ಮುಂಬೈನ ಕಿರುತೆರೆ ನಟಿ ದಿವ್ಯಾ ಭಟ್ನಾಗರ್​ ಕೊರೊನಾಗೆ ಬಲಿ

ಸ್ಟಾರ್​ ಪ್ಲಸ್​ನಲ್ಲಿ ಪ್ರಸಾರವಾಗುತ್ತಿದ್ದ ಜನಪ್ರಿಯ ಧಾರಾವಾಹಿ 'ಯೆ ರಿಶ್ತಾ ಕ್ಯಾ ಕೆಹೆತಾ ಹೈ' ನಲ್ಲಿ ನಟಿಸಿದ್ದ ಕಿರುತೆರೆ ನಟಿ ದಿವ್ಯಾ ಭಟ್ನಾಗರ್ ಕೊರೊನಾ ಸೋಂಕು ಹಾಗೂ ತೀವ್ರ ಅನಾರೋಗ್ಯದಿಂದ ಇಂದು ಮುಂಬೈನಲ್ಲಿ ಅಸುನೀಗಿದ್ದಾರೆ. ಅವರಿಗೆ ಕೇವಲ 34 ವರ್ಷ ವಯಸ್ಸಾಗಿತ್ತು.

ಮುಂಬೈ:ಕೋವಿಡ್​- 19 ಮತ್ತು ನ್ಯುಮೋನಿಯಾದಿಂದ ಬಳಲುತ್ತಿದ್ದ ಕಿರುತೆರೆ ನಟಿ ದಿವ್ಯಾ ಭಟ್ನಾಗರ್​ (34) ಅವರು ಇಂದು ಬೆಳಗ್ಗೆ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾರೆ.

ಕೊರೊನಾ ಸೋಂಕು ತಗುಲಿದ್ದ ಹಿನ್ನೆಲೆ ಅವರನ್ನು ಕಳೆದ ನವೆಂಬರ್​​​ನಲ್ಲಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಕಳೆದ ವಾರ ಆರೋಗ್ಯ ತೀವ್ರ ಹದಗೆಟ್ಟ ಹಿನ್ನೆಲೆ ವೆಂಟಿಲೇಟರ್ ಅಳವಡಿಸಲಾಗಿತ್ತು. ಈ ಹಿನ್ನೆಲೆ ದಿವ್ಯಾ ಕುಟುಂಬ ಹೆಚ್ಚಿನ ಚಿಕಿತ್ಸೆಗಾಗಿ ಅವರನ್ನು ಬೇರೆ ಆಸ್ಪತ್ರೆಗೆ ಸ್ಥಳಾಂತರಿಸಿತ್ತು.ನವೆಂಬರ್‌ನಲ್ಲಿ ದಿವ್ಯಾ ಸ್ಥಿತಿ ಗಂಭೀರವಾದ ಕಾರಣ ನಾನು ಮತ್ತು ನನ್ನ ಮಗ ದೆಹಲಿಯಿಂದ ಮುಂಬೈಗೆ ಬಂದೆವು ಎಂದು ದಿವ್ಯಾ ತಾಯಿ ತಿಳಿಸಿದ್ದಾರೆ.

ದಿವ್ಯಾ ಭಟ್ನಾಗರ್​​ ಹಾಸ್ಯ ಕಾರ್ಯಕ್ರಮವಾದ 'ತೇರಾ ಯಾರ್ ಹೂ ಮೇ' ನಲ್ಲಿ ಅವರು ರೀನಾ ಅಗರ್ವಾಲ್ ಪಾತ್ರ ಮಾಡುತ್ತಿದ್ದರು. ಆದರೆ ತೀವ್ರ ಅನಾರೋಗ್ಯ ಹಿನ್ನೆಲೆ ಶೋ ಶೂಟಿಂಗ್​ ಸೆಟ್​ನಿಂದಲೇ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು.

ದಿವ್ಯಾ ಭಟ್ನಾಗರ್​ 'ಯೆ ರಿಶ್ತಾ ಕ್ಯಾ ಕೆಹೆತಾ ಹೈ', ಸಂಸ್ಕಾರ್, ಉಡಾನ್, ಜೀತ್ ಗೈ ತೋಹ್ ಪಿಯಾ ಮೊರೆ, ವಿಶ್ ಮತ್ತು ಸ್ಯಾನ್ವೇರ್ ಸಬ್ಕೊ ಪ್ರೀತೋ ಮುಂತಾದ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡು ಗಮನ ಸೆಳೆದಿದ್ದರು.

ಇನ್ನು ದೇವೊಲೀನಾ ಭಟ್ಟಾಚಾರ್​ ಸೇರಿದಂತೆ ಅವರ ಅನೇಕ ಸಹೋದ್ಯೋಗಿಗಳು ಸಾಮಾಜಿಕ ಜಾಲತಾಣಗಳ ಮೂಲಕ ಮೃತ ದಿವ್ಯಾ ಅವರಿಗೆ ಶ್ರದ್ಧಾಂಜಲಿ ಅರ್ಪಿಸಿದ್ದಾರೆ.