51ನೇ ವಯಸ್ಸಿನಲ್ಲೂ ಬತ್ತದ ಉತ್ಸಾಹ: ಜಾಂಟಿ ರೋಡ್ಸ್​​​ ಚುರುಕಿನ ಕ್ಯಾಚ್​ ವಿಡಿಯೋ!

ಪಂಜಾಬ್​ ತಂಡದ ಫೀಲ್ಡಿಂಗ್​ ಕೋಚ್​ ಜಾಂಟಿ ರೋಡ್ಸ್​​ ಯುವ ಕ್ರಿಕೆಟರ್ಸ್​​​​ ನಾಚುವ ರೀತಿಯಲ್ಲಿ ಕ್ಯಾಚ್​ ಹಿಡಿದು ಎಲ್ಲರ ಮನ ಗೆದ್ದಿದ್ದಾರೆ.

ದುಬೈ:ಇಂಡಿಯನ್​ ಪ್ರೀಮಿಯರ್​ ಲೀಗ್​ ಸೆಪ್ಟೆಂಬರ್​​ 19ರಿಂದ ಆರಂಭಗೊಳ್ಳಲಿದ್ದು, ಅದಕ್ಕಾಗಿ ಎಲ್ಲ ತಂಡಗಳು ಭರ್ಜರಿ ತಯಾರಿಯಲ್ಲಿ ಮಗ್ನವಾಗಿವೆ. ಎಲ್ಲ ಪ್ರಾಂಚೈಸಿಗಳ ಪ್ಲೇಯರ್ಸ್​ ಬ್ಯಾಟಿಂಗ್​​, ಕ್ಷೇತ್ರ ರಕ್ಷಣೆ ಹಾಗೂ ಬೌಲಿಂಗ್​​ನತ್ತ ಹೆಚ್ಚಿನ ಗಮನ ಹರಿಸುತ್ತಿದ್ದು, ಇವರಿಗೆ ಕೋಚ್​ಗಳು ಸಖತ್​ ಆಗಿ ತರಬೇತಿ ನೀಡುತ್ತಿದ್ದಾರೆ.

ಕಳೆದ ಕೆಲ ದಿನಗಳ ಹಿಂದೆ ರೋಹಿತ್​ ಶರ್ಮಾ, ವಿರಾಟ್​ ಕೊಹ್ಲಿ ಹಾಗೂ ಎಂಎಸ್​ ಧೋನಿ ಅಭ್ಯಾಸದ ವೇಳೆ ಬ್ಯಾಟಿಂಗ್​ ಹಾಗೂ ಅದ್ಭುತ ಕ್ಷೇತ್ರರಕ್ಷಣೆ ಮೂಲಕ ಎಲ್ಲರ ಗಮನ ಸೆಳೆದಿದ್ದರು. ಆದರೆ ಇದೀಗ ಕಿಂಗ್ಸ್​ ಇಲೆವೆನ್​ ಪಂಜಾಬ್​​ ತಂಡದ ಫೀಲ್ಡಿಂಗ್​ ಕೋಚ್​​ ಜಾಂಟಿ ರೋಡ್ಸ್​​​ ಅಭ್ಯಾಸದ ವೇಳೆ ಒಂದೇ ಕೈಯಲ್ಲಿ ಚುರುಕಿನ ಕ್ಯಾಚ್​ ಹಿಡಿದು ಎಲ್ಲರ ಗಮನ ಸೆಳೆದಿದ್ದಾರೆ.

51 ವರ್ಷದ ಜಾಂಟಿ ರೋಡ್ಸ್​​​ ಸದ್ಯ ಪಂಜಾಬ್​ ತಂಡದ ಫೀಲ್ಡಿಂಗ್​ ಕೋಚ್​ ಆಗಿ ಸೇವೆ ಸಲ್ಲಿಸುತ್ತಿದ್ದು, ಈ ಹಿಂದೆ ದಕ್ಷಿಣ ಆಫ್ರಿಕಾ ಪರ ಅಂತಾರಾಷ್ಟ್ರೀಯ ಕ್ರಿಕೆಟ್​​ನಲ್ಲಿ ಮಿಂಚಿದ್ದ ಇವರು 2003ರಲ್ಲಿ ನಿವೃತ್ತಿ ಘೋಷಣೆ ಮಾಡಿದ್ದರು. ಅತ್ಯದ್ಭುತ ಕ್ಷೇತ್ರ ರಕ್ಷಕ ಎಂಬ ಹೆಸರು ಗಳಿಸಿರುವ ಜಾಂಟಿ ರೋಡ್ಸ್​​ ಇದೀಗ ಎಲ್ಲರೂ ನಾಚುವಂತೆ ಕ್ಯಾಚ್​ ಹಿಡಿದಿದ್ದಾರೆ.

ಇದರ ವಿಡಿಯೋ ತುಣುಕವೊಂದನ್ನ ಪಂಜಾಬ್​ ತನ್ನ ಟ್ವಿಟರ್​ ಅಕೌಂಟ್​ನಲ್ಲಿ ಹಾಕಿಕೊಂಡಿದೆ.