ಬಾಗಲಕೋಟೆಯಲ್ಲಿ ಅಂಚೆ ಇಲಾಖೆಯಿಂದ ಸಂಚಾರಿ ಎಟಿಎಂ ಸೇವೆ!

ಸಾರ್ವಜನಿಕರ ನಗದು ಸಮಸ್ಯೆ ಬಗೆಹರಿಸಲು ಅಂಚೆ ಇಲಾಖೆ ಸಂಚಾರಿ ಎಟಿಎಂ ಆರಂಭಿಸಿದೆ. ಗ್ರಾಹಕರ ಮನೆ ಬಾಗಿಲಿಗೆ ತೆರಳಿ ಹಣ ನೀಡುವ ಯೋಜನೆ ಇದಾಗಿದ್ದು, ಸಾರ್ವಜನಿಕರ ಗಮನ ಸೆಳೆದಿದೆ.

ಬಾಗಲಕೋಟೆ: ನಿಮ್ಮ ಬಳಿ ಹಣವಿಲ್ಲವೇ? ಹಾಗಿದ್ರೆ ನೀವು ತಕ್ಷಣ ಎಟಿಎಂ ಅಥವಾ ಬ್ಯಾಂಕ್​ಗೆ ತೆರಳುವ ಅವಶ್ಯಕತೆ ಇಲ್ಲ. ನಿಮ್ಮ ಮನೆ ಬಾಗಿಲಿಗೆ ಬರಲಿದೆ ಅಂಚೆ ಇಲಾಖೆಯ ಸಂಚಾರಿ ಎಟಿಎಂ.

ಬಾಗಲಕೋಟೆಯಲ್ಲಿ ಸಂಚಾರಿ ಎಟಿಎಂ

ಕೋವಿಡ್​-19 ರೋಗದ ಭೀತಿಯಿಂದ ಜನರಿಗೆ ಹಣದ ಸಮಸ್ಯೆ ಎದುರಾಗಬಾರದು ಎಂದು ಬಾಗಲಕೋಟೆ ಅಂಚೆ ಇಲಾಖೆ ಹಲವು ಇಲಾಖೆಗಳ ಜೊತೆಗೂಡಿ ಈ ಯೋಜನೆಗೆ ಕೈ ಹಾಕಿದೆ. ಇದರಿಂದ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಮನೆಯ ಬಾಗಿಲಿಗೆ ಅಂಚೆ ಇಲಾಖೆಯ ಸಂಚಾರಿ ಎಟಿಎಂ ವಾಹನ ಬಂದು ಹಣ ನೀಡುತ್ತದೆ. ಇಲ್ಲಿನ ನವನಗರ, ವಿದ್ಯಾಗಿರಿ ಸೇರಿದಂತೆ ಇತರ ಪ್ರದೇಶಗಳಲ್ಲಿ ಸಂಚಾರ ಆರಂಭಿಸಿದ್ದು, ಯಾವುದೇ ಬ್ಯಾಂಕ್​ ಖಾತೆಯಿಂದಲೂ ಹಣ ಪಡೆಯಬಹುದಾಗಿದೆ. ಮೊಬೈಲ್ ಸಂಖ್ಯೆ ಹಾಗೂ ಆಧಾರ್​ ಕಾರ್ಡ್​ ನಂಬರ್​ ನೀಡಿದರೆ ಸಾಕು 10 ಸಾವಿರ ರೂಪಾಯಿಗಳವರೆಗೆ ಹಣ ನೀಡುತ್ತಾರೆ. ಅಷ್ಟೇ ಅಲ್ಲದೇ ರಿಜಿಸ್ಟ್ರಾರ್, ಸ್ಪೀಡ್ ಪೋಸ್ಟ್ ಸೇರಿದಂತೆ ಇತರ ಸೇವೆಗಳನ್ನು ಮಾಡುವ ಮೂಲಕ ಎಲ್ಲರ ಗಮನ ಸೆಳೆಯುತ್ತಿದೆ.