ಹೃದಯಾಘಾತ: ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟರ್​​ ಡೀನ್​ ಜೋನ್ಸ್​ ನಿಧನ

ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಕೇವಲ 59ನೇ ವಯಸ್ಸಿನಲ್ಲಿ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ.

ಮುಂಬೈ:ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಹಾಗೂ ಖ್ಯಾತ ವೀಕ್ಷಕ ವಿವರಣೆಗಾರ​ ಡೀನ್​ ಜೋನ್ಸ್​​​​ ಅವರು ತೀವ್ರ ಹೃದಯಾಘಾತದಿಂದ ಮುಂಬೈನಲ್ಲಿ ಸಾವಿಗೀಡಾಗಿದ್ದಾರೆ.

59 ವರ್ಷದ ಡೀನ್​ ಜೋನ್ಸ್​​​, ಆಸ್ಟ್ರೇಲಿಯಾ ಪರ ವಿಕೆಟ್​ ಕೀಪರ್​​ ಬ್ಯಾಟ್ಸ್​​ಮನ್​ ಆಗಿದ್ದರು. ಕಾಂಗರೂ ಪರ 52 ಟೆಸ್ಟ್​, 164 ಏಕದಿನ ಪಂದ್ಯಗಳನ್ನಾಡಿದ್ದು, 1984ರಿಂದ 1994ರ ಸಮಯದಲ್ಲಿ ಆಸ್ಟ್ರೇಲಿಯಾ ಪ್ರತಿನಿಧಿಸಿದ್ದರು.

ದಕ್ಷಿಣ ಏಷ್ಯಾದಲ್ಲಿ ಕ್ರಿಕೆಟ್​ ಅಭಿವೃದ್ಧಿ ಮಾಡಲು ರಾಯಭಾರಿಯಾಗಿ ಸೇವೆ ಸಲ್ಲಿಸಿದ್ದ ಇವರು, ಹೊಸ ಹೊಸ ಪ್ರತಿಭೆ ಕಂಡು ಹಿಡಿಯುವಲ್ಲಿ ಯಶಸ್ವಿಯಾಗಿದ್ದರು. ಅದ್ಭುತ ನಿರೂಪಕರಾಗಿದ್ದ ಇವರು ತಮ್ಮ ಕಮೆಂಟರಿ ವೇಳೆ ಲಕ್ಷಾಂತರ ಅಭಿಮಾನಿಗಳ ಮನಗೆದ್ದಿದ್ದರು.

1984ರಲ್ಲಿ ವೆಸ್ಟ್​ ಇಂಡೀಸ್​​ನಲ್ಲಿ ನಡೆದ ಟೆಸ್ಟ್​​ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಪರ ಪದಾರ್ಪಣೆ ಮಾಡಿದ್ದ ಇವರು 9500 ಅಂತಾರಾಷ್ಟ್ರೀಯ ರನ್​ಗಳಿಕೆ ಮಾಡಿದ್ದರು. ಇವರ ನಿಧನಕ್ಕೆ ಟೀಂ ಇಂಡಿಯಾ ಕೋಚ್​ ರವಿಶಾಸ್ತ್ರಿ ಟ್ವೀಟ್​ ಮಾಡಿ ಸಂತಾಪ ಸೂಚಿಸಿದ್ದು, ಅವರ ಸಾವು ನಿಜಕ್ಕೂ ಶಾಕ್​ ನೀಡಿದೆ ಎಂದಿದ್ದಾರೆ. ಇದರ ಬೆನ್ನಲ್ಲೇ ಇರ್ಫಾನ್​ ಪಠಾಣ್​, ವಿರೇಂದ್ರ ಸೆಹ್ವಾಗ್​ ಸೇರಿ ಅನೇಕರು ಸಂತಾಪ ಸೂಚಿಸಿ ಟ್ವೀಟ್ ಮಾಡಿದ್ದಾರೆ.

ಮಾಸ್ಟರ್​ ಬ್ಲಾಸ್ಟರ್​ ಸಚಿನ್​ ಸಂತಾಪ

ನಿಜಕ್ಕೂ ಇದೊಂದು ಶಾಕಿಂಗ್​ ನ್ಯೂಸ್​​. ಆಸ್ಟ್ರೇಲಿಯಾ ಪ್ರವಾಸದ ವೇಳೆ ಇವರ ವಿರುದ್ಧ ನಾನು ಕ್ರಿಕೆಟ್​ ಆಡಿರುವುದು ನಿಜಕ್ಕೂ ಅದ್ಭುತ ಎಂದಿದ್ದಾರೆ.