ಹಣ ಕೇಳಿದ ಫಿನಾನ್ಶಿಯರ್​ಗೆ ಚಾಕುವಿನಿಂದ ಇರಿದ.. ಕಾಸಿನ ಗಲಾಟೆ​ ಕೊಲೆಯಲ್ಲಿಅಂತ್ಯ!

ಕೊಟ್ಟಿದ್ದ ಹಣ ಹಿಂದಿರುಗಿಸುವಂತೆ ಕೇಳಿದ ಫಿನಾನ್ಶಿಯರ್​ಗೆ ಚಾಕುವಿನಿಂದ ಇರಿದ ಘಟನೆ ಬೆಂಗಳೂರಲ್ಲಿ ನಡೆದಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದ್ದ ಫಿನಾನ್ಶಿಯರ್ ಸಾವನ್ನಪ್ಪಿದ್ದಾನೆ.

ಬೆಂಗಳೂರು:ಹಣಕಾಸಿನ ವಿಚಾರಕ್ಕೆ ನಡೆದಿದ್ದ ಗಲಾಟೆ, ಕೊಲೆಯಲ್ಲಿ ಅಂತ್ಯವಾಗಿರುವ ಘಟನೆ ನಗರದಲ್ಲಿ ನಡೆದಿದೆ. ಚಾಕುವಿನಿಂದ ಇರಿತಕ್ಕೊಳಗಾಗಿದ್ದ ಫಿನಾನ್ಶಿಯರ್​​ ಚಿಕಿತ್ಸೆ ಫಲಿಸದೆ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾನೆ.

ವಿನ್ಸೆಂಟ್ ಹತ ಫಿನಾನ್ಶಿಯರ್​. ನಿನ್ನೆ ಬೆಂಗಳೂರಿನ ದೊಮ್ಮಲೂರಿನ ಕೆನರಾ ಬ್ಯಾಂಕ್ ಬಳಿ ಮಣಿ ಹಾಗೂ ವಿನ್ಸೆಂಟ್ ನಡುವೆ ಹಣಕಾಸು ವಿಚಾರಕ್ಕೆ ಗಲಾಟೆ ನಡೆದಿತ್ತು. ಈ ವೇಳೆ ಗಲಾಟೆ ತಾರಕಕ್ಕೇರಿ ವಿನ್ಸೆಂಟ್​​ಗೆ ಮಣಿ ಚಾಕುವಿನಿಂದ ಇರಿದಿದ್ದಾನೆ. ತಕ್ಷಣ ಸ್ಥಳೀಯರು ಮಣಿಪಾಲ್ ಆಸ್ಪತ್ರೆಗೆ ವಿನ್ಸೆಂಟ್​​ನನ್ನ ದಾಖಲಿಸಿದ್ದರೂ, ಚಿಕಿತ್ಸೆ ಫಲಕಾರಿಯಾಗದೇ ಇಂದು ಸಾವನ್ನಪ್ಪಿದ್ದಾನೆ ಎಂದು ತಿಳಿದುಬಂದಿದೆ.

ಚಾಕು ಇರಿದ ಆರೋಪಿ ಮಣಿ ಫಿನಾನ್ಸ್ ನೋಡಿಕೊಳ್ಳುತ್ತಿದ್ದ ವಿನ್ಸೆಂಟ್​​ನಿಂದ ಹಣ ಪಡೆದಿದ್ದ. ಬಹಳ ದಿನದಿಂದ ಹಣ ಕೊಡದೇ ಸತಾಯಿಸುತ್ತಿದ್ದ ಕಾರಣ ವಿನ್ಸೆಂಟ್ ನಿನ್ನೆ ಮಣಿಯನ್ನ ಭೇಟಿಯಾಗಿದ್ದ. ಈ ವೇಳೆ ಹಣ ಹಿಂದಿರುಗಿಸುವಂತೆ ವಿನ್ಸೆಂಟ್ ಕೇಳಿದಾಗ ಜಗಳ ನಡೆದಿತ್ತು. ಸದ್ಯ ಹಲಸೂರು ಪೊಲೀಸ್​​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿ ಮಣಿಗಾಗಿ ಶೋಧ ಮುಂದುವರೆದಿದೆ.