WATCH: ಅಫ್ಘಾನಿಸ್ತಾನದ ಪ್ರತಿಯೊಬ್ಬರೂ ಭಾರತದ ಜೊತೆಗಿದ್ದಾರೆ- ಕ್ರಿಕೆಟಿಗ ರಶೀದ್​​ ಖಾನ್

ಕೋವಿಡ್‌ ಬಿಕ್ಕಟ್ಟಿನ ಕಠಿಣ ಸಂದರ್ಭದಲ್ಲಿ ಅಫ್ಘಾನಿಸ್ತಾನದ ಪ್ರತಿಯೊಬ್ಬರೂ ಭಾರತದ ಜೊತೆಗಿದ್ದಾರೆ ಎನ್ನುವ ವಿಡಿಯೋ ಸಂದೇಶವನ್ನು ಅಫ್ಘಾನಿಸ್ತಾನ ಕ್ರಿಕೆಟಿಗ ರಶೀದ್‌ ಖಾನ್‌ ಪೋಸ್ಟ್‌ ಮಾಡಿದ್ದಾರೆ. ಈ ಮೂಲಕ ಕೋವಿಡ್ ವಿರುದ್ಧ ಹೋರಾಡುತ್ತಿರುವ ಭಾರತದ ಜನರಿಗೆ ಧೈರ್ಯ ತುಂಬುವ ಕೆಲಸ ಮಾಡಿದ್ದಾರೆ.

ಹೈದರಾಬಾದ್: ಭಾರತದಲ್ಲಿ ಕೊರೊನಾ ಸಾವು-ನೋವು ತೀವ್ರ ಸ್ವರೂಪ ಪಡೆದುಕೊಳ್ತಿದೆ. ಮಹಾಮಾರಿಯ ನಿರ್ವಹಣೆಗೆ ಭಾರತ ಅವಿರತವಾಗಿ ಹೋರಾಡುತ್ತಿದ್ದು, ಕ್ರಿಕೆಟ್​​ ಆಟಗಾರರು ಕೂಡಾ ಸಾಥ್​ ನೀಡುತ್ತಿದ್ದಾರೆ. ಈಗಾಗಲೇ ಆಸ್ಟ್ರೇಲಿಯಾ ಕ್ರಿಕೆಟಿಗ ಪ್ಯಾಟ್ ಕಮ್ಮಿನ್ಸ್, ಬ್ರೆಟ್ ಲೀ ಮತ್ತು ಕ್ರಿಕೆಟ್‌ ದಂತಕತೆ ಸಚಿನ್ ತೆಂಡೂಲ್ಕರ್ ಧನಸಹಾಯ ಮಾಡಿದ್ದಾರೆ.

ಇದೀಗ ಅಫ್ಘಾನ್​ ಕ್ರಿಕೆಟರ್​ ರಶೀದ್ ಖಾನ್ ತಮ್ಮ ಟ್ವಿಟರ್​ ಖಾತೆಯಲ್ಲಿ ಮನಮುಟ್ಟುವ ವಿಶೇಷವಾದ ವಿಡಿಯೋ​ ಪೋಸ್ಟ್‌ ಮಾಡಿ ಭಾರತೀಯರಲ್ಲಿ ಆತ್ಮಸ್ಥೈರ್ಯ ತುಂಬಿದ್ದಾರೆ.

'ಅಫ್ಘಾನಿಸ್ತಾನದ ಪ್ರತಿಯೊಬ್ಬರೂ ಈ ಕಠಿಣ ಸಮಯದಲ್ಲಿ ನಿಮ್ಮೊಂದಿಗೆ ಇರುತ್ತಾರೆ. ದಯವಿಟ್ಟು ಎಲ್ಲರೂ ಸುರಕ್ಷಿತವಾಗಿರಿ, ಮನೆಯಲ್ಲಿಯೇ ಉಳಿಯಿರಿ, ಸಾಮಾಜಿಕ ದೂರವನ್ನು ಕಾಪಾಡಿಕೊಳ್ಳಿ ಮತ್ತು ಮಾಸ್ಕ್ ಹಾಕಿ' ಎಂದು ಟ್ವೀಟ್ ಮೂಲಕ ಮನವಿ ಮಾಡಿದ್ದಾರೆ.