ವಿಂಡೀಸ್​ ವಿರುದ್ಧ ‘ವಿರಾಟ’ ರೂಪ... ಭಾರತದ ಮಡಿಲಿಗೆ ಏಕದಿನ ಸರಣಿ!

ವೆಸ್ಟ್​ ಇಂಡೀಸ್​ ವಿರುದ್ಧನ ನಡೆದ ಮೂರನೇ ಮತ್ತು ಕೊನೆಯ ಏಕದಿನ ಪಂದ್ಯದಲ್ಲಿ ಭರ್ಜರಿ ಶತಕ ಬಾರಿಸಿದ ವಿರಾಟ್​ ಕೊಹ್ಲಿ ತಂಡವನ್ನು ಗೆಲುವಿನ ದಡ ಸೇರಿಸುವಲ್ಲಿ ಯಶಸ್ಸಾದರು.

ಫೋರ್ಟ್​ ಆಫ್​ ಸ್ಪೇನ್​: ವಿಂಡೀಸ್​ ವಿರುದ್ಧ ಆರು ವಿಕೆಟ್​ಗಳ ಭರ್ಜರಿ ಜಯ ಗಳಿಸಿರುವ ಭಾರತ ಏಕದಿನ ಸರಣಿ ತನ್ನದಾಗಿಸಿಕೊಂಡಿದೆ.

ಈಗಾಗಲೆ ಟಿ-20 ಸರಣಿಯನ್ನು 3-0ರಲ್ಲಿ ಗೆದ್ದು ಬೀಗಿರುವ ಭಾರತ ತಂಡ ಏಕದಿನ ಸರಣಿಯನ್ನು 2-0 ಮೂಲಕ ತನ್ನದಾಗಿಸಿಕೊಂಡಿದೆ. ಮೂರನೇ ಏಕದಿನ ಪಂದ್ಯದಲ್ಲಿಯೂ ವಿರಾಟ್​ ಕೊಹ್ಲಿ ಶತಕ ಬಾರಿಸಿ ತಂಡದ ಗೆಲುವಿಗೆ ಪ್ರಮುಖರಾದರು.

ಮೊದಲು ಬ್ಯಾಟಿಂಗ್​ ಮಾಡಿದ ವೆಸ್ಟ್​ ಇಂಡೀಸ್​ ತಂಡ 7 ವಿಕೆಟ್​ಗಳ ನಷ್ಟಕ್ಕೆ 35 ಓವರ್​ಗೆ 240 ರನ್​ಗಳನ್ನು ಕಲೆ ಹಾಕಿತ್ತು. ಡಿಎಲ್​ಎಸ್​ ನಿಯಮದ ಪ್ರಕಾರ ಭಾರತಕ್ಕೆ 35 ಓವರ್​ಗೆ 250 ರನ್​ಗಳ ಗುರಿಯಿತ್ತು.

ಕೆರಿಬಿಯನ್ನರ್​ ನೀಡಿದ ಮೊತ್ತವನ್ನು ಬೆನ್ನತ್ತಿದ್ದ ಭಾರತ ಆರಂಭಿಕ ಆಘಾತ ಎದುರಿಸಿತು. ನಾಯಕನ ಜವಾಬ್ದಾರಿ ನಿಭಾಯಿಸಿದ ಕೊಹ್ಲಿ 99 ಎಸೆತಕ್ಕೆ 114 ರನ್​ಗಳನ್ನು ಗಳಿಸಿ ಅಜೇಯರಾಗಿ ಉಳಿದರು. ಇನ್ನು ಅರ್ಧ ಶತಕ ಗಳಿಸಿದ ಶ್ರೇಯಸ್​ ಅಯ್ಯರ್​ ಕೊಹ್ಲಿಗೆ ಸಾಥ್​ ನೀಡಿದರು. 65 ರನ್​ಗಳನ್ನು ಗಳಿಸಿದ ಶ್ರೇಯಸ್​ ಔಟಾಗಿ ಪೆವಿಲಿಯನ್​ ಹಾದಿ ಹಿಡಿದರು. ನಂತರ ಬಂದ ಕೇದಾರ್​ ಜಾಧವ್​ ಅಜೇಯ 19 ರನ್​ಗಳಿಸಿದರು. ಭಾರತ ತಂಡ 32.3 ಓವರ್​ಗೆ 4 ವಿಕೆಟ್​ಗಳನ್ನು ಕಳೆದುಕೊಂಡು 256 ರನ್​ಗಳನ್ನು ಕಲೆ ಹಾಕುವ ಮೂಲಕ ಗೆಲುವಿನ ದಡ ಸೇರಿದರು.

ಮೊದಲನೇ ಏಕದಿನ ಪಂದ್ಯ ಮಳೆಗೆ ಆಹುತಿಯಾಗಿತ್ತು. ಎರಡನೇ ಏಕದಿನ ಪಂದ್ಯದಲ್ಲಿ ಭಾರತ ತಂಡ 279 ರನ್​ಗಳಿಸಿದರೆ, ಇದಕ್ಕುತ್ತರವಾಗಿ ವೆಸ್ಟ್​ ಇಂಡೀಸ್​ ತಂಡ 210 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ 59 ರನ್​ಗಳಿಂದ ಸೋಲೊಪ್ಪಿಕೊಂಡಿತು. ಸರಣಿಯುದ್ದಕ್ಕೂ ಉತ್ತಮವಾಗಿ ಆಡಿರುವ ವಿರಾಟ್​ ಕೊಹ್ಲಿ ಸರಣಿ ಮತ್ತು ಪಂದ್ಯ ಪುರುಷೋತ್ತಮ ಪ್ರಶಸ್ತಿ ಪಡೆದರು.