ಮಯಾಂಕ್​ ಮುಂದೆ ಮಂಕಾದ ಮುಂಬೈ​.. ‘ಶಿಖರ’ದೆತ್ತರ ಗುರಿ ಮುಟ್ಟದೇ ಸತತ 5ನೇ ಸೋಲು ಕಂಡ ರೋಹಿತ್​ ಬಳಗ

ನಾಯಕ ಮಯಾಂಕ್ ಅಗರ್ವಾಲ್ ಮತ್ತು ಶಿಖರ್​ ಧವನ್​ ಅವರ ಅಬ್ಬರದ ಅರ್ಧಶತಕಗಳ ನೆರವಿನಿಂದ ಪಂಜಾಬ್ ಕಿಂಗ್ಸ್ ತಂಡ 198 ರನ್​ಗಳಿಸಿತ್ತು. ಎದುರಾಳಿ ನೀಡಿದ ಗುರಿಯನ್ನು ಇನ್ನೇನು ತಲುಪಬೇಕೆನ್ನುವಷ್ಟರಲ್ಲಿ ಮುಂಬೈ ಇಂಡಿಯನ್ಸ್​ ತಂಡ ಎಡವಿ ಸೋಲೊಪ್ಪಿಕೊಂಡಿತು.

ಪುಣೆ:ಪಂಜಾಬ್ ಕಿಂಗ್ಸ್ ತಂಡದ ಸ್ಟೈಲೀಶ್​ ಎಡಗೈ ಆಟಗಾರ ಶಿಖರ್​ ಧವನ್ 70 ರನ್​ ಮತ್ತು ಮಯಾಂಕ್ ಅಗರ್ವಾಲ್ 52 ರನ್​ ಹಾಗೂ ಜಿತೇಶ್ ಶರ್ಮಾರ 30 ರನ್​ಗಳ ನೆರವಿನಿಂದ ಎದುರಾಳಿ ತಂಡಕ್ಕೆ 199ರನ್​ಗಳ ಸವಾಲಿನ ಗುರಿ ನೀಡಿತ್ತು. ಈ ಮೊತ್ತವನ್ನು ಬೆನ್ನತ್ತಿದ್ದ ಮುಂಬೈ ಇಂಡಿಯನ್ಸ್​ ಕೊನೆಯ ಓವರ್​ನಲ್ಲಿ ಎಡವಿ ಸೋಲು ಕಂಡಿತು. ಮುಂಬೈ ಇಂಡಿಯನ್ಸ್​​ಗೆ ಇದು ಸತತ ಐದನೇ ಸೋಲಾಗಿದೆ.

ಪಂಜಾಬ್​ ಇನ್ನಿಂಗ್ಸ್​:ಟಾಸ್​ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಪಂಜಾಬ್ ಕಿಂಗ್ಸ್ ತಂಡದ ಅರಂಭಿಕರಾಗಿ ಕಣಕ್ಕಿಳಿದಿದ್ದ ಮಯಾಂಕ್ ಅಗರ್ವಾಲ್​ ಮೊದಲ ವಿಕೆಟ್​ಗೆ ಅನುಭವಿ ಶಿಖರ್ ಧವನ್​ ಜೊತೆಯಾಗಿ 97 ರನ್​ಗಳನ್ನು ಕಲೆ ಹಾಕಿದ್ದರು. ಕಳೆದ ಎರಡು ಪಂದ್ಯಗಳಲ್ಲಿ ವೈಫಲ್ಯ ಅನುಭವಿಸಿದ್ದ ಮಯಾಂಕ್ ಈ ಪಂದ್ಯದಲ್ಲಿ ಆರಂಭದಿಂದಲೇ ಅಬ್ಬರಿಸಿದ್ದರು. ಅವರು 32 ಎಸೆತಗಳಲ್ಲಿ 6 ಬೌಂಡರಿ ಮತ್ತು 2 ಸಿಕ್ಸರ್​ಗಳ ಸಹಿತ 52 ರನ್​ಗಳಿಸಿ ವಿಕೆಟ್ ಒಪ್ಪಿಸಿದರು. ಇವರ ನಂತರ ಬಂದ ಟಿ20 ಸ್ಪೆಷಲಿಸ್ಟ್​ಗಳಾದ ಜಾನಿ ಬೈರ್​ಸ್ಟೋವ್​ 12 ರನ್​ ಮತ್ತು ಲಿಯಾಮ್ ಲಿವಿಂಗ್​ಸ್ಟೋನ್ 2 ರನ್​ ಕಲೆ ಹಾಕುವ ಮೂಲಕ ಬ್ಯಾಟಿಂಗ್​ನಲ್ಲಿ ವಿಫಲರಾದರು.

ಓದಿ:4,6,6,6,6...! 'ಬೇಬಿ ಎಬಿಡಿ' ಸಿಡಿಲಬ್ಬರದ ಬ್ಯಾಟಿಂಗ್‌

ಆದರೆ ದಿಢೀರ್ 3 ವಿಕೆಟ್ ಕಳೆದುಕೊಂಡರು ಕೆಚ್ಚೆದೆಯ ಬ್ಯಾಟಿಂಗ್ ಪ್ರದರ್ಶನ ತೋರಿದ ಶಿಖರ್​ ಧವನ್​ 50 ಎಸೆತಗಳಲ್ಲಿ 5 ಬೌಂಡರಿ ಮತ್ತು 3 ಸಿಕ್ಸರ್​ಗಳ ಸಹಿತ 70 ರನ್​ಗಳಿಸಿ ತಂಡದ ಮೊತ್ತವನ್ನು 150ರ ಗಡಿ ದಾಟಿಸಿ ಥಂಪಿ ಬೌಲಿಂಗ್​ನಲ್ಲಿ ವಿಕೆಟ್ ಒಪ್ಪಿಸಿದರು. ಯುವ ವಿಕೆಟ್ ಕೀಪರ್ ಜಿತೇಶ್ ಶರ್ಮಾ ಎಂದಿನಂತೆ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಕೇವಲ 15 ಎಸೆತಗಳಲ್ಲಿ ತಲಾ 2 ಬೌಂಡರಿ ಮತ್ತು ಸಿಕ್ಸರ್​ಗಳ ಸಹಿತ ಅಜೇಯ 30 ರನ್​ಗಳಿಸಿದರು. ಇವರಿಗೆ ಸಾಥ್ ನೀಡಿದ ಶಾರುಕ್ 6 ಎಸೆತಗಳಲ್ಲಿ 2 ಸಿಕ್ಸರ್​ಗಳ ಸಹಿತ 15 ರನ್​ ಗಳಿಸಿ ತಂಡದ ಮೊತ್ತವನ್ನು 200ರ ಸನಿಹಕ್ಕೆ ತಂದರು.

ಒಟ್ನಲ್ಲಿ ಪಂಜಾಬ್​ ತಂಡ ನಿಗದಿತ 20 ಓವರ್​ಗಳಿಗೆ 5 ವಿಕೆಟ್ ಕಳೆದುಕೊಂಡು 198ರನ್​ಗಳಿಸಿತ್ತು. ಮುಂಬೈ ಇಂಡಿಯನ್ಸ್ ಪರ ಬೇಸಿಲ್ ಥಂಪಿ 47ಕ್ಕೆ 2 ವಿಕೆಟ್​, ಜಸ್ಪ್ರೀತ್ ಬುಮ್ರಾ 28ಕ್ಕೆ 1 ವಿಕೆಟ್​, ಮುರುಗನ್ ಅಶ್ವಿನ್ 34ಕ್ಕೆ 1 ವಿಕೆಟ್​, ಜಯದೇವ್ ಉನಾದ್ಕಟ್ 44ಕ್ಕೆ 1 ವಿಕೆಟ್ ಪಡೆದರು.

ಮುಂಬೈ ಇಂಡಿಯನ್ಸ್ ಇನ್ನಿಂಗ್ಸ್​: ಬೃಹತ್​ ಮೊತ್ತದ ಗುರಿಯನ್ನು ಬೆನ್ನತ್ತಿದ್ದ ಮುಂಬೈ ಇಂಡಿಯನ್ಸ್​ ತಂಡ ಪವರ್​ಪ್ಲೇ ಒಳಗೆ ಆರಂಭಿಕರನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ನಾಯಕ ರೋಹಿತ್ ಶರ್ಮಾ 17 ಎಸೆತಕ್ಕೆ 22 ರನ್​ ಗಳಿಸಿದ್ರೆ, ಇಶಾನ್ ಕಿಶನ್ 6 ಎಸೆತಗಳಲ್ಲಿ ಕೇವಲ 3 ರನ್​ಗಳಿಸಿ ಪೆವಿಲಿಯನ್​ ಹಾದಿ ಹಿಡಿದರು.

ಇಬ್ಬರು ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಮುಂಬೈ ತಂಡಕ್ಕೆ ಡೆವಾಲ್ಡ್ ಬ್ರೆವಿಸ್ ಮತ್ತು ತಿಲಕ್ ವರ್ಮಾ ಆಸರೆಯಾದರು. ಇಬ್ಬರು ತಂಡದ ಮೊತ್ತವನ್ನು ನೂರರ ಗಡಿ ದಾಟಿಸುವಲ್ಲಿ ಯಶಸ್ಸಾದರು. ಒಡಿಯಾನ್​ ಸ್ಮಿತ್​ ಎಸೆತದಲ್ಲಿ 25 ಬಾಲ್​ಗಳನ್ನು ಎದುರಿಸಿ 49 ರನ್​ಗಳನ್ನು ಕಲೆ ಹಾಕಿದ್ದ ಡೆವಾಲ್ಡ್ ಬ್ರೆವಿಸ್ ಔಟಾಗುವ ಮೂಲಕ ಅರ್ಧಶತಕದಿಂದ ವಂಚಿತರಾದರು. 20 ಎಸೆತಗಳಿಗೆ 30 ರನ್​ ಕಲೆಹಾಕಿ ಭರ್ಜರಿ ಬ್ಯಾಟಿಂಗ್​ ಬೀಸುತ್ತಿದ್ದ ತಿಲಕ್​ ವರ್ಮಾ ಸಹ ಹೆಚ್ಚು ಕ್ರೀಸ್​ನಲ್ಲಿ ನಿಲ್ಲದೇ ಪೆವಿಲಿಯನ್​ ಹಾದಿ ತುಳಿದರು.

ಓದಿ:ಡೆಲ್ಲಿ ಕ್ಯಾಪಿಟಲ್ಸ್​ಗೆ ಹಿನ್ನಡೆ: ಸ್ಟಾರ್​ ಆಲ್​ರೌಂಡರ್​ 3-4 ಪಂದ್ಯಗಳಿಂದ ಹೊರಕ್ಕೆ

ಸೂರ್ಯಕುಮಾರ್​ ಯಾದವ್​ ಜೊತೆಗೂಡಿದ ಕೀರನ್ ಪೊಲಾರ್ಡ್ ಸಹಿತ 10 ರನ್​ಗಳಿಸಿ ಔಟಾದರು. ತಂಡಕ್ಕೆ ಗೆಲುವಿನ ಆಸೆ ಮೂಡಿಸಿದ್ದ ಸೂರ್ಯಕುಮಾರ್​ ಯಾದವ್​ 43 ರನ್​ಗಳನ್ನು ಕಲೆ ಹಾಕಿ ರಬಾಡಗೆ ವಿಕೆಟ್​ ಒಪ್ಪಿಸಿದರು. ಬಳಿಕ ಬಂದ ಆಟಗಾರರು ರನ್​ ಕಲೆಹಾಕಲು ಸಾಧ್ಯವಾಗಲಿಲ್ಲ.

ನಿಗದಿತ 20 ಓವರ್​ಗಳಲ್ಲಿ 9 ವಿಕೆಟ್​ಗಳ ನಷ್ಟಕ್ಕೆ 186 ರನ್​ಗಳನ್ನ ಕಲೆ ಹಾಕುವ ಮೂಲಕ ಗುರಿ ಮುಟ್ಟದೇ ಮುಂಬೈ ಇಂಡಿಯನ್ಸ್​ ತಂಡ ಸೋಲು ಕಂಡಿತು. ಇದರಿಂದಾಗಿ ರೋಹಿತ್​ ಬಳಗಕ್ಕೆ ಸತತ ಐದನೇ ಸೋಲು ಇದಾಗಿದೆ. ಪಂಜಾಬ್ ಕಿಂಗ್ಸ್ ಪರ ಒಡಿಯಾನ್ ಸ್ಮಿತ್ 4 ವಿಕೆಟ್​ ಪಡೆದು ಮಿಂಚಿದ್ರೆ, ಕಗಿಸೊ ರಬಾಡ 2 ವಿಕೆಟ್​ ಮತ್ತು ವೈಭವ್​ ಆರೋರಾ 1 ವಿಕೆಟ್​ ಪಡೆದು ತಂಡದ ಗೆಲುವಿಗೆ ಕಾರಣರಾದರು.