ಅಬುಧಾಬಿ: ಡೇರಿಲ್ ಮಿಚೆಲ್(72) ಅವರ ಅಜೇಯ ಅರ್ಧಶತಕದ ನೆರವಿನಿಂದ ನ್ಯೂಜಿಲ್ಯಾಂಡ್ ತಂಡ ಸೆಮಿಫೈನಲ್ನಲ್ಲಿ ಇಂಗ್ಲೆಂಡ್ ವಿರುದ್ಧ 5 ವಿಕೆಟ್ಗಳ ಭರ್ಜರಿ ಜಯ ಸಾಧಿಸಿ ಐಸಿಸಿ ಟಿ20 ವಿಶ್ವಕಪ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದೆ.
ಅಬುಧಾಬಿಯಲ್ಲಿ ನಡೆದ ಪಂದ್ಯದಲ್ಲಿ ಇಂಗ್ಲೆಂಡ್ ನೀಡಿದ್ದ 167 ರನ್ಗಳ ಸ್ಪರ್ಧಾತ್ಮಕ ಮೊತ್ತವನ್ನು ಕೇನ್ ವಿಲಿಯಮ್ಸನ್ ಬಳಗ ಇನ್ನು ಒಂದು ಓವರ್ ಉಳಿದಿರುವಂತೆ 5 ವಿಕೆಟ್ ಕಳೆದುಕೊಂಡು ತಲುಪಿತು.
ಆರಂಭಿಕ ಆಘಾತ
ಸ್ಪರ್ಧಾತ್ಮಕ ಗುರಿ ಬೆನ್ನಟ್ಟಿದ ಕಿವೀಸ್ ಪಡೆ ಕೇವಲ 13 ರನ್ಗಳಾಗುವಷ್ಟರಲ್ಲಿ ಮಾರ್ಟಿನ್ ಗಪ್ಟಿಲ್(4) ಮತ್ತು ನಾಯಕ ಕೇನ್ ವಿಲಿಯಮ್ಸನ್(5) ವಿಕೆಟ್ ಕಳೆದುಕೊಂಡು ಆಘಾತಕ್ಕೆ ಒಳಗಾಯಿತು.
ಆದರೆ ಈ ಹಂತದಲ್ಲಿ ಒಂದಾದ ಡೇರಿಲ್ ಮಿಚೆಲ್ ಮತ್ತು ಡೆವೋನ್ ಕಾನ್ವೆ 3ನೇ ವಿಕೆಟ್ಗೆ 82 ರನ್ ಜೊತೆಯಾಟ ನೀಡಿ ತಂಡವನ್ನು ಆಘಾತದಿಂದ ಪಾರು ಮಾಡಿದ್ದಲ್ಲದೆ, ತಂಡವನ್ನು ಸ್ಪರ್ಧೆಗೆ ತಂದರು. 38 ಎಸೆತಗಳಲ್ಲಿ 5 ಬೌಂಡರಿ, ಒಂದು ಸಿಕ್ಸರ್ ಸಹಿತ 46 ರನ್ಗಳಿಸಿದ್ದ ಕಾನ್ವೆ ಲಿವಿಂಗ್ಸ್ಟೋನ್ ಬೌಲಿಂಗ್ನಲ್ಲಿ ಸ್ಟಂಪ್ ಆದರು.
ಕಾನ್ವೆ ನಂತರ ಕ್ರೀಸ್ಗೆ ಬಂದ ಗ್ಲೇನ್ ಫಿಲಿಪ್ಸ್ ಕೇವಲ 2 ರನ್ಗಳಿಸಿ ಲವಿಂಗ್ಸ್ಟೋನ್ ಬೌಲಿಂಗ್ನಲ್ಲಿ ಬಿಲ್ಲಿಂಗ್ಸ್ಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು.
ಪಂದ್ಯದ ಗತಿ ಬದಲಿಸಿದ ಜೇಮ್ಸ್ ನೀಶಮ್
ಫಿಲಿಪ್ಸ್ ವಿಕೆಟ್ ಒಪ್ಪಿಸಿದ ಸಂದರ್ಭದಲ್ಲಿ ನ್ಯೂಜಿಲ್ಯಾಂಡ್ 15.1 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 107 ರನ್ಗಳಿಸಿತ್ತು. ಕಿವೀಸ್ಗೆ ಗೆಲ್ಲಲು 29 ಎಸೆತಗಳಲ್ಲಿ 60 ರನ್ಗಳ ಅಗತ್ಯವಿತ್ತು. ನೀಶಮ್ ಕೇವಲ 11 ಎಸೆತಗಳಲ್ಲಿ 3 ಸಿಕ್ಸರ್ ಮತ್ತು ಒಂದು ಬೌಂಡರಿ ಸಹಿತ 27 ರನ್ ಸಿಡಿಸಿ ಪಂದ್ಯದ ಗತಿಯನ್ನೇ ಬದಲಿಸಿದರು.
ಕೊನೆಯ 2 ಓವರ್ಗಳಲ್ಲಿ ಕಿವೀಸ್ಗೆ ಗೆಲ್ಲಲು 20 ರನ್ಗಳ ಅಗತ್ಯವಿತ್ತು. ಕ್ರಿಸ್ ವೋಕ್ಸ್ ಎಸೆದ 19ನೇ ಓವರ್ನಲ್ಲಿ ಡೇರಿಲ್ ಮಿಚೆಲ್ 2 ಸಿಕ್ಸರ್ ಮತ್ತು 1 ಬೌಂಡರಿ ಸಹಿತ 20 ರನ್ ಸೂರೆಗೈದು ಇನ್ನು ಒಂದು ಓವರ್ ಬಾಕಿ ಉಳಿದಿರುವಂತೆ ಪಂದ್ಯವನ್ನು ಮುಗಿಸಿದರು.
ಇಂಗ್ಲೆಂಡ್ ಪರ ಲಿಯಾಮ್ ಲಿವಿಂಗ್ಸ್ಟೋನ್ 22ಕ್ಕೆ2, ಕ್ರಿಸ್ ವೋಕ್ಸ್ 36ಕ್ಕೆ 2 ಹಾಗೂ ಆದಿಲ್ ರಶೀದ್ 39ಕ್ಕೆ1 ವಿಕೆಟ್ ಪಡೆದರು.
ಇದಕ್ಕು ಮುನ್ನ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ತಂಡ 20 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 166 ರನ್ಗಳಿಸಿತ್ತು. ಜೋಶ್ ಬಟ್ಲರ್ 29, ಜಾನಿ ಬೈರ್ಸ್ಟೋವ್ 13, ಡೇವಿಡ್ ಮಲನ್ 41(30 ಎಸೆತ, 4 ಬೌಂಡರಿ 1ಸಿಕ್ಸರ್), ಮೊಯೀನ್ ಅಲಿ 51(37 ಎಸೆತ, 3 ಬೌಂಡರಿ 2 ಸಿಕ್ಸರ್) ಹಾಗೂ ಲಿವಿಂಗ್ಸ್ಟೋನ್ ಅವರ 17 ರನ್ಗಳಿಸಿ ಮಿಂಚಿದ್ದರು.
ನ್ಯೂಜಿಲ್ಯಾಂಡ್ ಪರ ಸೌಥಿ 24ಕ್ಕೆ1, ಆ್ಯಡಂ ಮಿಲ್ನೆ 31ಕ್ಕೆ1, ಇಶ್ ಸೋಧಿ 32ಕ್ಕೆ1,ಹಾಗೂ ನೀಶಮ್ 18ಕ್ಕೆ 1 ವಿಕೆಟ್ ಪಡೆದಿದ್ದರು.
ಇದೇ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿದ ಕಿವೀಸ್
2007ರ ಚೊಚ್ಚಲ ಮತ್ತು 2016ರ ಟಿ20 ವಿಶ್ವಕಪ್ನಲ್ಲಿ ಮಾತ್ರ ಸೆಮಿಫೈನಲ್ ಪ್ರವೇಶಿಸಲು ಯಶಸ್ವಿಯಾಗಿದ್ದ ನ್ಯೂಜಿಲ್ಯಾಂಡ್ ತಂಡ ಇದೇ ಮೊದಲ ಬಾರಿಗೆ ಫೈನಲ್ ಪ್ರವೇಸಿಸಿದೆ. 2009, 10,12, 14 ರ ಆವೃತ್ತಿಗಳಲ್ಲಿ 2ನೇ ಸುತ್ತಿನಲ್ಲಿ ಸೋತು ಹೊರಬಿದ್ದಿತ್ತು.
