ಜೇಸನ್ ರಾಯ್​ ಸ್ಥಾನಕ್ಕೆ ಗುಜರಾತ್ ಟೈಟನ್ಸ್ ಸೇರಲಿರುವ ಅಫ್ಘಾನಿಸ್ತಾನ್ ಸ್ಫೋಟಕ ಬ್ಯಾಟರ್​

ಗುಜರಾತ್​ ಟೈಟನ್ಸ್​ ಇನ್ನೂ ಅಧಿಕೃತವಾಗಿ ಗುರ್ಬಜ್​ ಸೇರ್ಪಡೆಯನ್ನು ಘೋಷಿಸಿಲ್ಲ. ಆದರೆ ತಂಡದಲ್ಲಿರುವ ಅಫ್ಘಾನಿಸ್ತಾನದ ಪ್ರಧಾನ ಬೌಲರ್ ರಶೀದ್​ ಖಾನ್​ ಅವರಿಂದ ಯುವ ಬ್ಯಾಟರ್​ ಬಗ್ಗೆ ಮಹತ್ವದ ಮಾಹಿತಿ ಪಡೆದುಕೊಂಡಿದೆ ಎಂದು ತಿಳಿದುಬಂದಿದೆ.

ಬೆಂಗಳೂರು:2022 ಐಪಿಎಲ್​ ಆರಂಭಕ್ಕೆ ಕೆಲವೇ ದಿನಗಳಿರುವಾಗಲೇ ಗುಜರಾತ್​ ಲಯನ್ಸ್​ ತಂಡದಿಂದ ಹೊರಬಂದಿರುವ ಇಂಗ್ಲೆಂಡ್​ನ ಆರಂಭಿಕ ಬ್ಯಾಟರ್​ ಜೇಸನ್ ರಾಯ್​ ಬದಲೀ ಆಟಗಾರನಾಗಿ ಅಫ್ಘಾನಿಸ್ತಾನದ ಯುವ ವಿಕೆಟ್ ಕೀಪರ್ ರೆಹ್ಮಾನುಲ್ಲಾ ಗುರ್ಬಜ್​ ತಂಡ ಸೇರಲು ಸಜ್ಜಾಗಿದ್ದಾರೆ.

10 ತಂಡಗಳ ಇಂಡಿಯನ್ ಪ್ರೀಮಿಯರ್ ಲೀಗ್ ಮಾರ್ಚ್​ 26ರಿಂದ ಆರಂಭವಾಗಲಿದೆ. ಆದರೆ ಟೂರ್ನಿ ಆರಂಭಕ್ಕೂ ಮುನ್ನ ಜೇಸನ್​ ರಾಯ್​ ಬಯೋಬಬಲ್​ ಆಯಾಸದ ಕಾರಣ ನೀಡಿ ಟೂರ್ನಿಯಿಂದ ಹಿಂದೆ ಸರಿಯಲು ನಿರ್ಧರಿಸಿದ್ದರು. ಆರಂಭಿಕ ಸ್ಥಾನಕ್ಕೆ ರಾಯ್​ರನ್ನು​ ನೆಚ್ಚಿಕೊಂಡಿದ್ದ ಗುಜರಾತ್ ಫ್ರಾಂಚೈಸಿ ಇದೀಗ ಅಫ್ಘಾನ್ ಯುವ ಪ್ರತಿಭೆಗೆ ಮಣೆ ಹಾಕಲು ನಿರ್ಧರಿಸಿದೆ ಎಂದು ವರದಿಗಳಿಂದ ತಿಳಿದುಬಂದಿದೆ.

20 ವರ್ಷದ ಸ್ಫೋಟಕ ಬ್ಯಾಟರ್ 150+ ಸ್ಟ್ರೈಕ್​ರೇಟ್​ನಲ್ಲಿ ರನ್ ​ಗಳಿಸಿರುವುದಲ್ಲದೆ, ಅದ್ಭುತ ವಿಕೆಟ್ ಕೀಪರ್ ಆಗಿಯೂ ತಂಡಕ್ಕೆ ನೆರವಾಗಬಲ್ಲರು. ರಾಷ್ಟ್ರೀಯ ತಂಡ ಖಾಯಂ ಬ್ಯಾಟರ್ ಆಗಿರುವ ಗುರ್ಬಜ್‌ ಅಫ್ಘಾನಿಸ್ತಾನ ತಂಡದ ಪರ 9 ಏಕದಿನ ಹಾಗೂ 12 ಟಿ20 ಪಂದ್ಯಗಳನ್ನಾಡಿದ್ದು, ಕ್ರಮವಾಗಿ 428 ಮತ್ತು 534 ರನ್​ಗಳಿಸಿದ್ದಾರೆ. ಇನ್ನು ಟಿ20 ಕ್ರಿಕೆಟ್​ನಲ್ಲಿ 69 ಪಂದ್ಯಗಳಿಂದ 10 ಅರ್ಧಶತಕ ಸಹಿತ 1620 ರನ್​ ಸಿಡಿಸಿದ್ದಾರೆ.

ಗುಜರಾತ್​ ಟೈಟನ್ಸ್​ ಇನ್ನೂ ಅಧಿಕೃತವಾಗಿ ಗುರ್ಬಜ್​ ಸೇರ್ಪಡೆಯನ್ನು ಘೋಷಿಸಿಲ್ಲ. ಆದರೆ ತಂಡದಲ್ಲಿರುವ ಅಫ್ಘಾನಿಸ್ತಾನದ ಪ್ರಧಾನ ಬೌಲರ್ ರಶೀದ್​ ಖಾನ್​ ಅವರಿಂದ ಯುವ ಬ್ಯಾಟರ್​ ಬಗ್ಗೆ ಮಹತ್ವದ ಮಾಹಿತಿ ಪಡೆದುಕೊಂಡಿದೆ ಎಂದು ತಿಳಿದುಬಂದಿದೆ. ಇನ್ನು ಅವರು ಈಗಾಗಲೇ ಫ್ರಾಂಚೈಸಿ ಜೊತೆಗೆ ಒಪ್ಪಂದಕ್ಕೆ ಸಹಿ ಮಾಡಿದ್ದಾರೆ ಎಂದು ಕೆಲವು ಮಾಜಿ ಅಫ್ಘಾನ್ ಕ್ರಿಕೆಟಿಗರು ಗುರ್ಬಜ್​ಗೆ ಶುಭಕೋರಿದ್ದಾರೆ.

ಒಂದು ವೇಳೆ ರೆಹಮನುಲ್ಲಾ ಗುರ್ಬಾಜ್ ಗುಜರಾತ್ ಟೈಟನ್ಸ್ ತಂಡ ಸೇರ್ಪಡೆಯಾದರೆ ವಿಕೆಟ್‌ ಕೀಪಿಂಗ್ ಸಮಸ್ಯೆ ಕೂಡ ಬಗೆಹರಿಯಲಿದೆ. ಏಕೆಂದರೆ ಹರಾಜಿನಲ್ಲಿ ಫ್ರಾಂಚೈಸಿ ಆಸ್ಟ್ರೇಲಿಯಾದ ಮ್ಯಾಥ್ಯೂ ವೇಡ್ ಮತ್ತು ವೃದ್ದಿಮಾನ್ ಸಹಾರನ್ನು ವಿಕೆಟ್ ಕೀಪರ್ ಸ್ಥಾನಕ್ಕೆ ಖರೀದಿಸಿದೆ. ಪ್ರಧಾನ ಆಯ್ಕೆಯಾಗಿರುವ ವೇಡ್​ ಪಾಕಿಸ್ತಾನ ಪ್ರವಾಸದಲ್ಲಿರುವ ಕಾರಣ ಕೆಲವು ಲೀಗ್ ಪಂದ್ಯಗಳಿಗೆ ಅಲಭ್ಯರಾಗಲಿದ್ದಾರೆ. ಹಾಗಾಗಿ ಗುರ್ಬಜ್ ಸೇರ್ಪಡೆ ತಂಡಕ್ಕೆ ಎರಡೂ ರೀತಿಯಲ್ಲಿ ಅನುಕೂಲ ತಂದುಕೊಡಲಿದೆ.

ಇದನ್ನೂ ಓದಿ:ಐಪಿಎಲ್ ಫ್ರಾಂಚೈಸಿಗಳಿಗೆ ಶಾಕ್ ಕೊಟ್ಟ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿ