ದುಬೈ: ಸೋಮವಾರ ನಡೆದ ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧದ ಪಂದ್ಯದಲ್ಲಿ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಐಸಿಸಿ ಕೊವೀಡ್ -19 ನಿಯಮವನ್ನು ಉಲ್ಲಂಘನೆ ಮಾಡುತ್ತಿದ್ದರು.
ಐಪಿಎಲ್ 2020 ಟೂರ್ನಿಯಲ್ಲಿ ಕೆಲವು ಆಟಗಾರರು ಚೆಂಡಿಗೆ ಉಗುಳು ಹಚ್ಚಿ ತಪ್ಪು ಮಾಡಿದ್ದಾರೆ. ಡೆಲ್ಲಿ ಕ್ಯಾಪಿಟಲ್ಸ್‌ ವಿರುದ್ಧದ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಕೂಡ ಇಂಥದ್ದೇ ತಪ್ಪು ಮಾಡುತ್ತಿದ್ದರು. ಆದರೆ ಅಂತಿಮ ಕ್ಷಣದಲ್ಲಿ ಎಚ್ಚೆತ್ತುಕೊಂಡರು. ಕೊಹ್ಲಿ ಅವರ ಈ ನಡೆ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಪಂದ್ಯದಲ್ಲಿ ಕವರ್ಸ್‌ ವಿಭಾಗದಲ್ಲಿ ಫೀಲ್ಡ್‌ ಮಾಡುತ್ತಿದ್ದ ವಿರಾಟ್ ಕೊಹ್ಲಿ, ಡೆಲ್ಲಿ ತಂಡದ ಪೃಥ್ವಿ ಶಾ ಹೊಡೆದ ಬಲವಾದ ಕವರ್‌ ಡ್ರೈವ್‌ ಹೊಡೆತವನ್ನು ಅದ್ಭುತ ರೀತಿಯಲ್ಲಿ ತಡೆದು ನಿಲ್ಲಿಸಿದ ಕೂಡಲೇ ಚೆಂಡಿಗೆ ಉಗುಳು ಹಚ್ಚಲು ಮುಂದಾಗಿದ್ದರು. ಉಗುಳು ಹಚ್ಚುವುದು ನಿಷೇಧಿಸಿರುವುದನ್ನು ಕೂಡಲೇ ಅರಿತು ಮುಗುಳುನಗೆ ಬೀರಿ ತಾವು ಹಚ್ಚಿಲ್ಲ ಎಂಬಂತೆ ಪ್ರತಿಕ್ರಿಯೆ ನೀಡಿದರು.