ಕಂಚಿನ ಕಂಠದ ನಾಯಕ, ಗಾಯಕ, ಖಳ ನಾಯಕ ವಸಿಷ್ಠ ಎನ್. ಸಿಂಹ, ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಬಹು ನಿರೀಕ್ಷಿತ 'ಕಾಲಚಕ್ರ' ಸಿನಿಮಾದ 'ತರಗೆಲೆ ಸಂಸಾರ' ಹಾಡು ವರಮಹಾಲಕ್ಷ್ಮಿ ಹಬ್ಬದಂದು ಬಿಡುಗಡೆಯಾಗಿದ್ದು ಈ ಹಾಡಿಗೆ ಎಲ್ಲೆಡೆ ಉತ್ತಮ ಪ್ರಶಂಸೆ ವ್ಯಕ್ತವಾಗಿದೆ.
'ಕಾಲಚಕ್ರ' ಚಿತ್ರದ ತರಗೆಲೆ ಸಂಸಾರ ಹಾಡಿಗೆ ಸೆಲಬ್ರಿಟಿಗಳು ಫಿದಾ
ಸುಮಂತ್ ಕ್ರಾಂತಿ ನಿರ್ದೇಶನದಲ್ಲಿ ವಸಿಷ್ಠ ಎನ್. ಸಿಂಹ ಪ್ರಮುಖ ಪಾತ್ರದಲ್ಲಿ ನಟಿಸಿರುವ 'ಕಾಲಚಕ್ರ' ಸಿನಿಮಾದ ತರಗೆಲೆ ಸಂಸಾರ ಹಾಡು ನಿನ್ನೆ ಬಿಡುಗಡೆಯಾಗಿದ್ದು ಈ ಹಾಡಿಗೆ ಸೆಲಬ್ರಿಟಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
'ಕಾಲಚಕ್ರ'
ಆನಂದ್ ಆಡಿಯೋ ಈ ಹಾಡನ್ನು ಬಿಡುಗಡೆ ಮಾಡಿದ್ದು ಸ್ಯಾಂಡಲ್ವುಡ್ ಸ್ಟಾರ್ಗಳು ಕೂಡಾ ಈ ಹಾಡಿಗೆ ಫಿದಾ ಆಗಿದ್ದಾರೆ. ಇಷ್ಟು ದಿನ ತಮ್ಮ ಖಡಕ್ ಡೈಲಾಗ್ನಿಂದ ಅಬ್ಬರಿಸುತ್ತಿದ್ದ ವಸಿಷ್ಠ ಸಿಂಹ, ಈ ಹಾಡಿನಲ್ಲಿ ಡ್ಯಾನ್ಸ್ ಕೂಡಾ ಮಾಡಿದ್ದಾರೆ. ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್, ಪವರ್ಸ್ಟಾರ್ ಪುನೀತ್ ರಾಜ್ಕುಮಾರ್, ಡಾಲಿ ಧನಂಜಯ್, ಪ್ರಜ್ವಲ್ ದೇವರಾಜ್, ಟಗರು ಪುಟ್ಟಿ ಮಾನ್ವಿತ, ಸಿಂಪಲ್ ಸುನಿ, ಐಪಿಎಸ್ ಅಧಿಕಾರಿ ರವಿ ಡಿ. ಚೆನ್ನಣ್ಣನವರ್ ಹಾಗೂ ಇನ್ನಿತರರು 'ಕಾಲಚಕ್ರ' ಚಿತ್ರಕ್ಕೆ ಶುಭ ಕೋರಿದ್ದಾರೆ.
'ಕಾಲಚಕ್ರ' ಚಿತ್ರಕ್ಕೆ ಶುಭ ಕೋರಿದ ರವಿ ಡಿ. ಚೆನ್ನಣ್ಣನವರ್
'ತರಗೆಲೆ ಸಂಸಾರ' ಹಾಡಿಗೆ ಸಂತೋಷ್ ನಾಯಕ್ ಸಾಹಿತ್ಯ ಬರೆದಿದ್ದರೆ ಗುರುಕಿರಣ್ ರಾಗ ಸಂಯೋಜನೆ ಮಾಡಿದ್ದಾರೆ. ಈ ಹಾಡನ್ನು ಬಾಲಿವುಡ್ ಖ್ಯಾತ ಗಾಯಕ ಕೈಲಾಶ್ ಕೇರ್ ಹಾಡಿದ್ದಾರೆ. ಸೈಕಲಾಜಿಕಲ್ ಕಥಾ ಹಂದರವಿರುವ ಈ ಚಿತ್ರವನ್ನು ಸುಮಂತ್ ಕ್ರಾಂತಿ ನಿರ್ದೇಶಿಸಿದ್ದಾರೆ. ರಕ್ಷಾ, ದೀಪಕ್ ಶೆಟ್ಟಿ, ಸುಚೇಂದ್ರ ಪ್ರಸಾದ್ ಹಾಗೂ ಇನ್ನಿತರರು ನಟಿಸಿರುವ ಈ ಚಿತ್ರ ಶೀಘ್ರವೇ ತೆರೆಗೆ ಬರಲಿದೆ.
ತರಗೆಲೆ ಹಾಡಿಗೆ ಸೆಲಬ್ರಿಟಿಗಳ ಪ್ರತಿಕ್ರಿಯೆ