ಸಾಮರ್ಥ್ಯವಿದ್ರೂ ಅದೃಷ್ಟವಿಲ್ಲ: ಥಾಯ್ಲೆಂಡ್​ ಮಹಿಳೆಯರ ವಿಶ್ವಕಪ್ ಕನಸು ಛಿದ್ರಗೊಳಿಸಿದ ಐಸಿಸಿ ರೂಲ್ಸ್

ಮುಂಬರುವ ವಿಶ್ವಕಪ್​ಗೆ ಐಸಿಸಿ ಶ್ರೇಯಾಂಕದ ಆಧಾರದ ಮೇಲೆ ತಂಡಗಳನ್ನು ಆಯ್ಕೆ ಮಾಡುವುದಾಗಿ ಘೋಷಿಸಿದ್ದು, ಐಸಿಸಿ ನಿಯಮ ಥಾಯ್ಲೆಂಡ್​ಗೆ ಮಾರಕವಾಗಿ ಪರಿಣಮಿಸಿತು. ಏಕೆಂದರೆ, ಥಾಯ್ಲೆಂಡ್​ ಇನ್ನೂ ಐಸಿಸಿಯಿಂದ ಏಕದಿನ ಕ್ರಿಕೆಟ್​ ಸ್ಥಾನಮಾನ ಪಡೆಯದ ಕಾರಣ ಟೂರ್ನಿಯಲ್ಲಿ ಗರಿಷ್ಠ ಗೆಲುವು ಮತ್ತು ಅಂಕ ಸಂಪಾದಿಸಿದರೂ ಶ್ರೇಯಾಂಕ ರಹಿತ ತಂಡವಾದ್ದರಿಂದ ವಿಶ್ವಕಪ್​ಗೆ ಅರ್ಹತೆ ಪಡೆಯಲು ವಿಫಲವಾಗಿದೆ.

ದುಬೈ: ಕಳೆದ ವರ್ಷ ಟಿ20 ವಿಶ್ವಕಪ್​ಗೆ ಅರ್ಹತೆ ಪಡೆದುಕೊಂಡು ಕ್ರಿಕೆಟ್​ ಲೋಕದ ಮನಸು ಗೆದ್ದಿದ್ದ ಥಾಯ್ಲೆಂಡ್​ ಮಹಿಳಾ ಕ್ರಿಕೆಟ್‌ ತಂಡ ಮುಂದಿನ ವರ್ಷ ನ್ಯೂಜಿಲ್ಯಾಂಡ್​ನಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್​ನಲ್ಲಿ ಆಡುವ ಅವಕಾಶವನ್ನು ದುರಾದೃಷ್ಟ ರೀತಿಯಲ್ಲಿ ಕಳೆದುಕೊಂಡಿದೆ.

2020ರಲ್ಲಿ ಆಸ್ಟ್ರೇಲಿಯಾದಲ್ಲಿ ನಡೆದ ಟಿ20 ವಿಶ್ವಕಪ್​ನಲ್ಲಿ ಥಾಯ್ಲೆಂಡ್​ ಒಂದೂ ಪಂದ್ಯವನ್ನು ಗೆಲ್ಲಲಿಲ್ಲ. ಆದರೆ ತಮ್ಮ ಮೊದಲ ಪ್ರಯತ್ನದಲ್ಲಿ ತೋರಿದ ಪ್ರದರ್ಶನ, ಸೋಲನ್ನು ಖುಷಿಯಾಗಿ ಸ್ವೀಕರಿಸುವ ಅವರ ಮನೋಭಾವ ಕ್ರಿಕೆಟ್​ ಅಭಿಮಾನಿಗಳನ್ನು ಮಂತ್ರಮುಗ್ಧರನ್ನಾಗಿಸಿತ್ತು.

ಆದರೆ, ಕಳೆದೊಂದು ವರ್ಷದಿಂದ ಅವರ ಆಟದಲ್ಲಿ ಸಾಕಷ್ಟು ಬದಲಾವಣೆಗಳಾಗಿದ್ದವು. ಬ್ಯಾಟಿಂಗ್ ಚತುರತೆ ,ಚುರುಕು ಫೀಲ್ಡಿಂಗ್‌ ಹಾಗೂ ಬೌಲಿಂಗ್​ ಸೇರಿದಂತೆ ಎಲ್ಲದರಲ್ಲೂ ಸಾಕಷ್ಟು ಸುಧಾರಣೆ ಸಾಧಿಸಿದ್ದ ಥಾಯ್ ಮಹಿಳೆಯರು ಚೊಚ್ಚಲ ಏಕದಿನ ವಿಶ್ವಕಪ್​ನಲ್ಲೂ ಆಡುವ ಕನಸು ಕಂಡಿದ್ದರು. ಆದರೆ ದಿಢೀರ್ ಕಾಣಿಸಿಕೊಂಡ ರೂಪಾಂತರ ಕೊರೊನಾ ವೈರಸ್​ ಮತ್ತು ಐಸಿಸಿ ತೆಗೆದುಕೊಂಡ ನಿರ್ಧಾರಗಳು ಅವರ ಆಸೆ, ಕನಸುಗಳನ್ನು ನುಚ್ಚುನೂರು ಮಾಡಿದೆ.

ಏಕದಿನ ವಿಶ್ವಕಪ್​ಗೆ ಮೀಸಲಿದ್ದ 8 ತಂಡಗಳ ಬದಲಾಗಿ ಐಸಿಸಿ 2022ರ ವಿಶ್ವಕಪ್​ಗೆ 10 ತಂಡಗಳನ್ನಾಡಿಸುವ ನಿರ್ಧಾರ ತೆಗೆದುಕೊಂಡಿತ್ತು. ಭಾರತ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ ಮತ್ತು ನ್ಯೂಜಿಲ್ಯಾಂಡ್​ ತಂಡಗಳು ನೇರ ಅರ್ಹತೆ ಪಡೆದಿದ್ದರಿಂದ ಉಳಿದ 5 ತಂಡಗಳಿಗಾಗಿ ಐಸಿಸಿ ವೆಸ್ಟ್​ ಇಂಡೀಸ್​, ಶ್ರೀಲಂಕಾ, ಬಾಂಗ್ಲಾದೇಶ, ಪಾಕಿಸ್ತಾನ, ಜಿಂಬಾಬ್ವೆ, ಥಾಯ್ಲೆಂಡ್, ನೆದರ್ಲೆಂಡ್ಸ್​, ಯುಎಸ್​ಎ ಮತ್ತು ಐರ್ಲೆಂಡ್​ ಸೇರಿದಂತೆ 9 ರಾಷ್ಟ್ರಗಳ ನಡುವೆ ಅರ್ಹತಾ ಟೂರ್ನಿಯನ್ನು ಆಯೋಜಿಸಿತ್ತು.

ಇತ್ತೀಚೆಗೆ ದಕ್ಷಿಣ ಆಫ್ರಿಕಾದಲ್ಲಿ ರೂಪಾಂತರಿ ಕೊರೊನಾ ವೈರಸ್​ ಕಾಣಿಸಿಕೊಂಡಿದ್ದರಿಂದ ಅಫ್ರಿಕನ್​ ದೇಶಗಳು ಪ್ರಯಾಣ ನಿರ್ಬಂಧ ಹೇರಲು ತೀರ್ಮಾನಿಸಿದ್ದವು. ಟೂರ್ನಿಯಲ್ಲಿ ಭಾಗವಹಿಸಿದ ತಂಡಗಳು ತವರಿಗೆ ಹಿಂತಿರುಗಲು ಕಷ್ಟವಾಗಬಹುದು ಎಂಬ ಕಾರಣಕ್ಕೆ ಐಸಿಸಿ ಇಡೀ ಟೂರ್ನಿಯನ್ನೇ ರದ್ದು ಮಾಡಿತು.

ಥಾಯ್ಲೆಂಡ್​ಗೆ ಮಾರಕವಾದ ಐಸಿಸಿ ನಿರ್ಧಾರ

ಹಾಗೆಯೇ ಮುಂಬರುವ ವಿಶ್ವಕಪ್​ಗೆ ಐಸಿಸಿ ಶ್ರೇಯಾಂಕದ ಆಧಾರದ ಮೇಲೆ ತಂಡಗಳನ್ನು ಆಯ್ಕೆ ಮಾಡುವುದಾಗಿ ಘೋಷಿಸಿತು. ಐಸಿಸಿ ಈ ನಿರ್ಧಾರ ಥಾಯ್ಲೆಂಡ್​ಗೆ ಮಾರಕವಾಗಿ ಪರಿಣಮಿಸಿತು. ಏಕೆಂದರೆ, ಥಾಯ್ಲೆಂಡ್​ ಇನ್ನೂ ಐಸಿಸಿಯಿಂದ ಏಕದಿನ ಕ್ರಿಕೆಟ್​ ಸ್ಥಾನಮಾನ ಪಡೆಯದ ಕಾರಣ ಟೂರ್ನಿಯಲ್ಲಿ ಗರಿಷ್ಠ ಗೆಲುವು ಮತ್ತು ಅಂಕ ಸಂಪಾದಿಸಿದರೂ ಶ್ರೇಯಾಂಕರಹಿತ ತಂಡವಾದ್ದರಿಂದ ವಿಶ್ವಕಪ್​ಗೆ ಅರ್ಹತೆ ಪಡೆಯಲು ವಿಫಲವಾಯಿತು. ಈಗಾಗಲೇ ಏಕದಿನ ಶ್ರೇಯಾಂಕದಲ್ಲಿ ಸ್ಥಾನ ಪಡೆದಿರುವ ಬಾಂಗ್ಲಾದೇಶ, ವೆಸ್ಟ್​ ಇಂಡೀಸ್​ ಮತ್ತು ಪಾಕಿಸ್ತಾನ ತಂಡಗಳು ನೇರ ಅರ್ಹತೆ ಪಡೆದುಕೊಂಡವು.

ಅರ್ಹತಾ ಟೂರ್ನಿಯನ್ನು ಪರಿಗಣಿಸಿದ್ದರೆ ಥಾಯ್ಲೆಂಡ್​ಗೆ ವಿಶ್ವಕಪ್​ ಭಾಗವಾಗುವ ಅವಕಾಶ ಕೊನೆಯ ಸೇರ್ಪಡೆಗೊಂಡ 5 ತಂಡಗಳಿಗಿಂತ ಹೆಚ್ಚಿತ್ತು. ಏಕೆಂದರೆ ಪಾಕಿಸ್ತಾನ, ಬಾಂಗ್ಲಾದೇಶ ಗುಂಪಿನಲ್ಲಿ ಥಾಯ್ಲೆಂಡ್​ ಗರಿಷ್ಠ ಅಂಕವನ್ನು ಪಡೆದು ಅಗ್ರಸ್ಥಾನ ಪಡೆದಿತ್ತು. ಆದರೀಗ ಏಕದಿನ ಸ್ಥಾನಮಾನ ಪಡೆದಿಲ್ಲ ಎಂಬ ಒಂದು ಕಾರಣದಿಂದ ಸಂಪೂರ್ಣ ಸದಸ್ಯರ ತಂಡವಾದ ಬಾಂಗ್ಲಾದೇಶ, ಜಿಂಬಾಬ್ವೆಯನ್ನು ಮಣಿಸಿದರೂ ವಿಶ್ವಕಪ್​ ಅರ್ಹತೆ ಪಡೆಯಲು ವಿಫಲವಾಗಿದೆ. ಅಲ್ಲದೆ ಐಸಿಸಿ ತೆಗೆದುಕೊಂಡಿರುವ ಈ ನಿರ್ಧಾರ ಕ್ರಿಕೆಟ್​ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಇದನ್ನೂ ಓದಿ: Abu Dhabi T10 League: 23 ಎಸೆತಗಳಲ್ಲಿ 77ರನ್​​ಗಳಿಸಿ ಆರ್ಭಟಿಸಿದ ಮೊಯಿನ್​ ಅಲಿ