ಟೆಸ್ಟ್​ ಕ್ರಿಕೆಟ್​ ಉಳಿಸಬೇಕೆನ್ನುವವರು ಕೊಹ್ಲಿಯನ್ನ ತಮ್ಮ ವಕ್ತಾರರನ್ನಾಗಿ ನೇಮಿಸಲಿ : ಇಯಾನ್ ಚಾಪೆಲ್

ಕ್ರಿಕೆಟ್​ನಲ್ಲಿ ಆಟಗಾರರ ತಳಮಟ್ಟದ ರಚನೆಯೇ ದೋಷಪೂರಿತವಾಗಿದೆ. ಆದ್ದರಿಂದಲೇ ಕ್ರಿಕೆಟಿಗರ ಕೌಶಲ್ಯ ಮತ್ತು ಗುಣಮಟ್ಟದಲ್ಲಿ ಕುಸಿತ ಕಂಡು ಬರುತ್ತಿದೆ. ಹಾಗಾಗಿ, ಶಾಲಾ ಬಾಲಕನಿಂದ ಅಂತಾರಾಷ್ಟ್ರೀಯ ಮಟ್ಟದ ಕ್ರಿಕೆಟಿಗನಾಗುವವರೆಗೆ ಕೌಶಲ್ಯದ ಬೆಳವಣಿಗೆಗಾಗಿ ಸಾಧ್ಯವಾದಷ್ಟು ಹೆಚ್ಚು ಹೆಚ್ಚು ದೀರ್ಘ ಮಾದರಿಯ ಪಂದ್ಯಗಳನ್ನು ಆಡಬೇಕು..

ನವದೆಹಲಿ :ಟೆಸ್ಟ್​ ಕ್ರಿಕೆಟ್​ ಭವಿಷ್ಯವನ್ನು ಉಳಿಸುವುದಕ್ಕಾಗಿ ವಿಶ್ವದ ಪ್ರಮುಖ ಕ್ರಿಕೆಟಿಗರೆಲ್ಲಾ ಒಂದಾಗಬೇಕು ಮತ್ತು ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರನ್ನು ನಿಯೋಜಿತ ವಕ್ತಾರರನ್ನಾಗಿ ನೇಮಿಸಿಕೊಳ್ಳಬೇಕೆಂದು ಆಸ್ಟ್ರೇಲಿಯಾದ ಮಾಜಿ ನಾಯಕ ಇಯಾನ್ ಚಾಪೆಲ್ ಅವರು ಅಭಿಪ್ರಾಯಪಟ್ಟಿದ್ದಾರೆ.

ಕ್ರಿಕೆಟ್​ ಕಂಡಂತಹ ಅತ್ಯುತ್ತಮ ನಾಯಕರಲ್ಲಿ ಒಬ್ಬರಾದ ಚಾಪೆಲ್ ಪ್ರಕಾರ, ಟೆಸ್ಟ್ ಆಡುವ ರಾಷ್ಟ್ರಗಳು ಉತ್ತಮ ಕ್ರಿಕೆಟಿಗರನ್ನು ಉತ್ಪಾದಿಸುತ್ತಿಲ್ಲ ಎಂದು ನಂಬಿರುವುದಾಗಿ ತಿಳಿಸಿದ್ದಾರೆ. ಕಾರಣವೆಂದರೆ ಪ್ರಸ್ತುತ ಪೀಳಿಗೆಯ ಆಟಗಾರರು ಕ್ರಿಕೆಟ್​ನ ಗುಣಮಟ್ಟವನ್ನು ದುರ್ಬಲಗೊಳಿಸುವ ಚುಟುಕು ಮಾದರಿ ಕ್ರಿಕೆಟ್​ಅನ್ನು ಮಾತ್ರ ಪರಿಗಣನೆಗೆ ತೆಗೆದುಕೊಳ್ಳುತ್ತಿದ್ದಾರೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಟೆಸ್ಟ್ ಕ್ರಿಕೆಟ್​ನಲ್ಲಿ ಸಾಧನೆ ಮಾಡಲು ಅಗತ್ಯವಿರುವ ಕೌಶಲ್ಯಗಳನ್ನು ಚಿಕ್ಕ ವಯಸ್ಸಿನಲ್ಲಿಯೇ ರೂಢಿಸಿಕೊಳ್ಳಬೇಕು. ನಂತರ ಆಟಗಾರರು ಮುಂದಿನ ಗ್ರೇಡ್​ಗಳಿಗೆ ತೇರ್ಗಡೆಯಾಗುತ್ತಿದ್ದಂತೆ ಕಠಿಣ ಸ್ಪರ್ಧೆಗಳಲ್ಲಿ ತಮ್ಮ ಸಾಮರ್ಥ್ಯ ಉತ್ತಮಗೊಳಿಸಿಕೊಳ್ಳಬೇಕು.

ಈ ನಿಟ್ಟಿನಲ್ಲಿ ಸಾಕಷ್ಟು ದೇಶಗಳು ಕ್ರಿಯಾತ್ಮಕ ಅಭಿವೃದ್ಧಿ ವ್ಯವಸ್ಥೆಯನ್ನು ಅಳವಡಿಸಿಕೊಂಡರೆ ಮಾತ್ರ ಇದನ್ನು ಸಾಧಿಸಬಹುದು ಎಂದು ಚಾಪೆಲ್ ಇಎಸ್​ಪಿಎನ್​ಗೆ ಬರೆದಿರುವ ಲೇಖನದಲ್ಲಿ ಉಲ್ಲೇಖಿಸಿದ್ದಾರೆ. ಈ ರೀತಿಯ ಬದಲಾವಣೆ ನಡೆದರೆ ಮಾತ್ರ ಟೆಸ್ಟ್​ ಕ್ರಿಕೆಟ್​ ರೋಮಾಂಚನಕಾರಿಯಾಗಿ ಉಳಿಯಲಿದೆ. ಇಲ್ಲವಾದರೆ ಬಳ್ಳಿಯಲ್ಲಿ ಚಿಗುರುವ ಮೊದಲೇ ಒಣಗಿ ಹೋಗುತ್ತದೆ ಎಂದು ಚಾಪೆಲ್​ ಬರೆದುಕೊಂಡಿದ್ದಾರೆ.

ಕೊಹ್ಲಿಯನ್ನು ವಕ್ತಾರರನ್ನಾಗಿ ನೇಮಿಸಿ :ಟೆಸ್ಟ್​ ಕ್ರಿಕೆಟ್​ ಉಳಿಸಲು ಬಯಸುವ ಆಟಗಾರರು ಕೊಹ್ಲಿ ಉಸ್ತುವಾರಿಯೊಂದಿಗೆ ಸಭೆ ನಡೆಸಬೇಕೆಂದು ಚಾಪೆಲ್ ಅಭಿಪ್ರಾಯಪಟ್ಟಿದ್ದಾರೆ. " ಯಾವುದೇ ಆಟಗಾರ ಆ ಕೌಶಲ್ಯಗಳನ್ನು ತನ್ನಲ್ಲಿ ಅಳವಡಿಸಿಕೊಂಡರೆ, ಆತ ದೀರ್ಘ ಮಾದರಿಯ ಆಟದಲ್ಲಿ ಎಂತಹ ಆಳಕ್ಕಾದರೂ ಇಳಿಯಬಹುದು.

ಇದಕ್ಕೆ ಕೊಹ್ಲಿ ಅತ್ಯುತ್ತಮ ಉದಾಹರಣೆ. ಒಂದು ವೇಳೆ ಆಟಗಾರರು ಟೆಸ್ಟ್​ ಮಾದರಿ ಕ್ರಿಕೆಟ್​ನ ಶಿಖರ ಎಂದು ನಂಬಿದರೆ, ಅವರು ಅದರ ಭವಿಷ್ಯದ ಕುರಿತು ಆಂದೋಲನ ಮಾಡಬೇಕಾಗುತ್ತದೆ. ಅದಕ್ಕೆ ಭಾರತ ತಂಡದ ನಾಯಕ ವಿರಾಟ್​ ಕೊಹ್ಲಿಯನ್ನು ವಕ್ತಾರರನ್ನಾಗಿ ನೇಮಿಸಬೇಕು ಎಂದು ಲೇಖನದಲ್ಲಿ ಪ್ರಸ್ತಾಪಿಸಿದ್ದಾರೆ.

ಕ್ರಿಕೆಟ್​ನಲ್ಲಿ ಆಟಗಾರರ ತಳಮಟ್ಟದ ರಚನೆಯೇ ದೋಷಪೂರಿತವಾಗಿದೆ. ಆದ್ದರಿಂದಲೇ ಕ್ರಿಕೆಟಿಗರ ಕೌಶಲ್ಯ ಮತ್ತು ಗುಣಮಟ್ಟದಲ್ಲಿ ಕುಸಿತ ಕಂಡು ಬರುತ್ತಿದೆ. ಹಾಗಾಗಿ, ಶಾಲಾ ಬಾಲಕನಿಂದ ಅಂತಾರಾಷ್ಟ್ರೀಯ ಮಟ್ಟದ ಕ್ರಿಕೆಟಿಗನಾಗುವವರೆಗೆ ಕೌಶಲ್ಯದ ಬೆಳವಣಿಗೆಗಾಗಿ ಸಾಧ್ಯವಾದಷ್ಟು ಹೆಚ್ಚು ಹೆಚ್ಚು ದೀರ್ಘ ಮಾದರಿಯ ಪಂದ್ಯಗಳನ್ನು ಆಡಬೇಕು ಎಂದು ಆಸೀಸ್​ ಲೆಜೆಂಡ್​ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದನ್ನು ಓದಿ:ಟೆಸ್ಟ್​ನಲ್ಲಿ ಜೋ ರೂಟ್ 9000 ರನ್​.. ಈ ಸಾಧನೆ ಮಾಡಿದ 2ನೇ ಇಂಗ್ಲಿಷ್ ದಾಂಡಿಗ..