ನವದೆಹಲಿ :ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ಟೆಸ್ಟ್ ಸರಣಿಯಲ್ಲಿ ಭಾರತ ತಂಡದ ನಾಯಕ ವಿರಾಟ್ ಕೊಹ್ಲಿಯಿಂದ ಆದಷ್ಟು ಬೇಗ ಒಂದು ದೊಡ್ಡ ಶತಕ ಬರಲಿದೆ ಎಂದು ಅವರ ಬಾಲ್ಯದ ಕೋಚ್ ರಾಜ್ಕುಮಾರ್ ಶರ್ಮಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
2019ರ ನವೆಂಬರ್ನಿಂದ ಕೊಹ್ಲಿ ಈವರೆಗೂ ಯಾವುದೇ ಮಾದರಿಯಲ್ಲೂ ಶತಕ ಬಾರಿಸಿಲ್ಲ. ಅಲ್ಲದೆ ಕಳೆದ 2 ಟೆಸ್ಟ್ನಲ್ಲಿ ಮೂರು ಇನ್ನಿಂಗ್ಸ್ಗಳಿಂದ ಅವರು ಕೇವಲ 62 ರನ್ಗಳಿಸಿದ್ದಾರೆ. ಅವರ ಪ್ರತಿಸ್ಪರ್ಧಿಯಾಗಿರುವ ಜೋ ರೂಟ್ 2 ಟೆಸ್ಟ್ ಪಂದ್ಯಗಳಿಂದ 386 ರನ್ ಗಳಿಸಿದ್ದಾರೆ.
ದೆಹಲಿ ಪುರುಷರ ತಂಡದ ಮುಖ್ಯ ಕೋಚ್ ಆಗಿರುವ ಶರ್ಮಾ, ತಾವೂ ಇತ್ತೀಚೆಗೆ ಕೊಹ್ಲಿ ಜೊತೆ ಮಾತನಾಡಿದ್ದು, ಭಾರತೀಯ ಕಪ್ತಾನನಿಂದ ಆದಷ್ಟು ಬೇಗ ಒಂದು ದೊಡ್ಡ ಶತಕ ಬರಲಿದೆ ಎಂಬ ವಿಶ್ವಾಸ ನನಗಿದೆ ಎಂದು ತಿಳಿಸಿದ್ದಾರೆ.
ಆತನನ್ನು ಪ್ರೇರೇಪಿಸುವ ಅವಶ್ಯಕತೆಯಿದೆ ಎಂದು ನನಗೆ ಅನಿಸುವುದಿಲ್ಲ. ಯಾಕೆಂದರೆ, ಆತ ಈಗಾಗಲೇ ಹೆಚ್ಚು ಪ್ರೇರಣೆ ಹೊಂದಿದ್ದಾರೆ. ಕಳೆದ ಪಂದ್ಯದ ನಂತರವೂ ನಾನು ಅವರೊಂದಿಗೆ ಮಾತನಾಡಿದಾಗ, ಅವರು ತುಂಬಾ ಉತ್ಸುಕರಾಗಿದ್ದರು ಮತ್ತು ಪಂದ್ಯ ಗೆದ್ದಿರುವುದಕ್ಕೆ ಸಂತೋಷ ವ್ಯಕ್ತಪಡಿಸಿದ್ದರು.