'ದಸ್ವಿ' ಟ್ರೈಲರ್ ಬಿಡುಗಡೆ: ಹರಿಯಾಣ ಮಾಜಿ ಸಿಎಂ ಆಗಿ ಮಿಂಚಿದ ನಟ ಅಭಿಷೇಕ್ ಬಚ್ಚನ್

ನಟ ಅಭಿಷೇಕ್ ಬಚ್ಚನ್, ಯಾಮಿ ಗೌತಮ್ ಮತ್ತು ನಿಮ್ರತ್ ಕೌರ್ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ 'ದಸ್ವಿ' ಟ್ರೈ ಲರ್ ನಿನ್ನೆ ರಿಲೀಜ್​ ಆಗಿದ್ದು, ಕುರ್ತಾ- ಪೈಜಾಮಾ, ನೆಹರೂ ಜಾಕೆಟ್ ಮತ್ತು ಪೇಟ ಧರಿಸಿ ಅಭಿಷೇಕ್ ಬಚ್ಚನ್ ಮಿಂಚುತ್ತಿದ್ದಾರೆ.

ಬಾಲಿವುಡ್​ ನಟ ಅಭಿಷೇಕ್ ಬಚ್ಚನ್ ಮತ್ತು ಯಾಮಿ ಗೌತಮ್ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿರುವ ಹಾಸ್ಯ ಚಿತ್ರ 'ದಸ್ವಿ' ಟ್ರೈಲರ್ ಬುಧವಾರ ಬಿಡುಗಡೆಯಾಗಿದ್ದು, ಅಭಿಮಾನಿಗಳಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಸಿನಿಮಾವು​ ಏಪ್ರಿಲ್ 7 ರಂದು ನೆಟ್ ಫ್ಲಿಕ್ಸ್ ಮತ್ತು ಜಿಯೋ ಸಿನಿಮಾ ಓಟಿಟಿಯಲ್ಲಿ ಬಿಡುಗಡೆಯಾಗಲಿದ್ದು, ಫ್ಯಾನ್ಸ್​ ಕಾತುರದಿಂದ ಕಾಯುತ್ತಿದ್ದಾರೆ.

ಹರಿಯಾಣ ಮಾಜಿ ಮುಖ್ಯಮಂತ್ರಿ ಓಂ ಪ್ರಕಾಶ್ ಚೌಟಾಲ ಆಗಿ ಅಭಿಷೇಕ್ ಬಚ್ಚನ್ , ಐಪಿಎಸ್ ಪಾತ್ರದಲ್ಲಿ ಯಾಮಿ ಗೌತಮ್ ಸೇರಿದಂತೆ ನಿಮ್ರತ್ ಕೌರ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಚೌಟಾಲ ಅವರ ಜೀವನದಲ್ಲಿ ನಡೆದ ನೈಜ ಘಟನೆ ಆಧಾರಿತ ಸಿನಿಮಾ ಇದಾಗಿದ್ದು, ಹರಿಯಾಣದಲ್ಲಿ ನಡೆದ ಶಿಕ್ಷಕರ ನೇಮಕಾತಿ ಹಗರಣಕ್ಕೆ ಸಂಬಂಧಿಸಿದಂತೆ ಬಂಧಿತರಾಗಿದ್ದ ಓಂ ಪ್ರಕಾಶ್ ಜೈಲಿನಲ್ಲಿ ಇದ್ದುಕೊಂಡು ತಮ್ಮ 80ನೇ ವಯಸ್ಸಲ್ಲಿ 10ನೇ ತರಗತಿ ಪಾಸ್ ಮಾಡಿದ ಘಟನೆ ಆಧಾರಿತ ಚಿತ್ರ ಇದಾಗಿದೆ.

ಈ ಸಿನಿಮಾಕ್ಕೆ ನಿರ್ಮಾಪಕ ದಿನೇಶ್ ವಿಜನ್ ಬಂಡವಾಳ ಹೂಡುತ್ತಿದ್ದಾರೆ. 'ದಸ್ವಿ'ಯಲ್ಲಿ ನಟ ಅಭಿಷೇಕ್ ಬಚ್ಚನ್ ಕುರ್ತಾ- ಪೈಜಾಮಾ, ನೆಹರೂ ಜಾಕೆಟ್ ಮತ್ತು ಪೇಟ ಧರಿಸಿ ಮಿಂಚುತ್ತಿದ್ದಾರೆ.