ಬೆಂಗಳೂರು :ಉದ್ಯೋಗದಲ್ಲಿದ್ದ ಪತ್ನಿಗೆ ಕಿರುಕುಳ ನೀಡಿದ್ದ ನಿರುದ್ಯೋಗಿ ಪತಿಗೆ ಐಪಿಸಿ ಸೆಕ್ಷನ್ 498ಎ (ಹಿಂಸೆ) ಪ್ರಕರಣದಡಿ ವಿಚಾರಣಾ ನ್ಯಾಯಾಲಯ ಶಿಕ್ಷೆ ವಿಧಿಸಿತ್ತು. ಇದೀಗ ನ್ಯಾಯಾಲಯ ವಿಧಿಸಿದ ಶಿಕ್ಷೆಯನ್ನು ಹೈಕೋರ್ಟ್ ಎತ್ತಿ ಹಿಡಿದಿದೆ. ಪ್ರಕರಣದಲ್ಲಿ ತನಗೆ ಶಿಕ್ಷೆ ವಿಧಿಸಿ ಜೆಎಂಎಫ್ ಮತ್ತು ಜಿಲ್ಲಾ ಸೆಷನ್ಸ್ ನ್ಯಾಯಾಲಯ ಹೊರಡಿಸಿರುವ ಆದೇಶ ರದ್ದುಪಡಿಸುವಂತೆ ಕೋರಿ ಚಿತ್ರದುರ್ಗದ ಎಚ್.ಡಿ. ನವೀನ್ ಎಂಬುವರು ಕ್ರಿಮಿನಲ್ ಮರು ಪರಿಶೀಲನಾ ಅರ್ಜಿ ಸಲ್ಲಿಸಿದ್ದರು.
ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ರಾಮಚಂದ್ರ ಡಿ.ಹುದ್ದಾರ ಅವರ ನ್ಯಾಯಪೀಠ ಅರ್ಜಿಯನ್ನು ವಜಾಗೊಳಿಸಿ ಆದೇಶಿಸಿದೆ. ಅಲ್ಲದೆ, ಆರೋಪಿ ನವೀನ್ ನಿರುದ್ಯೋಗಿಯಾಗಿದ್ದಾನೆ. ಬಿಎ ಪದವೀಧರೆಯಾಗಿರುವ ಆತನ ಪತ್ನಿ ಶಿಕ್ಷಕಿಯಾಗಿ ಕೆಲಸ ಮಾಡಿದ್ದರೂ ಬಹುಶಃ ಈ ವಿಚಾರದಲ್ಲಿ ನವೀನ್‌ಗೆ ಕೀಳರಿಮೆ ಉಂಟಾಗಿರಬಹುದು. ಇದೇ ಕಾರಣಕ್ಕೆ ಪತಿ ನವೀನ್ ಮತ್ತು ಆತನ ಕುಟುಂಬ ಸದಸ್ಯರು ಹೆಚ್ಚುವರಿ ವರದಕ್ಷಿಣೆಗೆ ಬೇಡಿಕೆಯಿಟ್ಟು ದೀಪಶ್ರೀಗೆ ಮಾನಸಿಕ ಹಾಗೂ ದೈಹಿಕವಾಗಿ ಕಿರುಕುಳ ನೀಡಿರಬಹುದು.
ಕಿರುಕುಳ ಎಂಬುದು ವ್ಯಕ್ತಿಯಿಂದ ವ್ಯಕ್ತಿಗೆ ಭಿನ್ನವಾಗಿರಬಹುದು. ಕೆಲವರು ಅದನ್ನು ಸಹಿಸಿಕೊಳ್ಳುತ್ತಾರೆ. ಕೆಲವರು ಮೌನವಾಗಿದ್ದುಕೊಂಡೇ ನರಳಾಡುತ್ತಾರೆ. ದುರ್ಬಲ ಮನಸ್ಸಿನವರು ಇಂತಹ ಕಿರುಕುಳ ಸಹಿಕೊಳ್ಳಲಾರದೆ ತಮ್ಮ ಜೀವನನ್ನೇ ಕಳೆದುಕೊಳ್ಳುತ್ತಾರೆ. ಅದೃಷ್ಟವಶಾತ್ ಪ್ರಕರಣದಲ್ಲಿ ಸಂತ್ರಸ್ತೆಯ ಆತ್ಮಹತ್ಯೆ ಪ್ರಚೋದನೆಗೆ ಕಾರಣವಾಗಿಲ್ಲ. ಕೆಟ್ಟದಾಗಿ ನಡೆಸಿಕೊಂಡ ಮತ್ತು ಕಿರುಕುಳದ ಬಗ್ಗೆ ದೂರುದಾರೆ ಹೇಳಿಕೊಂಡಿದ್ದಾರೆ ಎಂದು ಅಭಿಪ್ರಾಯಪಟ್ಟಿದೆ.
ಅಪರಾಧ ಎಸಗುವ ಉದ್ದೇಶದಿಂದ ನೀಡುವ ಕಿರುಕುಳ ಕೇವಲ ದೈಹಿಕವಾಗಿಯೇ ಇರಬೇಕೆಂದಿಲ್ಲ. ಮಾನಸಿಕ ಕಿರುಕುಳ ಮತ್ತು ಅಸಹಜ ನಡವಳಿಕೆಯೂ ಸಹ ಕ್ರೌರ್ಯ ಅಥವಾ ಕಿರುಕುಳ ಎಂದೆನಿಸಿಕೊಳ್ಳುತ್ತದೆ. ಈ ಪ್ರಕರಣದಲ್ಲಿ ತವರು ಮನೆಗೆ ಹೋದ ಪತ್ನಿಯನ್ನು ವಾಪಸ್ ಕರೆತಂದು ಆಕೆಯೊಂದಿಗೆ ಸಂತಸದಿಂದ ಜೀವನ ನಡೆಸುವ ಯಾವುದೇ ಪ್ರಯತ್ನ ನವೀನ್ ಮಾಡಿಲ್ಲ. ಆಕೆಯ ಬಗ್ಗೆ ಪ್ರೀತಿ ಮತ್ತು ವಾತ್ಸಲ್ಯವನ್ನು ಹೊಂದಿರಲಿಲ್ಲ. ಆರೋಪಿಯು ಪತ್ನಿಗೆ ಕಿರುಕುಳ ನೀಡಿರುವುದು ಸಾಕ್ಷ್ಯಾಧಾರಗಳ ಸಮೇತ ಸಾಬೀತಾಗಿದ್ದು, ಶಿಕ್ಷೆ ವಿಧಿಸಿದ ವಿಚಾರಣಾ ನ್ಯಾಯಾಲಯಗಳ ಆದೇಶ ಸೂಕ್ತವಾಗಿದೆ ಎಂದು ತಿಳಿಸಿದ ಹೈಕೋರ್ಟ್ ಅರ್ಜಿ ವಜಾಗೊಳಿಸಿದೆ.