ನವದೆಹಲಿ: ಭಾರತದ ಕ್ರಿಕೆಟರ್ಗಳ ಪೈಕಿ ಮಹೇಂದ್ರ ಸಿಂಗ್ ಧೋನಿಗೆ ಅಪಾರ ಅಭಿಮಾನಿಗಳಿರುವುದು ತಿಳಿದ ವಿಚಾರವೇ. ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದ ಧೋನಿ ಆಟವನ್ನು ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಮಾತ್ರ ಆನಂದಿಸಲು ಸಾಧ್ಯವಾಗಿದೆ. 2023ರ ಐಪಿಎಲ್ ಮಾಹಿಯ ಕೊನೆಯ ಆವೃತ್ತಿ ಎಂದೇ ಸುದ್ದಿಯಾಗಿತ್ತು. ಆದರೆ ಧೋನಿ ತಮ್ಮ ಫಿಟ್ನೆಸ್ ಜೊತೆಗೆ ರಾಜಿ ಮಾಡಿಕೊಳ್ಳದೇ ಮುಂದಿನ ಬಾರಿಯೂ ಆಡುವ ಬಯಕೆಯಿದೆ ಎಂದು ಪ್ರಶಸ್ತಿ ಗೆದ್ದ ನಂತರ ಹೇಳಿದ್ದರು. ಇದೀಗ 2024 ಐಪಿಎಲ್ನಲ್ಲಿ ಆಡ್ತಾರಾ ಎಂಬ ಪ್ರಶ್ನೆ ಎಲ್ಲರಲ್ಲೂ ಮನೆಮಾಡಿದೆ.
ಐಪಿಎಲ್ ನೇರಪ್ರಸಾರದ ವೇಳೆ ಧೋನಿ ಬ್ಯಾಟಿಂಗ್ಗಿಳಿದಾಗ ದಾಖಲೆ ಮಟ್ಟದಲ್ಲಿ ಪಂದ್ಯದ ವೀಕ್ಷಣೆ ಆಗುತ್ತಿತ್ತು. 2023ರ ಆವೃತ್ತಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಆಡಿದ ಎಲ್ಲಾ ಮೈದಾನದಲ್ಲಿ ಎಲ್ಲೋ ಜರ್ಸಿಯೇ ಕಂಗೊಳಿಸುತ್ತಿತ್ತು. ಸಾಮಾನ್ಯವಾಗಿ ಪಂದ್ಯ ಮುಗಿದ ಕೂಡಲೇ ಅಭಿಮಾನಿಗಳು ಮೈದಾನದಿಂದ ಹೊರ ಹೋಗುತ್ತಿದ್ದರು. ಆದರೆ ಕಳೆದ ಬಾರಿ ಮಾಹಿಯ ಮಾತುಗಳನ್ನು ಕೇಳದೇ ಪ್ರೇಕ್ಷಕರು ಕ್ರೀಡಾಂಗಣ ತೊರೆಯುತ್ತಿರಲಿಲ್ಲ.
ಇಷ್ಟು ಅಭಿಮಾನ ಕಂಡಿರುವ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ 2023ರ ಐಪಿಎಲ್ನಲ್ಲಿ ಮಂಡಿ ನೋವಿನ ನಡುವೆಯೂ ಆಡಿದ್ದರು. ಐಪಿಎಲ್ ಮುಗಿದ ನಂತರ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಇತ್ತೀಚೆಗೆ ಬೆಂಗಳೂರಿನಲ್ಲಿ ಖಾಸಗಿ ಕಾರ್ಯಕ್ರಮ ಒಂದರಲ್ಲಿ ಭಾಗವಹಿಸಿದ ಅವರು, ಶಸ್ತ್ರಚಿಕಿತ್ಸೆಯ ಬಳಿಕ ಚೇತರಿಸಿಕೊಳ್ಳುತ್ತಿದ್ದೇನೆ. ಕೆಲ ತಿಂಗಳು ಕಳೆದ ನಂತರ ಹೆಚ್ಚಿನ ಶ್ರಮದ ಕೆಲಸಗಳನ್ನು ಮಾಡುವಂತೆ ವೈದ್ಯರು ಸೂಚಿಸಿದ್ದಾರೆ ಎಂದಿದ್ದರು.