣ ಸಂಗ್ರಹಿಸಿತ್ತು. 2019ರ ಮಾರ್ಚ್​ವರೆಗೂ ಹೂಡಿಕೆದಾರರಿಗೆ ಲಾಭ ನೀಡಿ ಬಳಿಕ ಲಾಭವೂ ನೀಡದೇ, ಅಸಲೂ ನೀಡದೆ ಮಾಲೀಕ ಎಸ್ಕೇಪ್ ಆಗಿದ್ದಾನೆ.ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಈವರೆಗೂ 21 ಸಾವಿರ ದೂರುಗಳು ದಾಖಲಾಗಿವೆ. 1230 ಕೋಟಿ ರೂ. ಹೂಡಿಕೆಯಾಗಿರುವುದು ಖಚಿತವಾದ ನಂತರ ತನಿಖೆಯ ಹೊಣೆ ಎಸ್​​ಐಟಿ ಹೆಗಲೇರಿದೆ. ಸದ್ಯ ಕಂಪನಿಯ ವ್ಯವಸ್ಥಾಪಕ ನಿರ್ದೇಶಕ ಮೊಹಮ್ಮದ್ ಮನ್ಸೂರ್ ಖಾನ್​​ಗಾಗಿ ಶೋಧ ನೆಡೆದಿದ್ದು, ಏಳು ಜನ ನಿರ್ದೇಶಕರು ಎಸ್​ಐಟಿ ವಶದಲ್ಲಿದ್ದಾರೆ.

2) ಆ್ಯಂಬಿಡೆಂಟ್ ಮಾರ್ಕೆಟಿಂಗ್ ಪ್ರೈವೇಟ್ ಲಿಮಿಟೆಡ್ - ಸಿಸಿಬಿ ತನಿಖೆ

ಸೈಯ್ಯದ್ ಅಹಮ್ಮದ್ ಫರೀದ್​ ಹಾಗೂ ಆತನ ಮಗ ಸೈಯದ್ ಅಫಾಕ್ ಅಹಮ್ಮದ್ 2016ರಲ್ಲಿ ಡಿ.ಜೆ. ಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಆರಂಭಿಸಿದ ಈ ಕಂಪನಿ ಅಸಲಿಗೆ ಶೇ. 15ರಿಂದ 60ರಷ್ಟು ಬಡ್ಡಿ‌ ನೀಡುವುದಾಗಿ ಆಮಿಷವೊಡ್ಡಿತ್ತು. ಬಳಿಕ ಲಾಭವೂ ನೀಡದೆ, ಅಸಲೂ ನೀಡದೆ ವಂಚಿಸಿತ್ತು. ವಂಚನೆಯ ಕುರಿತು 6156 ದೂರುಗಳು ಆ್ಯಂಬಿಡೆಂಟ್ ವಿರುದ್ಧ ದಾಖಲಾಗಿದ್ದು, 121 ಕೋಟಿಗೂ ಹೆಚ್ಚು ವಂಚನೆಯಾಗಿರುವ ವಿಚಾರ ಬಯಲಾಗಿದೆ‌. ಆರೋಪಿಗಳಾದ ಅಹಮ್ಮದ್ ಫರೀದ್ ಹಾಗೂ ಸೈಯದ್ ಅಫಾಕ್ ನಿರೀಕ್ಷಣಾ ಜಾಮೀನು ಪಡೆದಿದ್ದರೆ. ಇರ್ಫಾನ್ ಮಿರ್ಜಾ, ಬಳ್ಳಾರಿ ರಮೇಶ್, ಇನ್ನಿತರ ಆರೋಪಿಗಳು ನ್ಯಾಯಾಲಯದಿಂದ ಜಾಮೀನು ಪಡೆದಿದ್ದಾರೆ‌. ಆರೋಪಿಗಳ 5.9 ಕೋಟಿ ರೂ. ನಗದು ಹಾಗೂ 50 ಕೋಟಿ ಬೆಲೆಯ ಸ್ಥಿರಾಸ್ತಿ ಜಪ್ತಿಯಾಗಿದ್ದು, ಸಿಸಿಬಿ ತನಿಖೆ ಮುಂದುವರೆದಿದೆ.

3) ಅಜ್ಮೀರಾ ಗ್ರೂಪ್ಸ್ - ಸಿಸಿಬಿ

ಶೇ. 10ರಿಂದ 20ವರೆಗೂ ಬಡ್ಡಿ‌‌ ಆಸೆ ತೋರಿಸಿ ವಂಚಿಸಿದ್ದ ಅಜ್ಮಿರಾ ಗ್ರೂಪ್ಸ್ ಕಂಪನಿ ವಿರುದ್ಧ 1100 ದೂರುಗಳು ದಾಖಲಾಗಿದ್ದವು. 200 ಕೋಟಿಗೂ ಅಧಿಕ ಹಣ ವಂಚನೆಯಾಗಿದ್ದು, ಪ್ರಮುಖ‌ ಆರೋಪಿಗಳಾದ ತಬ್ರೇಜ್ ಪಾಷಾ, ಅಬ್ದುಲ್ ಪಾಷಾ, ತಬ್ರೇಜ್ ಉಲ್ಲಾ ಸೈಯದ್ ಮುದಾಸೀರ್ ನ್ಯಾಯಾಲಯದ ಜಾಮೀನಿನ ಮೇಲೆ ಹೊರಗಿದ್ದಾರೆ‌. ಮತ್ತಿಬ್ಬರಾದ ಸೈಯದ್ ಮುದಾಸಿರ್ ಹಾಗೂ ಫೈರೋಜ್ ಖಾನ್ ನಾಪತ್ತೆಯಾಗಿದ್ದಾರೆ. ಇಲ್ಲಿಯವರೆಗೂ 5.31 ಕೋಟಿ ರೂ. ಹಣ ಹಾಗೂ 25 ಕೋಟಿ ರೂ. ಮೌಲ್ಯದ ಚರ ಹಾಗೂ ಸ್ಥಿರಾಸ್ತಿ ಜಪ್ತಿಯಾಗಿದ್ದು, ಸಿಸಿಬಿ ತನಿಖೆ ಮುಂದುವರೆದಿದೆ.

4) ಇಜಾಂಜ್ ಇಂಟರ್ ನ್ಯಾಷನಲ್ ಕಂಪನಿ - ಸಿಸಿಬಿ

ಆರ್​ಬಿಐ ಅನುಮತಿ ಪಡೆಯದೆ ಜನರಿಂದ ಹಣ ಠೇವಣಿಯಾಗಿರಿಸಿಕೊಂಡು ವಂಚಿಸಿದ್ದ ಕಂಪನಿ ಇದು. ಬೆಂಗಳೂರು ನಗರ ತಹಸೀಲ್ದಾರ್ ದೂರು ನೀಡಿದ್ದ ಬಳಿಕ ಪ್ರಕರಣ ಸಂಬಂಧ ಮಿಸ್ಬಾ ಉದ್ದೀನ್ ಅಲಿಯಾಸ್ ಮುಖಾರಾಂ ಹಾಗೂ ಸುಹೇಲ್ ಅಹಮ್ಮದ್ ಷರೀಫ್ ಬಂಧನವಾಗಿತ್ತು. ಬಳಿಕ ನಿರೀಕ್ಷಣಾ ಜಾಮೀನು‌ ಪಡೆದಿದ್ದ ಆರೋಪಿಗಳು ಷರತ್ತು ಮೀರಿದ್ದರು. ಕಳೆದ ತಿಂಗಳ 12ರಂದು ಮಿಸ್ಬಾ ಉದ್ದೀನ್‌ ಬಂಧಿಸಿದ ಸಿಸಿಬಿ ಪೊಲೀಸರು, ಮತ್ತೋರ್ವ ಆರೋಪಿ ಪತ್ತೆಗೆ ಶೋಧ ನಡೆಸಿದ್ದಾರೆ. ಆರೋಪಿಗಳ ಚರ ಹಾಗೂ ಸ್ಥಿರಾಸ್ತಿ ಕಲೆಹಾಕುವ ಕಾರ್ಯ ಪ್ರಗತಿಯಲ್ಲಿದೆ‌.

5) ಮಾರ್ಗೇನೆಲ್ ಕೋ ಆಪರೇಟಿವ್ ಸೊಸೈಟಿ ಲಿ - ಸಿಸಿಬಿ

ಅಧಿಕ ಬಡ್ಡಿ ಆಮಿಷವೊಡ್ಡಿ 9228 ಮಂದಿಯಿಂದ 145 ಕೋಟಿ ವಂಚಿಸಿದ್ದ ಕಂಪನಿಯಾಗಿದೆ. ಆರೋಪಿಗಳಾದ ಇರ್ಫಾನ್ ಪಾಶಾ, ಮುಗ್ಧಮ್ ಫಾತೀಮಾ ಹಾಗೂ ಸಿಬ್ಗಾಟ್ ಉಲ್ಲಾ ಖಾನ್ ನಾಪತ್ತೆಯಾಗಿದ್ದು, ಲಕ್ ಔಟ್ ನೋಟಿಸ್ ಹೊರಡಿಸಲಾಗಿದೆ. ಸದ್ಯ 84 ಲಕ್ಷ ರೂ. ಮೌಲ್ಯದ ಚರ ಹಾಗೂ ಸ್ಥಿರಾಸ್ತಿ ಜಪ್ತಿಗಾಗಿ ಕಾನೂನು ಕಾರ್ಯ ನಡೆಯುತ್ತಿದೆ.

6) ನಾಫಿಯಾ ಅಡ್ವೈವೈಸರಿ ಹಾಗೂ ನಾಫಿಯಾ ಟೂರ್ಸ್ ಕಂಪನಿ

ಇದು ಅಧಿಕ ಬಡ್ಡಿ ಆಸೆ ತೋರಿಸಿ 260 ಮಂದಿಯಿಂದ 8 ಕೋಟಿ ಲೂಟಿ ಹೊಡೆದಿರುವ ಕಂಪನಿ. ಆರೋಪಿಗಳಾದ ಸೈಯದ್ ಖಾಲೀದ್ ಪಾಶಾ, ಮಹಮ್ಮದ್ ಸೊಹೇಬ್ ಹಾಗೂ ಸತಮೈದ್ ತನ್ವೀರ್ ಬಂಧನವಾಗಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದಾರೆ. ಚರ ಹಾಗೂ ಸ್ಥಿರಾಸ್ತಿಗಳ‌ ಮಾಹಿತಿ ಸಂಗ್ರಹಣೆ ಕಾರ್ಯ ಸಾಗಿದೆ.

7) ಎಐಎಂಎಸ್ ವೆಂಚರ್ಸ್ ಕಂಪನಿ - ಸಿಸಿಬಿ

6ರಿಂದ 10ರಷ್ಟು ಬಡ್ಡಿ ಆಸೆ ತೋರಿಸಿ 300 ಮಂದಿಯಿಂದ 10.8 ಕೋಟಿ ರೂ. ವಂಚಿಸಿದ್ದ ಕಂಪನಿ. ಐದು ಮಂದಿ ಆರೋಪಿಗಳಾದ ಆಯೂಬ್ ಅಲಿ ಖಾನ್, ಇಲಿಯಾಸ್, ಮುದಾಸಿರ್ ಪಾಶಾ, ಮಹಮ್ಮದ್ ಮಜೀದುಲ್ಲಾ ಹಾಗೂ ಶಾಹೀದ್ ಮಹಮ್ಮದ್ ಬಂಧಿತರಾಗಿ ಜಾಮೀನು ಪಡೆದಿದ್ದಾರೆ. 2.2 ಕೋಟಿ ಹಣವನ್ನ ಗ್ರಾಹಕರಿಗೆ ಹಿಂದಿರುಗಿಸಲಾಗಿದೆ.

8) ಮೆಶ್ರೀಕ್ ಹೆಲ್ತ್ ಕೇರ್ - ಸಿಸಿಬಿ

ಮೆಶ್ರೀಕ್ ಹೆಲ್ತ್ ಕೇರ್ - ಅಧಿಕ ಬಡ್ಡಿ ಆಮಿಷವೊಡ್ಡಿ 325 ಮಂದಿಗೆ 6.5. ಕೋಟಿ ವಂಚಿಸಿದ್ದ ಕಂಪನಿ. ಸಂಸ್ಥೆಯ ಸಂಸ್ಥಾಪಕ ಶಮಿವುಲ್ಲಾ ಬಂಧಿತನಾಗಿ ಜಾಮೀನು‌ ಪಡೆದಿದ್ದಾನೆ. 4.10 ಕೋಟಿ ಹಣ ಹಿಂದುರಿಗಿಸಬೇಕಿದ್ದು, ಆತನಿಗೆ ಸೇರಿದ ಚರ ಹಾಗೂ ಸ್ಥಿರಾಸ್ತಿ‌‌ ಮುಟ್ಟುಗೋಲಿಗೆ ಪ್ರಕ್ರಿಯೆಗಳು ಸಾಗಿವೆ.

9) ಬುರಾಕ್ ಯೂನಿಟಿ ಎಲ್ ಎಲ್ ಪಿ- ಸಿಸಿಬಿ

ಅಧಿಕ ಬಡ್ಡಿ ಆಮಿಷವೊಡ್ಡಿ 526 ಮಂದಿಯಿಂದ 10.55 ಕೋಟಿ ರೂ. ವಂಚಿಸಿರುವ ಈ ಕಂಪನಿಯ ಸೂತ್ರದಾರರು ಸೈಯದ್ ನಿಯಾಜ್ ಹಾಗೂ ಸೈಯಲ್ ಮೌಸಿನ್ ಬಂಧನವಾಗಿ ಜಾಮೀನು ಪಡೆದಿದ್ದಾರೆ. 1.56 ಕೋಟಿ ಹಿಂದುರುಗಿಸಿದ್ದು, 8.96 ಕೋಟಿ ಹಿಂದಿರುಗಿಸಬೇಕಿದೆ. ಆರೋಪಿಗಳ ಚರ ಹಾಗೂ ಸ್ಥಿರಾಸ್ತಿ‌‌ ಮುಟ್ಟುಗೋಲು ಪ್ರಕ್ರಿಯೆ ಸಾಗಿದೆ.

10) ಎಸ್.ಆರ್ ಬ್ಲೂಚಿಪ್ - ಸಿಸಿಬಿ

43 ಹೂಡಿಕೆದಾರರಿಂದ 138 ಕೋಟಿ ಪಡೆದಿರುವ ಈ ಕಂಪನಿಯ ಸ್ಥಾಪಕರು ಚಂದ್ರಶೇಖರ್​ ಗುಪ್ತಗಾಲ & ಉಪೇಂದ್ರ ಸುರ್ನೇನಿ. ಆರೋಪಿಗಳು 22.18 ಲಕ್ಷ ಹಿಂದಿರುಗಿಸಿದ್ದು, ಬಳಿಕ ನಾಪತ್ತೆಯಾಗಿದ್ದಾರೆ‌. ಆರೋಪಿಗಳ ವಿರುದ್ಧ ಲುಕ್ ಔಟ್ ನೋಟಿಸ್ ಹೊರಡಿಸಲಾಗಿದ್ದು, ಪತ್ತೆ ಕಾರ್ಯ ಮುಂದುವರೆದಿದೆ.

11) ಮುಜಾರಿಕಾ ಬುಲಿಯನ್ ಟ್ರೇಡಿಂಗ್ ಲಿ. - ಸಿಸಿಬಿ

290 ಮಂದಿಗೆ ಅಧಿಕ ಬಡ್ಡಿ ಆಸೆ ತೋರಿಸಿ 3 ಕೋಟಿ‌ ಮೋಸ ಮಾಡಿರುವ ಈ ಕಂಪನಿಯ ಮುಖ್ಯಸ್ಥರು ಮೊಹಮ್ಮದ್ ರಿಯಾಜ್, ಸೈಯ್ಯದ್ ತಬ್ರೇಜ್ ಅಹಮ್ಮದ್, ಅಹಮ್ಮದ್ ಫಯಾಜ್, ಮಹಮ್ಮದ್ ಮುದಾಸೀರ್ ಪಾಶಾ. ಆರೋಪಿಗಳ ಪೈಕಿ ಮಹಮ್ಮದ್ ರಿಯಾಜ್ ಜಾಮೀನು‌ ಪಡೆದಿದ್ದು ಉಳಿದ ಮೂವರು ನಾಪತ್ತೆಯಾಗಿದ್ದಾರೆ. ಅವರ ಪತ್ತೆ ಕಾರ್ಯ ಮುಂದುವರೆದಿದೆ.

12) ಜೆಎಸ್ ಜೆ ಗ್ಲೋಬಲ್ ಅಡೈವೈಸರಿ ಸರ್ವಿಸ್ - ಸಿಸಿಬಿ

ಅಧಿಕ ಬಡ್ಡಿ ಆಮಿಷವೊಡ್ಡಿ 273 ಹೂಡಿಕೆದಾರರಿಗೆ 4 ಕೋಟಿ ವಂಚಿಸಿರುವ ಕಂಪನಿ. ಇದರ ಮುಖ್ಯಸ್ಥರು ಸುಹೈಲ್ ಅಹಮದ್ ಮತ್ತಿತರರು. ಆರೋಪಿ ಸುಹೇಲ್ ಅಹಮ್ಮದ್ ಬಂಧನವಾಗಿದ್ದು ಉಳಿದ ಆರೋಪಿಗಳು ನಾಪತ್ತೆಯಾಗಿದ್ದಾರೆ. ಹೂಡಿಕೆದಾರರ ಹೇಳಿಕೆ ಪಡೆಯುವ ಕಾರ್ಯ ಹಾಗೂ ತನಿಖೆ ಮುಂದುವರಿಸಲಾಗಿದೆ.