ಬೆಂಗಳೂರು: ಬಿಬಿಎಂಪಿ ಇತ್ತೀಚೆಗೆ ಜಾರಿ ಮಾಡಿರುವ ಪ್ರತ್ಯೇಕ ಹಸಿ ಕಸ ಟೆಂಡರ್ ಜಾರಿಯಿಂದಲೂ ನಿರೀಕ್ಷಿತ ಫಲಿತಾಂಶ ಸಿಗುತ್ತಿಲ್ಲ. ಬಿಬಿಎಂಪಿ ಒಪ್ಪಂದದಲ್ಲಿ ತಿಳಿಸಿರುವ ನಿಯಮಗಳನ್ನು ಗಾಳಿಗೆ ತೂರಿದ ಗುತ್ತಿಗೆದಾರರು, ಕಳಪೆಯಾಗಿ ಕಸ ನಿರ್ವಹಣೆ ಮಾಡುತ್ತಿದ್ದಾರೆ. ಈ ಸಂಬಂಧ 8 ವಾರ್ಡ್ಗಳ ಗುತ್ತಿಗೆದಾರರಿಗೆ ಬಿಬಿಎಂಪಿ ನೋಟೀಸ್ ನೀಡಲು ಮುಂದಾಗಿದೆ.
ಈ ಕುರಿತು ಮಾತನಾಡಿದ ಬಿಬಿಎಂಪಿ ಘನತ್ಯಾಜ್ಯ ವಿಶೇಷ ಆಯುಕ್ತ ಡಿ. ರಂದೀಪ್, ಕಳಪೆ ಕಸ ನಿರ್ವಹಣೆ ಮಾಡುತ್ತಿರುವ 8 ವಾರ್ಡ್ಗಳ ಗುತ್ತಿಗೆದಾರರಿಗೆ ಬಿಬಿಎಂಪಿ ನೋಟೀಸ್ ನೀಡಲು ಮುಂದಾಗಿದೆ. ಒಂದು ವಾರದಲ್ಲಿ ಕೆಲಸದಲ್ಲಿ ಸುಧಾರಣೆ ಕಾಣದಿದ್ದರೆ ಟೆಂಡರ್ ರದ್ದು ಮಾಡಲು ಪಾಲಿಕೆ ನಿರ್ಧರಿಸಿದೆ ಎಂದು ತಿಳಿಸಿದರು.
ಈ ಟಿವಿ ಭಾರತದೊಂದಿಗೆ ಮಾತನಾಡಿದ ಬಿಬಿಎಂಪಿ ಘನತ್ಯಾಜ್ಯ ವಿಶೇಷ ಆಯುಕ್ತ ಡಿ.ರಂದೀಪ್ ಹೊಸ ಟೆಂಡರ್ ಜಾರಿಯಾದ 38 ವಾರ್ಡ್ಗಳ ಪೈಕಿ 10 ವಾರ್ಡ್ಗಳಲ್ಲಿ ಮಾತ್ರ ಸರಿಯಾದ ಕೆಲಸ ನಡೆಯುತ್ತಿದೆ. ಐದಾರು ವಾರ್ಡ್ಗಳಲ್ಲಿ ತುಂಬಾ ಕಳಪೆ ಕೆಲಸ ಮಾಡುತ್ತಿದ್ದಾರೆ. ನಿಗದಿತ ಸಂಖ್ಯೆಗಿಂತ ಕಡಿಮೆ ಗಾಡಿಗಳನ್ನು ಕಳುಹಿಸುತ್ತಿದ್ದಾರೆ. ಜಿಪಿಎಸ್ ಹಾಕಿ, ಮಾಹಿತಿ ನೀಡದ ಕಾರಣ ಪಾಲಿಕೆಗೆ ಟ್ರಾಕ್ ಮಾಡಲು ಆಗುತ್ತಿಲ್ಲ ಎಂದು ಹೇಳಿದರು.
ಬಿಬಿಎಂಪಿಯ 198 ವಾರ್ಡ್ಗಳ ಪೈಕಿ 38 ವಾರ್ಡ್ಗಳಲ್ಲಿ ಪ್ರತ್ಯೇಕ ಹಸಿಕಸ ಟೆಂಡರ್ ಜಾರಿಗೆ ತರಲಾಗಿದೆ. ನಿರ್ವಹಣೆ ವೆಚ್ಚ ಕಡಿಮೆ ಮಾಡುವುದು ಹಾಗೂ ವಾರ್ಡ್ಗಳನ್ನು ಕಸಮುಕ್ತಗೊಳಿಸುವ ನಿರೀಕ್ಷೆ ಇಡಲಾಗಿತ್ತು. ಅಲ್ಲದೆ ಕಸ ನಿರ್ವಹಣೆಯನ್ನು ಬಿಬಿಎಂಪಿ ಕೇಂದ್ರ ಕಚೇರಿಯಿಂದ ಪ್ರತೀ ದಿನ ಗಮನಿಸಲಾಗುತ್ತದೆ. ಹೀಗಾಗಿ ಆಟೋಟಿಪ್ಪರ್, ಕಾಂಪ್ಯಾಕ್ಟರ್ಗಳಿಗೆ ಜಿಪಿಎಸ್ ಅಳವಡಿಕೆ ಕಡ್ಡಾಯ ಮಾಡಲು ಒಪ್ಪಂದದಲ್ಲಿ ತಿಳಿಸಲಾಗಿತ್ತು. ಆದರೆ ಹಲವಾರು ಗುತ್ತಿಗೆದಾರರು ಈ ಕ್ರಮ ಅಳವಡಿಸಿಕೊಂಡಿಲ್ಲ ಎಂದರು.
ಕಳಪೆ ಕೆಲಸ ಮಾಡುತ್ತಿರುವ ವಾರ್ಡ್ಗಳು
ಶಿವಾಜಿನಗರ - 92ನೇ ವಾರ್ಡ್
ಕೆಆರ್ ಪುರಂ - 52ನೇ ವಾರ್ಡ್
ರಾಯಪುರಂ - 137ನೇ ವಾರ್ಡ್
ಚಲವಾದಿಪಾಳ್ಯ -138ನೇ ವಾರ್ಡ್
ಆಜಾದ ನಗರ- -141ನೇ ವಾರ್ಡ್
ಯಡಿಯೂರು- 167ನೇ ವಾರ್ಡ್
ಹೊಸಕರೆಹಳ್ಳಿ- 161ನೇ ವಾರ್ಡ್
ಕೆ.ಆರ್. ಪುರಂ- 52ನೇ ವಾರ್ಡ್
ಈ ವಾರ್ಡ್ಗಳಲ್ಲಿ ಕಸದ ಗುತ್ತಿಗೆ ವಹಿಸಿಕೊಂಡಿರುವ ಗುತ್ತಿಗೆದಾರರಿಗೆ ನೊಟೀಸ್ ನೀಡಲು ಬಿಬಿಎಂಪಿ ಸಿದ್ಧತೆ ನಡೆಸಿದೆ. ಈ ಹಿಂದೆ ಸಪ್ಲೈ ಆರ್ಡರ್ನಲ್ಲಿ ಟೆಂಡರ್ ನಡೆಯುತ್ತಿತ್ತು. ಈಗ ಕೇಂದ್ರ ಕಚೇರಿಯೊಂದಿಗೆ ಒಪ್ಪಂದಕ್ಕೆ ಸಹಿ ಮಾಡಿದೆ. ಈ ಪ್ರಕಾರ, ವಾರ್ಡ್ಗಳಲ್ಲಿ ಸರಿಯಾದ ರೀತಿಯಲ್ಲಿ ಕಸ ನಿರ್ವಹಣೆ ಮಾಡದಿದ್ದರೆ ಕೆಲಸ ಸ್ಥಗಿತ ಮಾಡಲು ಶೋಕಾಸ್ ನೊಟೀಸ್ ನೀಡಲಾಗುವುದು ಹಾಗೂ ಕಪ್ಪು ಪಟ್ಟಿಗೆ ಸೇರಿಸಲಾಗುವುದು ಎಂದರು.
ಮಾರ್ಷಲ್ಸ್ಗಳ ಮೂಲಕ ಪರಿಶೀಲನೆ ನಡೆಸಿದಾಗ ಕೆಲವು ಕಡೆ ಗುತ್ತಿಗೆದಾರರು ಆಸಕ್ತಿಯೇ ತೋರಿಸುತ್ತಿಲ್ಲ. ಎಲ್ಲೆಲ್ಲಿ ಕೆಲಸ ಸರಿಯಾಗಿ ನಡೆಯುತ್ತಿಲ್ಲ ಎಂಬುದರ ಕುರಿತು ವರದಿ ತರಿಸಿಕೊಳ್ಳಲಾಗಿದೆ. ಸುಧಾರಣೆ ಮಾಡಿಕೊಳ್ಳದಿದ್ದರೆ ಅಂತಹ ಕಡೆ ಮರು ಟೆಂಡರ್ ಕರೆಯಲಾಗುವುದು ಎಂದರು.
