ನಟಿ ಕಾಜಲ್ ಅಗರ್ವಾಲ್ ಸೌಥ್ ಇಂಡಿಯಾ ಸುಂದರಿ. ಟಾಲಿವುಡ್-ಕಾಲಿವುಡ್ ಹಾಗೂ ಬಾಲಿವುಡ್‌ನಲ್ಲೂ ಮಿಂಚಿರುವ ಕುವರಿ. ಈ ಚೆಂದುಳ್ಳಿ ಚೆಲುವೆಗೆ ಅಭಿಮಾನಿಗಳ ಬಳಗ ದೊಡ್ಡದು. ಒಮ್ಮೆಯಾದ್ರೂ ಕಾಜಲ್ ಅವರನ್ನು ಖುದ್ದು ಮೀಟ್ ಮಾಡಬೇಕು ಎನ್ನುವ ಹಂಬಲ ಇವರ ಅಭಿಮಾನಿಗಳದ್ದು. ಆದರೆ, ಅಭಿಮಾನಿಯೊಬ್ಬ ಕಾಜಲ್ ಅವರನ್ನು ಭೇಟಿಯಾಗಲು ಬಯಸಿ ಲಕ್ಷಾಂತರ ರೂಪಾಯಿ ಕಳೆದುಕೊಂಡ ಘಟನೆ ನಡೆದಿದೆ.
ತಮಿಳುನಾಡಿನ ರಾಮನಾಥಪುರಂ ಮೂಲದ ಹುಡುಗನೋರ್ವ ಕಾಜಲ್ ಕಟ್ಟಾ ಅಭಿಮಾನಿ. ಈ ನಟಿಯ ಎಲ್ಲ ಚಿತ್ರಗಳನ್ನು ಕಣ್ತುಂಬಿಕೊಂಡಿರುವ ಈತ, ತನ್ನ ನೆಚ್ಚಿನ ನಟಿಯನ್ನು ಭೇಟಿಯಾಗಬೇಕು, ಅವರ ಜತೆ ಮಾತಾಡಬೇಕು, ಅವಕಾಶ ಸಿಕ್ರೆ ಒಂದು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಬೇಕೆಂದು ಕನಸು ಕಂಡಿದ್ದ. ಅದನ್ನು ಸಾಕಾರಗೊಳಿಸಲೆಂದೇ ವೆಬ್ಪೇಜ್ವೊಂದನ್ನು ಸಂಪರ್ಕಿಸಿದ್ದ. ಕಾಜಲ್ ಅವರನ್ನು ಭೇಟಿ ಮಾಡಿಸುವುದಾಗಿ ನಂಬಿಸಿದ್ದ ವಂಚಕರ ತಂಡ, ಪ್ರಾರಂಭದಲ್ಲಿ ಈತನಿಂದ ₹50000 ಹಾಗೂ ಆತನ ಕೆಲ ಪರ್ಸನಲ್ ಮಾಹಿತಿ ಪಡೆದುಕೊಂಡಿತ್ತು.