ಕೋವಿಡ್ ಕೇರ್​ ಸೆಂಟರ್​ಗೆ 2 ಕೋಟಿ ರೂ. ದೇಣಿಗೆ.. ನಿಜ ಜೀವನದಲ್ಲೂ ಹೀರೋ ಆದ 'ಬಿಗ್​ ಬಿ'

ಮಹಾಮಾರಿ ಕೊರೊನಾ ಸೋಂಕಿನಿಂದಾಗಿ ರಾಷ್ಟ್ರ ರಾಜಧಾನಿ ದೆಹಲಿ ಸಂಕಷ್ಟಕ್ಕೊಳಗಾಗಿದ್ದು, ಇದೀಗ ಬಿಗ್​ ಬಿ ತಮ್ಮ ಕೈಲಾದ ಸಹಾಯ ಮಾಡಿ ಮಾನವೀಯತೆ ಮೆರೆದಿದ್ದಾರೆ.

ನವದೆಹಲಿ:ದೇಶದಲ್ಲಿ 2ನೇ ಹಂತದ ಕೊರೊನಾ ಹಾವಳಿ ಜೋರಾಗಿದ್ದು, ಇದರ ಅಲೆಗೆ ಸಿಲುಕಿರುವ ಭಾರತ ಅನೇಕ ತೊಂದರೆ ಅನುಭವಿಸುತ್ತಿದೆ. ಇದೀಗ ಡೆಡ್ಲಿ ವೈರಸ್​ ವಿರುದ್ಧದ ಹೋರಾಟದಲ್ಲಿ ಎಲ್ಲರೂ ಕೈಜೋಡಿಸುತ್ತಿದ್ದು, ಸದ್ಯ ಬಾಲಿವುಡ್​ನ ಸ್ಟಾರ್ ನಟ ಅಮಿತಾಬ್ ಬಚ್ಚನ್ ಕೂಡ ತಮ್ಮ ಕೈಲಾದ ಸಹಾಯ ನೀಡಿದ್ದಾರೆ.

ದೆಹಲಿಯ ರಕಾಬ್​ ಗಂಜ್​ನ ಗುರುದ್ವಾರದಲ್ಲಿ ನಿರ್ಮಾಣಗೊಳ್ಳುತ್ತಿರುವ ಕೋವಿಡ್​ ಕೇರ್​​ ಕೇಂದ್ರಕ್ಕೆ ಬಿಗ್​ ಬಿ ಅಮಿತಾಬ್​ ಬಚ್ಚನ್​ 2 ಕೋಟಿ ರೂ. ದೇಣಿಗೆ ನೀಡಿದ್ದಾರೆ. ಇದಕ್ಕೆ ಸಂಬಂಧಿಸಿದಂತೆ ಸಿಖ್​ ಗುರುದ್ವಾರ ನಿರ್ವಹಣಾ ಸಮಿತಿ ಅಧ್ಯಕ್ಷ ಮಂಜಿಂದರ್​ ಸಿಂಗ್​ ಸಿರ್ಸಾ ತಿಳಿಸಿದ್ದಾರೆ.

ರಕಾಬ್ ಗಂಜ್​ನ ಗುರದ್ವಾರ್​ದಲ್ಲಿ 300 ಹಾಸಿಗೆ ಕೋವಿಡ್ ಕೇರ್​ ಸೆಂಟರ್ ಓಪನ್ ಮಾಡಲಾಗುತ್ತಿದ್ದು, ಇಲ್ಲಿಗೆ ಬರುವ ರೋಗಿಗಳಿಗೆ ಉಚಿತವಾಗಿ ಸೇವೆ ನೀಡಲು ನಿರ್ಧಾರ ಕೈಗೊಳ್ಳಲಾಗಿದೆ. ಇಲ್ಲಿ ಆಮ್ಲಜನಕ ಸಾಂದ್ರಕ, ವೈದ್ಯರು, ಅರೆ ವೈದ್ಯರು ಮತ್ತು ಆ್ಯಂಬುಲೆನ್ಸ್​ಗಳು ಸಹ ಇರಲಿವೆ.