ನವದೆಹಲಿ: ಭಾರತದ ಮಾಜಿ ಆಟಗಾರ ಗಂಭೀರ್ಗೂ ಪ್ರಸ್ತುತ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿ ನಡುಣ ಮುಸುಕಿನ ಗುದ್ದಾಟ ಮುಂದುವರೆದಿದೆ. ದಶಕಗಳ ಹಿಂದಿನಿಂದಲೂ ಇವರಿಬ್ಬರ ನಡುವೆ ಕೋಳಿ ಜಗಳ ನಡೆಯುತ್ತಲೇ ಇದೆ. ಇದೀಗ ಕೊಹ್ಲಿ ಯಶಸ್ವಿ ನಾಯಕನಾಗಲು ಬೇರೆಯವರನ್ನು ಅವಲಂಬಿಸಿದ್ದಾರೆ ಎಂದು ಗಂಭೀರ್ ಹೇಳಿಕೆ ನೀಡುವ ಮೂಲಕ ವಿವಾದ ಎಬ್ಬಿಸಿದ್ದಾರೆ.
ಇಬ್ಬರು ದೆಹಲಿಯಿಂದಲೇ ಬಂದವರಾದರೂ ಯಾಕೋ ಇಬ್ಬರೂ ಹಾವು ಮುಂಗಿಸಿಯಂತಾಗಿದ್ದಾರೆ. ಕೊಹ್ಲಿ - ಗಂಭೀರ್ ತಂಟೆಗೆ ಹೋಗದಿದ್ದರೂ ಗಂಭೀರ್ ಮಾತ್ರ ಕೊಹ್ಲಿ ಯಶಸ್ಸನ್ನು ಹೊಗಳುವ ಮನಸ್ಸು ಮಾಡುತ್ತಿಲ್ಲ. ಆದರೆ, ಇದೀಗ ಭಾರತ ತಂಡದ ಯಶಸ್ವಿ ನಾಯಕನಾಗಿ ದಾಖಲೆಗಳ ಮೇಲೆ ದಾಖಲೆ ಬರೆಯುತ್ತಿದ್ದರೂ, ಕೊಹ್ಲಿ ಸಾಧನೆಯ ಹಿಂದೆ ಎಂಎಸ್ ಧೋನಿ ಹಾಗೂ ರೋಹಿತ್ ಇರುವುದರಿಂದಲೇ ಅವರೊಬ್ಬ ಯಶಸ್ವಿ ನಾಯಕ ಎನಿಸಿಕೊಳ್ಳುತ್ತಿದ್ದಾರೆ ಎಂದು ಹೇಳುವ ಮೂಲಕ ಮತ್ತೊಮ್ಮೆ ವಿರಾಟ್ ವಿರುದ್ಧ ಹೇಳಿಕೆ ನೀಡಿದ್ದಾರೆ.
ಪ್ರಸ್ತುತ ಎಲ್ಲಾ ವಿಭಾಗದ ಕ್ರಿಕೆಟ್ನಲ್ಲಿ ನಾಯಕನ ಜವಾಬ್ದಾರಿ ವಹಿಸಿರುವ ವಿರಾಟ್ ಕೊಹ್ಲಿ, ನಾಯಕತ್ವದಲ್ಲಿ ದ್ರಾವಿಡ್, ಗಂಗೂಲಿ ಹಾಗೂ ಧೋನಿಯನ್ನು ಮೀರಿಸಿದ್ದಾರೆ. ಆದರೆ, ಕೊಹ್ಲಿ ಯಶಸ್ವಿ ನಾಯಕನಾಗಲು ಎಂ.ಎಸ್.ಧೋನಿ ಮತ್ತು ರೋಹಿತ್ ಶರ್ಮಾ ಕಾರಣ. ಧೋನಿ-ರೋಹಿತ್ ಇಲ್ಲದೇ ಇದ್ರೆ ಕೊಹ್ಲಿ ನಾಯಕನಾಗಿ ಈ ಮಟ್ಟಕ್ಕೆ ಬೆಳೆಯುತ್ತಿರಲಿಲ್ಲ ಎಂದು ಗಂಭೀರ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇಷ್ಟೇ ಅಲ್ಲದೆ ತಮ್ಮ ಹೇಳಿಕೆಯನ್ನು ಸಮರ್ಥಿಸಿಕೊಳ್ಳುವುದಕ್ಕೆ ಗಂಭೀರ್ ಉದಾಹರಣೆ ನೀಡಿದ್ದು ಕೊಹ್ಲಿಯ ಐಪಿಎಲ್ ನಾಯಕತ್ವದ ಉದಾಹರಣೆ ನೀಡಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಕೊಹ್ಲಿ ನಾಯಕನಾಗಿ ಸಕ್ಸಸ್ ಕಾಣುತ್ತಿರುವುದಕ್ಕೆ, ರೋಹಿತ್ ಶರ್ಮಾ ಮತ್ತು ಮಹೇಂದ್ರ ಸಿಂಗ್ ಧೋನಿ ಕಾರಣ. ಆದ್ರೆ ಐಪಿಎಲ್ನಲ್ಲಿ ಆರ್ಸಿಬಿ ನಾಯಕನಾಗಿ ಕೊಹ್ಲಿ ಯಾಕೆ ಯಶಸ್ಸು ಕಾಣಲಿಲ್ಲ.? ಯಾಕಂದ್ರೆ ಆರ್ಸಿಬಿ ತಂಡದಲ್ಲಿ ರೋಹಿತ್-ಧೋನಿ ಇಲ್ಲ ಅದಕ್ಕೆ ಎಂದಿದ್ದಾರೆ.
ಫ್ರಾಂಚೈಸಿ ತಂಡವನ್ನು ಮುನ್ನಡೆಸುವಾಗ ನಾಯಕತ್ವದ ನೈಜ ಪರೀಕ್ಷೆಯಾಗಲಿದೆ. ಯಾಕೆಂದರೆ ಅಲ್ಲಿ ನಾಯಕನನ್ನು ಬೆಂಬಲಿಸಲು ರೋಹಿತ್-ಧೋನಿಯಂತಹ ಸ್ಟಾರ್ ಆಟಗಾರರ ನೆರವು ಸಿಗಲಾರದು. ಮುಂಬೈ ಇಂಡಿಯನ್ಸ್‌ನಲ್ಲಿ ರೋಹಿತ್ ಶರ್ಮಾ, ಚೆನ್ನೈ ಸೂಪರ್ ಕಿಂಗ್ಸ್‌ನಲ್ಲಿ ಮಹೇಂದ್ರ ಸಿಂಗ್ ಧೋನಿ ಗಳಿಸಿರುವ ಸಾಧನೆಯನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಜೊತೆಗೆ ಹೋಲಿಕೆ ಮಾಡಲು ಸಾಧ್ಯವಿಲ್ಲ ಎಂದಿರುವ ಗಂಭೀರ್, ಕೊಹ್ಲಿ ನಾಯಕತ್ವದಲ್ಲಿ ಇನ್ನಷ್ಟು ಪಳಗಬೇಕು ಎಂಬುದನ್ನು ಮಾರ್ಮಿಕವಾಗಿ ತಿಳಿಸಿದ್ದಾರೆ.
