ತಂಡದಲ್ಲಿ ಧೋನಿ ಇರುವಾಗ ನನಗೇಕೆ ಚಿಂತೆ?: ಸಿಎಸ್‌ಕೆ ನಾಯಕ ರವೀಂದ್ರ ಜಡೇಜಾ

ಚೆನ್ನೈ ಸೂಪರ್​ ಕಿಂಗ್ಸ್​ ತಂಡಕ್ಕೆ ನಾಯಕನಾಗಿ ಆಯ್ಕೆಯಾದ ಬಳಿಕ ರವೀಂದ್ರ ಜಡೇಜಾ ತಮ್ಮ ಜವಾಬ್ದಾರಿಗಳ ಬಗ್ಗೆ ಮಾತನಾಡಿದ್ದಾರೆ.

ನವದೆಹಲಿ:ಚೆನ್ನೈ ಸೂಪರ್​ ಕಿಂಗ್ಸ್​ ತಂಡಕ್ಕೆ ರವೀಂದ್ರ ಜಡೇಜಾ ನೂತನ ನಾಯಕರಾಗಿ ಆಯ್ಕೆಯಾಗಿದ್ದಾರೆ. ಐಪಿಎಲ್​ ಹಾಲಿ ಚಾಂಪಿಯನ್​ ತಂಡದ ಹೊಣೆ ಹೊತ್ತಿರುವ ಜಡ್ಡು, 'ಮಹತ್ತರ ಜವಾಬ್ದಾರಿ ನೀಡಿದ್ದಕ್ಕೆ ಭಾರಿ ಖುಷಿ ಇದೆ. ಮಾಜಿ ನಾಯಕ ಮಹೇಂದ್ರ ಸಿಂಗ್​ ಧೋನಿ ದಾರಿಯಲ್ಲಿ ಮುನ್ನಡೆಯುವೆ' ಎಂದು ಹೇಳಿದ್ದಾರೆ.

ಜಡೇಜಾ ನಾಯಕನಾದ ಬಳಿಕ ಮೊದಲ ಪ್ರತಿಕ್ರಿಯೆ ನೀಡಿರುವ ವಿಡಿಯೋವನ್ನು ಚೆನ್ನೈ ತಂಡ ತನ್ನ ಟ್ವಿಟರ್​ ಖಾತೆಯಲ್ಲಿ ಹಂಚಿಕೊಂಡಿದೆ. ತಮಗೆ ಸಿಕ್ಕ ಈ ಗೌರವ ತುಂಬಾ ದೊಡ್ಡದು. ಧೋನಿ ಭಾಯ್​ ರೂಪಿಸಿರುವ ಪರಂಪರೆ ಮುಂದುವರಿಸಿಕೊಂಡು ಹೋಗಬೇಕಿದೆ. ಈ ಜವಾಬ್ದಾರಿ ಚಿಕ್ಕದಲ್ಲ ಎಂದರು.

ಅಲ್ಲದೇ, ಧೋನಿ ತಂಡದಲ್ಲಿರುವ ಕಾರಣ ಅವರ ಸಹಾಯ ಇದ್ದೇ ಇರುತ್ತದೆ. ಹೀಗಾಗಿ ನಾನು ಹೆಚ್ಚು ಚಿಂತಿಸುವ ಅಗತ್ಯವಿಲ್ಲ. ಏನಾದರೂ ಸಮಸ್ಯೆಯಾದಲ್ಲಿ ಅವರ ಮಾರ್ಗದರ್ಶನ ಸಿಗಲಿದೆ ಎಂದಿದ್ದಾರೆ.

ಭಾರತ ತಂಡದ ಯಶಸ್ವಿ ನಾಯಕ ಮಹೇಂದ್ರ ಸಿಂಗ್​ ಧೋನಿ ಚೆನ್ನೈ ನಾಯಕತ್ವ ತ್ಯಜಿಸಿದ್ದು, ಇದೀಗ 'ಸರ್​ ರವೀಂದ್ರ ಜಡೇಜಾ' ಹೆಗಲಿಗೆ ಜವಾಬ್ದಾರಿ ನೀಡಲಾಗಿದೆ. ಇದೇ 26 ರಂದು ಮುಂಬೈನಲ್ಲಿ ಕೋಲ್ಕತ್ತಾ ವಿರುದ್ಧ ನಡೆಯುವ ಮೊದಲ ಪಂದ್ಯದಲ್ಲಿ ಜಡೇಜಾ ತಂಡ ಮುನ್ನಡೆಸಲಿದ್ದಾರೆ.

ಇದನ್ನೂ ಓದಿ:ಸಿಎಸ್​ಕೆ ನಾಯಕತ್ವ ತೊರೆದ 'ಕ್ಯಾಪ್ಟನ್ ಕೂಲ್' ಧೋನಿ: 'ಸರ್​​.ಜಡೇಜಾ' ಹೆಗಲಿಗೆ ಮಹತ್ವದ ಜವಾಬ್ದಾರಿ!