ಫಾಲೋಆನ್​ಗೆ ಗುರಿಯಾದ ಜಿಂಬಾಬ್ವೆಗೆ ವಿಲಿಯಮ್ಸ್​ ಶತಕದ ಬಲ.. ರೋಚಕ ಹಂತಕ್ಕೆ 2ನೇ ಟೆಸ್ಟ್​..

ಬೃಹತ್ ಹಿನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿದ ಪ್ರವಾಸಿ ತಂಡ ನಿರಂತರ ವಿಕೆಟ್​ ಕಳೆದುಕೊಳ್ಳುತ್ತಾ ಸಾಗಿತು. ಒಂದು ಹಂತದಲ್ಲಿ 142 ರನ್​ಗಳಿಗೆ 7 ವಿಕೆಟ್ ಕಳೆದುಕೊಂಡು ಇನ್ನಿಂಗ್ಸ್​ ಸೋಲಿನ ಭೀತಿಗೆ ಸಿಲುಕಿತ್ತು..

ಅಬುಧಾಬಿ :ಆಫ್ಘಾನಿಸ್ತಾನದ ವಿರುದ್ಧ ನಡೆಯುತ್ತಿರುವ 2ನೇ ಟೆಸ್ಟ್​ ಪಂದ್ಯದಲ್ಲಿ ಫಾಲೋ ಆನ್‌ಗೆ ತುತ್ತಾಗಿದ್ದ ಜಿಂಬಾಬ್ವೆ, ನಾಯಕ ಸೀನ್ ವಿಲಿಯಮ್ಸ್​ ಸಿಡಿಸಿದ ಶತಕದ ನೆರವಿನಿಂದ ಇನ್ನಿಂಗ್ಸ್​ ಸೋಲಿನ ಭೀತಿಯಿಂದ ತಪ್ಪಿಸಿಕೊಂಡಿದ್ದಲ್ಲದೆ, 5ನೇ ದಿನ ಸ್ಪರ್ಧಾತ್ಮಕ ಟಾರ್ಗೆಟ್ ನೀಡುವ ಭರವಸೆ ಮೂಡಿಸಿದೆ.

ಮೊದಲ ಇನ್ನಿಂಗ್ಸ್​ನಲ್ಲಿ ಆಫ್ಘಾನಿಸ್ತಾನ 545 ರನ್​ಗಳಿಸಿತ್ತು. ಇದಕ್ಕುತ್ತರವಾಗಿ ಜಿಂಬಾಬ್ವೆ ಮೊದಲ ಇನ್ನಿಂಗ್ಸ್​ನಲ್ಲಿ 287ರನ್​ಗಳಿಗೆ ಆಲೌಟ್​ ಆಗಿತ್ತು. ಆಫ್ಘಾನಿಸ್ತಾನ 258ರನ್​​ಗಳ ಮುನ್ನಡೆ ಹೊಂದಿದ್ದರಿಂದ ಜಿಂಬಾಂಬ್ವೆ ಮೇಲೆ ಫಾಲೋ ಆನ್ ಹೇರಿತ್ತು.

ಬೃಹತ್ ಹಿನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿದ ಪ್ರವಾಸಿ ತಂಡ ನಿರಂತರ ವಿಕೆಟ್​ ಕಳೆದುಕೊಳ್ಳುತ್ತಾ ಸಾಗಿತು. ಒಂದು ಹಂತದಲ್ಲಿ 142 ರನ್​ಗಳಿಗೆ 7 ವಿಕೆಟ್ ಕಳೆದುಕೊಂಡು ಇನ್ನಿಂಗ್ಸ್​ ಸೋಲಿನ ಭೀತಿಗೆ ಸಿಲುಕಿತ್ತು.

ಆದರೆ, ನಾಯಕ ವಿಲಿಯಮ್ಸನ್ ಅಜೇಯ ಶತಕ(106) ಮತ್ತು ಡೊನಾಲ್ಡ್ ಟ್ರಿಪಾನೋ (ಅಜೇಯ 63) 8ನೇ ವಿಕೆಟ್​ಗೆ 124 ರನ್​ಗಳನ್ನು ಸೇರಿಸಿದ್ದಲ್ಲದೆ, ನಾಲ್ಕನೇ ದಿನ 8 ರನ್​ಗಳ ಮುನ್ನಡೆ ಪಡೆದುಕೊಂಡಿದೆ.

ವಿಲಿಯಮ್ಸನ್​ 190 ಎಸೆತಗಳಲ್ಲಿ 9 ಬೌಂಡರಿ ಮತ್ತು 1 ಸಿಕ್ಸರ್ ಸಹಿತ 106 ಮತ್ತು ಟ್ರಿಪಾನೋ 164 ಎಸೆತಗಳಲ್ಲಿ 11 ಬೌಂಡರಿ ಸಹಿತ 63 ರನ್​ಗಳಿಸಿ ಅಂತಿಮ ದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿದ್ದಾರೆ. ಆಫ್ಘಾನಿಸ್ತಾನದ ಪರ ರಶೀದ್ ಖಾನ್ ಮೊದಲ ಇನ್ನಿಂಗ್ಸ್​ನಲ್ಲಿ 4 ಮತ್ತು 2ನೇ ಇನ್ನಿಂಗ್ಸ್​ನಲ್ಲಿ 5 ವಿಕೆಟ್ ಪಡೆದು ಜಿಂಬಾಬ್ವೆ ವಿರುದ್ಧ ಮೇಲುಗೈ ಸಾಧಿಸಲು ನೆರವಾದರು.

ಇದನ್ನು ಓದಿ:ಹಶ್ಮತುಲ್ಲಾ ಶಾಹಿದಿ ದ್ವಿಶತಕ: ಆಫ್ಘಾನ್​ ಕ್ರಿಕೆಟ್​ನಲ್ಲಿ ಹೊಸ ದಾಖಲೆ