ಬಿಜೆಪಿಯವರಿಗೆ ಯಾವುದೇ ಸಿದ್ಧಾಂತ ಇಲ್ಲ: ಸಿದ್ದರಾಮಯ್ಯ ವಾಗ್ದಾಳಿ

ಬೆಂಗಳೂರಿನ ಜಯನಗರದ ಆರ್​.ವಿ ಕಾಲೇಜ್​ನಲ್ಲಿ ಕಾಂಗ್ರೆಸ್​​ನ ಎಲ್ಲಾ ನಾಯಕರು ಭಾಗವಹಿಸಿ ಜವಾಹರ ಲಾಲ್ ನೆಹರೂ ಅವರ ಜನ್ಮದಿನಾಚರಣೆ ಆಚರಿಸಿದರು.

ಬೆಂಗಳೂರು: ಇತ್ತೀಚಿನ ರಾಜಕಾರಣಿಗಳಿಗೆ ಬದ್ಧತೆ ಇಲ್ಲ. ಭಾರತೀಯ ಜನತಾ ಪಕ್ಷದವರಿಗೆ ಯಾವುದೇ ಸಿದ್ಧಾಂತ ಇಲ್ಲ. ಅಧಿಕಾರಕ್ಕಾಗಿ ಸತ್ಯವನ್ನು ಸುಳ್ಳು ಮಾಡ್ತಾರೆ ಎಂದು ಮಾಜಿ ಸಿಎಂ ಸಿದ್ದರಾಮಯ್ಯ ಕಿಡಿಕಾರಿದ್ದಾರೆ.

ಜವಾಹರ ಲಾಲ್ ನೆಹರೂ ಜನ್ಮದಿನಾಚರಣೆ ಪ್ರಯುಕ್ತ ಜಯನಗರದ ಆರ್​.ವಿ ಕಾಲೇಜಿನಲ್ಲಿ ಹಮ್ಮಿಕೊಂಡಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಬಿಜೆಪಿ ನಮ್ಮ ದೇಶಕ್ಕೆ ಒಪ್ಪಿಗೆ ಆಗದ ವಿಚಾರಗಳನ್ನ ಹೇಳೋದು ಜಾಸ್ತಿ. ಒಬ್ಬನೇ ಒಬ್ಬ ಬಿಜೆಪಿ ನಾಯಕ ಸ್ವಾತಂತ್ರ್ಯಕ್ಕೆ ಹೋರಾಟ ಮಾಡಲಿಲ್ಲ. ವಲ್ಲಭಭಾಯ್​ ಪಟೇಲ್ ಕಾಂಗ್ರೆಸ್ ಕಟ್ಟಾಳು. ಈಗ ಅವರನ್ನು ಬಳಸಿಕೊಂಡು ನೆಹರೂ ವಿರುದ್ಧ ಪ್ರೊಜೆಕ್ಟ್ ಮಾಡುವ ಕೆಲಸ ನಡೆಯುತ್ತಿದೆ. ಬಿಜೆಪಿ ಅವರು ನೆಹರೂ ಅವರನ್ನು ಮರೆಯಬಾರದು. ಆರ್​ಎಸ್ಎಸ್ ಮತ್ತು ಹಿಂದೂ ಮಹಸಭಾ ಬ್ಯಾನ್ ಆಗಿತ್ತು. ಮರು ಕಟ್ಟಲು ಅವಕಾಶ ಕೇಳಿದಾಗ ನೆಹರೂ ಅವಕಾಶ ಕೊಟ್ರು ಎಂದರು.

ಮೋದಿಗೆ ಸ್ವಾತಂತ್ರ್ಯದ ಕಲ್ಪನೆ ಇಲ್ಲ:
ನರೇಂದ್ರ ಮೋದಿಗೆ ಸ್ವಾತಂತ್ರ್ಯದ ಕಲ್ಪನೆಯೇ ಗೊತ್ತಿಲ್ಲ. ನಮ್ಮ ದೇಶಕ್ಕೆ ಸ್ವಾತಂತ್ರ್ಯ ಬಂದಾಗ ಮೋದಿ ಹುಟ್ಟಿರಲಿಲ್ಲ. ಮೋದಿಗೆ ಅವರ ಮಹತ್ವ ಗೊತ್ತಿಲ್ಲ. ಡೋನಾಲ್ಡ್ ಟ್ರಂಪ್​ಗೆ ಜ್ಞಾನದ ಕೊರತೆ ಇದೆ. ಫಾದರ್ ಆಫ್ ದಿ ನೇಷನ್ ಇರೋದು ಒಬ್ಬರೇ, ಅದು ಗಾಂಧಿ. ಮೋದಿ ಅಂತ ಹೇಳಿದಾಗ ಅಲ್ಲಿಯೇ ಪ್ರತಿಭಟನೆ ಮಾಡಬೇಕಿತ್ತು ಎಂದರು. ಈ ವೇಳೆ ಸಭಿಕರು ಮೋದಿ ಅವರ ಅಣ್ಣ ಟ್ರಂಪ್ ಅಂದಾಗ, ತಮ್ಮನೋ ಅಣ್ಣನೋ ಅದನ್ನು ಒಪ್ಪಿಕೊಂಡಿದ್ದು ಸರಿಯಲ್ಲ. ಹಲವರು ಪ್ರಾಣ ತ್ಯಾಗ ಮಾಡಿ ಕಟ್ಟಿದ ದೇಶವನ್ನ ಹಾಳು ಮಾಡುತ್ತಿದ್ದಾರೆ. ಪ್ರಜಾಪ್ರಭುತ್ವ ನಾಶ ಮಾಡಲು ಬಿಜೆಪಿ ಹೊರಟಿದೆ ಎಂದು ದೂರಿದರು.

ದೇಶದ ಪ್ರಜಾಪ್ರಭುತ್ವ ಬುಡಮೇಲು ಮಾಡುವ ಕೆಲಸ ಬಿಜೆಪಿಯಿಂದ ನಡೆಯುತ್ತಿದೆ. ಪ್ರಜಾಪ್ರಭುತ್ವ ರಕ್ಷಣೆ ಮಾಡುವ ಜವಾಬ್ದಾರಿ ಕಾಂಗ್ರೆಸ್ ಮೇಲಿದೆ. ಪ್ರಜಾಪ್ರಭುತ್ವದ ಮೊದಲ ವಿರೋಧಿ ನರೇಂದ್ರ ಮೋದಿ. ಕಾಂಗ್ರೆಸ್ ಮುಕ್ತ ಭಾರತ ಮಾಡಲು ಸಾಧ್ಯವಿಲ್ಲ. ಜನರಿಗೆ ಇಂತಹ ಭಾವನೆಗಳನ್ನ ತುಂಬಲು ಮುಂದೆ ಬರಬೇಡಿ. ನೆಹರೂ ಮತ್ತು ಗಾಂಧಿ ನಿಮ್ಮ ರೀತಿ ಅಂದುಕೊಂಡಿದ್ರೆ ಅಂದು ವಿರೋಧ ಪಕ್ಷವೇ ಇರ್ತಿರಲಿಲ್ಲ. ಅವರು ಪ್ರಜಾಪ್ರಭುತ್ವದ ಮೇಲಿನ ನಂಬಿಕೆಯಿಂದ ವಿರೋಧ ಪಕ್ಷ ಇರಬೇಕು ಅಂದುಕೊಂಡ್ರು. ವಿರೋಧ ಪಕ್ಷ ಇದ್ರೆ ಮಾತ್ರ ಪ್ರಜಾಪ್ರಭುತ್ವ ಯಶಸ್ವಿಯಾಗಲು ಸಾಧ್ಯ ಎಂದರು.

ರೋಷನ್ ಬೇಗ್ ಬಿಜೆಪಿಗೆ ಸೇರ್ಪಡೆ ಆಗದಿರುವ ಬಗ್ಗೆ ನನಗೆ ಮಾಹಿತಿ ಇಲ್ಲ. ಹಾಗಾದ್ರೆ ಅವರು ಅತಂತ್ರ ತಾನೇ. ಇಂದಿರಾ ಕ್ಯಾಂಟೀನ್ ಹೆಸರು ಬದಲಾವಣೆ ಬೇಡ. ಹೆಸರು ಬದಲಾವಣೆಯಿಂದ ಕ್ವಾಲಿಟಿ ಚೇಂಜ್ ಆಗಲ್ಲ. ಅನುದಾನ ಕೊಟ್ಟು ಕ್ವಾಲಿಟಿ ಹೆಚ್ಚು ಮಾಡ್ಲಿ. ಇಂದು ಸಂಜೆ ಒಳಗೆ ಉಪ ಚುನಾವಣೆಗೆ ಅಭ್ಯರ್ಥಿಗಳನ್ನು ಅಂತಿಮ ಮಾಡುತ್ತೇವೆ ಎಂದು ತಿಳಿಸಿದರು.

ಹೊಸಕೋಟೆಯಲ್ಲಿ ಪಕ್ಷೇತರ ಅಭ್ಯರ್ಥಿಗೆ ಜೆಡಿಎಸ್ ಸಪೋರ್ಟ್ ವಿಚಾರ ಮಾತನಾಡಿ, ಬಚ್ಚೇಗೌಡ ಮತ್ತು ದೇವೇಗೌಡ್ರು ಮೊದಲಿಂದಲೂ ಹಾವು ಮುಂಗಸಿ ಥರ ಇದ್ರು. ಈಗ ಯಾವ ರೀತಿ ಹೊಂದಾಣಿಕೆ ಅನ್ನೋದು ಗೊತ್ತಿಲ್ಲ. ಇದರ ಹಿಂದೆ ಏನಿದಿಯೋ ಗೊತ್ತಿಲ್ಲ ಎಂದು ವ್ಯಂಗ್ಯವಾಡಿದರು.

ಇಡಿಗೆ ನನ್ನ ವಿರುದ್ಧ ದೂರು ನೀಡಲಾಗಿದೆ:
ಕೆ‌.ಜೆ.ಜಾರ್ಜ್ ಮಾತನಾಡಿ, ಇಡಿಗೆ ನನ್ನ ವಿರುದ್ಧ ಯಾರೋ ದೂರು ನೀಡಿದ್ದಾರೆ. ನಾನು ಸಹಕಾರ ಕೊಡ್ತೀನಿ. ಆದ್ರೆ ಇಡಿಯವ್ರು ಇದುವರೆಗೂ ನನ್ನನ್ನು ವಿಚಾರಣೆಗೆ ಕರೆದಿಲ್ಲ. ಇಡಿಯವ್ರು ತಮ್ಮ ಕೆಲಸ ತಾವು ಮಾಡ್ತಾರೆ. ಲೋಕಾಯುಕ್ತ ಬಳಿ ದಾಖಲೆ ಕೇಳಿರೋದು ನನಗೆ ಗೊತ್ತಿಲ್ಲ. ನನ್ನ ಎಲ್ಲಾ ದಾಖಲಾತಿಗಳನ್ನ ಐಟಿಗೆ, ಲೋಕಾಯುಕ್ತಗೆ, ಚುನಾವಣಾ ಆಯೋಗಕ್ಕೆ ಕೊಟ್ಟಿದ್ದೇನೆ. ಇದು ಸಾರ್ವಜನಿಕ ಮಾಹಿತಿ, ಯಾರು ಬೇಕಾದ್ರೂ ಪಡೆದುಕೊಳ್ಳಬಹುದು. ಯಾರೋ ಪತ್ರ ಬರೆದ್ರು ಅನ್ನೋದನ್ನ ದೊಡ್ಡದು ಮಾಡುವುದು ಸರಿಯಲ್ಲ ಎಂದರು.

ಎಲ್ಲರಿಗೂ ಇದೇ ಸ್ಥಿತಿ:
ರೋಷನ್ ಬೇಗ್ ಬಿಜೆಪಿ ಸೇರ್ಪಡೆ ಮಾಡದ ವಿಚಾರ ಮಾತನಾಡಿ, ಇಂದು ರೋಷನ್ ಬೇಗ್ ಹೊರಗಿಟ್ಟಿದ್ದಾರೆ. ಮುಂದೆ ಅನರ್ಹರಿಗೂ ಇದೇ ಪರಿಸ್ಥಿತಿ ಆಗಲಿದೆ. ಅವ್ರಿಗೂ ಇಂದ್ರ ಚಂದ್ರ ತೋರಿಸ್ತಾರೆ. ಎರಡನೇ ದರ್ಜೆಯ ನಾಗರೀಕರಾಗಿ ಮೂಲೆಗುಂಪು ಮಾಡೋದು ಖಚಿತ ಎಂದರು.