ಇತ್ತೀಚೆಗೆ 'ನಾಗಿಣಿ' ಧಾರಾವಾಹಿ ಯಶಸ್ವಿಯಾಗಿ 1000 ಸಂಚಿಕೆ ಪೂರೈಸಿದ್ದು ಸದ್ಯದಲ್ಲೇ ಮುಕ್ತಾಯಗೊಳ್ಳಲಿದೆ. ಇದರ ಜೊತೆಗೆ ಡಿಸೆಂಬರ್ನಲ್ಲಿ ನಾಗಿಣಿ-2 ಆರಂಭವಾಗಲಿದೆ ಎಂಬ ಸುದ್ದಿ ವೀಕ್ಷಕರಿಗೆ ಸಂತಸ ನೀಡಿದೆ.
ನಾಗಿಣಿ ಧಾರಾವಾಹಿಯನ್ನು ಹಯವದನ ನಿರ್ದೇಶಿಸಿದ್ದು, ನಾಗಿಣಿ-2 ಧಾರಾವಾಹಿಯ ನಿರ್ದೇಶನದ ಜವಾಬ್ದಾರಿಯನ್ನು ರಾಮ್ ಜೀ ವಹಿಸಿಕೊಂಡಿದ್ದಾರೆ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಪುಟ್ಟ ಗೌರಿ ಮದುವೆ, ಮಂಗಳ ಗೌರಿ ಮದುವೆ ಧಾರಾವಾಹಿ ನಿರ್ದೇಶಿಸಿ ಮನೆ ಮಾತಾಗಿರುವ ರಾಮ್ ಜೀ, ಇದೇ ಮೊದಲ ಬಾರಿಗೆ ಜೀ ಕನ್ನಡದ ಧಾರಾವಾಹಿಗೆ ಆಕ್ಷನ್ ಕಟ್ ಹೇಳುತ್ತಿದ್ದಾರೆ.
"ಫ್ಯಾಂಟಸಿ ಧಾರಾವಾಹಿ ನಾಗಿಣಿಯನ್ನು ಜನ ಸ್ವೀಕರಿಸಿದ್ದರು. ಜೊತೆಗೆ ನಾಗಿಣಿ ಧಾರಾವಾಹಿ ಮುಗಿಯುತ್ತಿದೆ ಎಂದು ತಿಳಿದಾಗ ನಾಗಿಣಿ ಭಾಗ-2 ಮಾಡುವಂತೆಯೂ ಬೇಡಿಕೆಗಳು ಅವರಿಗಿತ್ತು. ಅದೇ ಕಾರಣಕ್ಕೆ ಅದ್ಭುತವಾದ ಕಥೆ ಹೆಣೆದಿದ್ದು, ಸುಂದರವಾದ ಕಥೆಯೊಂದಿಗೆ ನಿಮ್ಮ ಮುಂದೆ ಬರಲಿದ್ದೇವೆ" ಎಂದು ರಾಮ್ ಜೀ ಹೇಳಿದ್ದಾರೆ. ಇನ್ನು ನಾಗಿಣಿ 2 ಧಾರಾವಾಹಿಯಲ್ಲಿ ಪುಟ್ಟಗೌರಿ ಸೀರಿಯಲ್ನಲ್ಲಿದ್ದ ಹಿಮಾ ನಾಗಿಣಿಯಾಗಿ ಬುಸುಗುಟ್ಟಲಿದ್ದಾಳೆ.
ತನ್ನ ಹತ್ಯೆ ಮಾಡಿದ ಪ್ರೇಮಿಯ ವಿರುದ್ಧ ಸಮರ ಸಾರಲು ನಾಗಿಣಿ ಭೂ ಲೋಕಕ್ಕೆ ಬಂದು ಹೇಗೆ ಸೇಡು ತೀರಿಸಿಕೊಳ್ಳುತ್ತಾಳೆ ಎಂದಬುದೇ ಈ ಧಾರಾವಾಹಿಯ ಕಥೆ. ಧಾರಾವಾಹಿಗೋಸ್ಕರ ಭವ್ಯವಾದ ಸೆಟ್ ಹಾಕಲೆಂದೇ ಮುಂಬೈಯಿಂದ ಸ್ಪೆಷಲಿಸ್ಟ್ಗಳನ್ನು ಕರೆಸಿಕೊಂಡಿದ್ದಾರಂತೆ.ಇನ್ನು ಎಲ್ಲಾ ಅಂದುಕೊಂಡಂತೆ ಆದರೆ ಡಿಸೆಂಬರ್ ಎರಡನೇ ವಾರದಿಂದ ನಾಗಿಣಿ-2 ಮತ್ತೆ ಬುಸುಗುಡಲು ಬರಲಿದ್ದಾಳೆ.