ವಿರಾಟ್ ಕೊಹ್ಲಿ ಹಸಿದಿರುವ ಕ್ರಿಕೆಟರ್​​: ಕೆ ಎಲ್​​​ ರಾಹುಲ್​

ಏಷ್ಯಾ ಕಪ್​ ಪಂದ್ಯಾವಳಿಯಲ್ಲಿ ನಾಳೆ ನಡೆಯುವ ಪಾಕಿಸ್ತಾನ ಮತ್ತು ಭಾರತದ ಪಂದ್ಯ ಕುತೂಹಲದ ಕಣವಾಗಿದೆ. ಹಿಂದಿನ ತಪ್ಪು ತಿದ್ದಿಕೊಂಡು ಕಣಕ್ಕೆ ಇಳಿಯಲಿದ್ದೇವೆ ಎಂದು ಭಾರತದ ಕ್ರಿಕೆಟರ್​​ ಕೆ.ಎಲ್​ ರಾಹುಲ್​ ಹೇಳಿದರು.

ದುಬೈ:ರನ್​ಮಷಿನ್​ ವಿರಾಟ್​ ಕೊಹ್ಲಿ ಈಗ ರನ್​ ಮಾಡಲು ತಡವರಿಸುತ್ತಿರಬಹುದು. ಆದರೆ, ಅವರು ಕ್ರಿಕೆಟ್​ಗೆ ನೀಡಿದ ಕೊಡುಗೆ ಎಂದಿಗೂ ಸ್ಮರಣೀಯ. ಏಷ್ಯಾ ಕಪ್​ನಲ್ಲಿ ಅವರು ಈ ಕೊರತೆಯನ್ನು ಮೀರಲಿದ್ದಾರೆ ಎಂದು ಭಾರತ ತಂಡದ ಆರಂಭಿಕ ಆಟಗಾರ ಕೆ.ಎಲ್​ ರಾಹುಲ್​​ ಆಶಾಭಾವನೆ ವ್ಯಕ್ತಪಡಿಸಿದರು.

ಏಷ್ಯಾ ಕಪ್​ ಪೂರ್ವ ತಯಾರಿಯ ವೇಳೆ ಮಾಧ್ಯಮಗಳ ಜೊತೆ ಮಾತನಾಡಿದ ಅವರು, ವಿರಾಟ್​ ಇನ್ನೂ ಹಸಿದಿರುವ ಕ್ರಿಕೆಟರ್​. ಅವರ ಪ್ರದರ್ಶನ ಇತ್ತೀಚೆಗೆ ಕುಗ್ಗಿದೆ. ಮುಂದೆ ಅವರು ಮತ್ತೆ ಅಬ್ಬರಿಸಲಿದ್ದಾರೆ. ಏಷ್ಯಾ ಕಪ್​ ಅದಕ್ಕೆ ವೇದಿಕೆ ನೀಡಲಿದೆ ಎಂದು ರಾಹುಲ್​ ಹೇಳಿದರು.

ಮೊದಲ ಪಂದ್ಯವೇ ಪಾಕಿಸ್ತಾನ ವಿರುದ್ಧ ನಡೆಯಲಿದೆ. ಇದಕ್ಕಾಗಿ ನಾವು ಕಾತುರದಿಂದ ಕಾಯುತ್ತಿದ್ದೇವೆ. ಉಭಯ ರಾಷ್ಟ್ರಗಳ ಮಧ್ಯೆ ನಡೆಯುವ ಪಂದ್ಯ ಎಂದಿಗೂ ಕೌತುಕ. ಅದು ಅಭಿಮಾನಿಗಳಲ್ಲದೇ ನಮ್ಮಲ್ಲೂ ಇದೆ. ರೋಚಕ ಪಂದ್ಯಕ್ಕೆ ಎದುರು ನೋಡುತ್ತಿದ್ದೇವೆ ಎಂದರು.

ಪಾಕ್​ ಮತ್ತು ಭಾರತ ನಡುವಿನ ಪಂದ್ಯಕ್ಕೆ ಇತಿಹಾಸವಿದೆ. ಈ ಪಂದ್ಯ ತೀವ್ರತೆಯಿಂದ ಕೂಡಿರುತ್ತದೆ. ಈ ಹಿಂದಿನ ತಪ್ಪು ತಿದ್ದಿಕೊಂಡು ಹೊಸ ಹುರುಪಿನೊಂದಿಗೆ ಮೈದಾನಕ್ಕಿಳಿಯಲಿದ್ದೇವೆ ಎಂದು ರಾಹುಲ್​ ಹೇಳಿದರು. ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ನಡೆದ ಟಿ - 20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ವಿರುದ್ಧ ಭಾರತ 10 ವಿಕೆಟ್‌ಗಳಿಂದ ಹೀನಾಯ ಸೋಲು ಅನುಭವಿಸಿತ್ತು. ಅಲ್ಲದೇ, ಇದು ವಿಶ್ವಕಪ್​ ಇತಿಹಾಸದಲ್ಲೇ ಮೊದಲ ಪರಾಜಯವಾಗಿತ್ತು.

ಓದಿ:ಭಾರತ ಫುಟ್ಬಾಲ್​ ಸಂಸ್ಥೆ ಮೇಲಿನ ನಿಷೇಧ ತೆರವು.. ನಿಗದಿಯಂತೆ ಭಾರತದಲ್ಲೇ ಮಹಿಳಾ ವಿಶ್ವಕಪ್​