ದುಬೈ:14ನೇ ಆವೃತ್ತಿ ಇಂಡಿಯನ್ ಪ್ರೀಮಿಯರ್ ಲೀಗ್ನ ದ್ವಿತೀಯಾರ್ಧದ ಪಂದ್ಯಗಳು ಆರಂಭಗೊಳ್ಳಲು ದಿನಗಣನೆ ಆರಂಭಗೊಂಡಿದ್ದು, ಎಲ್ಲ ತಂಡದ ಆಟಗಾರರು ಮೈದಾನಕ್ಕಿಳಿದು ಸಖತ್ ಆಗಿ ಅಭ್ಯಾಸದಲ್ಲಿ ನಿರತರಾಗಿದ್ದಾರೆ. ಈ ಬಾರಿಯ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡಗಳಲ್ಲಿ ಒಂದಾಗಿರುವ ಆರ್ಸಿಬಿ ಕೂಡ ಇದರಿಂದ ಹೊರತಾಗಿಲ್ಲ.
ಇಂದು ನಡೆದ ಅಭ್ಯಾಸ ಪಂದ್ಯದಲ್ಲಿ ಆರ್ಸಿಬಿ ತಂಡದ ಸ್ಪೋಟಕ ಬ್ಯಾಟ್ಸ್‌ಮನ್ ಎಬಿ ಡಿವಿಲಿಯರ್ಸ್ ಸ್ಪೋಟಕ ಶತಕ ಸಿಡಿಸಿದರು. ಈ ಮೂಲಕ ದ್ವಿತೀಯಾರ್ಧದ ಪಂದ್ಯಗಳಿಗಾಗಿ ಅದ್ಭುತ ತಯಾರಿ ನಡೆಸಿದ್ದಾರೆ.
ಆರ್ಸಿಬಿ ತಂಡದ ಹರ್ಷಲ್ ಪಟೇಲ್ ನೇತೃತ್ವದ A ತಂಡ ಹಾಗೂ ದೇವದತ್ ಪಡಿಕ್ಕಲ್ ನೇತೃತ್ವದ B ತಂಡಗಳ ನಡುವೆ ಅಭ್ಯಾಸ ಪಂದ್ಯ ಆಯೋಜನೆಗೊಂಡಿತ್ತು. A ತಂಡದಲ್ಲಿದ್ದ ಎಬಿಡಿ ಶತಕದ ಆರ್ಭಟದಿಂದ ನಿಗದಿತ 20 ಓವರ್ಗಳಲ್ಲಿ 212ರನ್ಗಳಿಕೆ ಮಾಡಿತು.
ಇದರಲ್ಲಿ ಎಬಿಡಿ ಕೇವಲ 46 ಎಸೆತಗಳಲ್ಲಿ 104 ರನ್ ಗಳಿಸಿದರು. ಪ್ರಮುಖವಾಗಿ 7 ಬೌಂಡರಿ ಹಾಗೂ 10 ಸಿಕ್ಸರ್ ಇದರಲ್ಲಿ ಸೇರಿಕೊಂಡಿವೆ. ಇವರಿಗೆ ಉತ್ತಮ ಸಾಥ್ ನೀಡಿದ ಅಜರುದ್ದೀನ್ 43 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 4 ಬೌಂಡರಿಗಳೊಂದಿಗೆ 66 ರನ್ಗಳಿಕೆ ಮಾಡಿದರು. B ತಂಡದಲ್ಲಿದ್ದ ಕೆ.ಎಸ್.ಭರತ್ 95 ರನ್ಗಳಿಕೆ ಮಾಡಿದ್ರೆ, ಕ್ಯಾಪ್ಟನ್ ದೇವದತ್ ಪಡಿಕ್ಕಲ್ 36 ರನ್ಗಳಿಸಿದರು.