ವರ್ಚುವಲ್ ರಿಯಾಲಿಟಿಯಿಂದ ಮಾನವರ ಫೋಬಿಯಾ ನಿವಾರಣೆ ಸಾಧ್ಯ!

ವರ್ಚುವಲ್ ರಿಯಾಲಿಟಿ ತಂತ್ರಜ್ಞಾನದ ಮೂಲಕ ಮಾನವರಲ್ಲಿನ ಫೋಬಿಯಾಗಳಿಗೆ ಚಿಕಿತ್ಸೆ ನೀಡಬಬಹುದು ಎಂದು ಹೊಸ ಸಂಶೋಧನೆ ತೋರಿಸಿದೆ.

ವಾಷಿಂಗ್ಟನ್ :ವರ್ಚುವಲ್ ರಿಯಾಲಿಟಿ (ವಿಆರ್) ತಂತ್ರಜ್ಞಾನದ ಅನುಭವಗಳು ಮಾನವರಲ್ಲಿನ ಭಯ ಮತ್ತು ಫೋಬಿಯಾಗಳ ಬಗ್ಗೆ ತನಿಖೆ ಮಾಡಲು ಮತ್ತು ಅವುಗಳಿಗೆ ಚಿಕಿತ್ಸೆ ನೀಡಲು ಹೊಸ ಮಾರ್ಗವಾಗಿ ಹೊರಹೊಮ್ಮಿವೆ ಎಂದು ಹೊಸ ಅಧ್ಯಯನವೊಂದು ತಿಳಿಸಿದೆ. ವರ್ಚುವಲ್ ಆಕೃತಿಯೊಂದು ತಮಗೆ ಹೊಡೆಯಬಹುದು ಎಂದು ತಿಳಿದ ನಂತರ ಮಾನವನು ನಿರ್ದಿಷ್ಟ ದೇಹದ ಚಲನೆಯ ಮಾದರಿಗಳನ್ನು ಬೆಳೆಸಿಕೊಳ್ಳುತ್ತಾನೆ ಎಂದು ವಿಆರ್ ಪ್ರಯೋಗಗಳನ್ನು ನಡೆಸಿದ ಸೋನಿ ಕಂಪ್ಯೂಟರ್ ಸೈನ್ಸ್ ಲ್ಯಾಬೊರೇಟರೀಸ್​ನ ಐ ಕೊಯಿಜುಮಿ ನೇತೃತ್ವದ ಸಂಶೋಧಕರು ಕಂಡು ಹಿಡಿದಿದ್ದಾರೆ.

ಈ ಸಂಶೋಧನೆಯಲ್ಲಿ, ಭಯದಲ್ಲಿರುವಾಗ ದೇಹದ ಚಲನೆಗಳು ಹೇಗಿರುತ್ತವೆ ಎಂಬುದನ್ನು ಪತ್ತೆ ಮಾಡಲಾಗಿದ್ದು, ಭಯ ಮತ್ತು ಆಘಾತದ ನೆನಪುಗಳನ್ನು ನಿವಾರಣೆ ಮಾಡಲು ಇದನ್ನು ಬಳಸಿಕೊಳ್ಳಬಹುದು ಎಂದು ತಿಳಿದು ಬಂದಿದೆ. ಎತ್ತರದ ಬಗ್ಗೆ ಭಯ ಹೊಂದಿರುವವರನ್ನು ಸಕ್ರಿಯ ವರ್ಚುವಲ್ ರಿಯಾಲಿಟಿ ಹಾರಾಟದ ಅನುಭವಕ್ಕೆ ಒಳಪಡಿಸಿದ ನಂತರ ಅವರು ಭಯದ ಬಗ್ಗೆ ಕಡಿಮೆ ದೇಹದ ಚಲನೆಯನ್ನು ತೋರಿಸುತ್ತಾರೆಯೇ ಎಂಬುದನ್ನು ಕೂಡ ಈ ಸಂದರ್ಭದಲ್ಲಿ ಎನ್ಐಸಿಟಿ ಮತ್ತು ಒಸಾಕಾ ವಿಶ್ವವಿದ್ಯಾಲಯದ ಮಸಾಹಿಕೊ ಹರುನೊ ನೇತೃತ್ವದ ಸಂಶೋಧಕರ ತಂಡವು ಅಧ್ಯಯನ ಮಾಡಿದೆ.

ವರ್ಚುವಲ್ ರಿಯಾಲಿಟಿ ಫ್ಲೈಟ್ ಅನುಭವದಲ್ಲಿ, ಪ್ರಯೋಗಾರ್ಥಿಗಳು ನಗರದ ಮೇಲೆ ತಾವು ಹಾರಾಡುತ್ತಿರುವ ವೀಡಿಯೊವನ್ನು ನಿಯಂತ್ರಿಸಲು ಸಫಲರಾದರು. ಇವರು ಚಲನೆಯನ್ನು ನಿಯಂತ್ರಿಸದೆ ಹಾರಾಟವನ್ನು ವೀಕ್ಷಿಸಿದರು. ವರ್ಚುವಲ್ ಫ್ಲೈಟ್ ಅನುಭವದಲ್ಲಿ ಭಾಗವಹಿಸಿದ ನಂತರ, ವರ್ಚುವಲ್ ರಿಯಾಲಿಟಿಯಲ್ಲಿ ಎತ್ತರದ ಗೋಡೆಯ ಮೇಲೆ ನಡೆಯುವಂತೆ ಹೇಳಿದಾಗ ಅವರು ಕಡಿಮೆ ಭಯ ಹೊಂದಿದ್ದರು.

ಎತ್ತರಗಳ ಭಯ ಮತ್ತು ಇತರ ಫೋಬಿಯಾಗಳಿಗೆ ವರ್ಚುವಲ್ ರಿಯಾಲಿಟಿ ಅನುಭವಗಳ ಮೂಲಕ ಚಿಕಿತ್ಸೆ ನೀಡಲು ಸಾಧ್ಯವಾಗಬಹುದು ಎಂಬುದನ್ನು ಈ ಸಂಶೋಧನೆಗಳು ತೋರಿಸಿವೆ. ಸಂಶೋಧನೆಯಲ್ಲಿ ಭಾಗವಹಿಸಿದ್ದ ಮಾನವರು ಮತ್ತು ಇದರಲ್ಲಿ ಬಳಸಲಾದ ಪ್ರಾಣಿಗಳ ಮಾದರಿಗಳು ಮೆದುಳಿನ ಮೇಲೆ ಉಂಟಾಗುವ ಭಯ ಮತ್ತು ಒತ್ತಡದ ಪರಿಣಾಮಗಳನ್ನು ತೋರಿಸಿವೆ ಮತ್ತು ಇದರ ಮೂಲಕ ಭಯವನ್ನು ಹೇಗೆ ನಿವಾರಿಸಬಹುದು ಎಂಬ ಬಗ್ಗೆ ಬೆಳಕು ಚೆಲ್ಲಿವೆ.

"ಅನೇಕ ಜನರು ಅತಿಯಾದ ಭಯ ಮತ್ತು ದೀರ್ಘಕಾಲದ ಮಾನಸಿಕ ಒತ್ತಡ ಮತ್ತು ದೈಹಿಕ ಆರೋಗ್ಯದ ಸಮಸ್ಯೆಗಳೊಂದಿಗೆ ಹೋರಾಡುತ್ತಿದ್ದಾರೆ" ಎಂದು ಮೇರಿಲ್ಯಾಂಡ್ ವಿಶ್ವವಿದ್ಯಾಲಯದ ಮೇರಿಲ್ಯಾಂಡ್ ನ್ಯೂರೋಇಮೇಜಿಂಗ್ ಕೇಂದ್ರದ ನಿರ್ದೇಶಕ ಮತ್ತು ಮನಃಶಾಸ್ತ್ರದ ಪ್ರಾಧ್ಯಾಪಕ ಲೂಯಿಜ್ ಪೆಸ್ಸೊವಾ ಹೇಳಿದರು.

ಸಂಶೋಧನೆಗಳು ಭಯ ಮತ್ತು ಒತ್ತಡವು ಮೆದುಳಿನ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬುದರ ಮೇಲೆ ಬೆಳಕು ಚೆಲ್ಲುತ್ತದೆ ಮತ್ತು ಅನಗತ್ಯ ಭಯಗಳನ್ನು ತೊಡೆದುಹಾಕಲು ಹೊಸ ಮಾರ್ಗಗಳನ್ನು ತೋರಿಸಿದೆ. ಸೋಮವಾರ ನಡೆಯಲಿರುವ ಮೆದುಳು ವಿಜ್ಞಾನ ಮತ್ತು ಆರೋಗ್ಯದ ಬಗೆಗಿನ ವಿಶ್ವದ ಅತಿದೊಡ್ಡ ಸಮಾವೇಶ ನ್ಯೂರೋಸೈನ್ಸ್​ 2023 ಯಲ್ಲಿ ಈ ಸಂಶೋಧನೆಯ ವರದಿಗಳನ್ನು ಪ್ರಕಟಿಸಲಾಗುತ್ತಿದೆ.

ಇದನ್ನೂ ಓದಿ : 2022ರಲ್ಲಿ ಜಾಗತಿಕವಾಗಿ 7.5 ಮಿಲಿಯನ್ ಜನರಲ್ಲಿ ಕ್ಷಯ ರೋಗ ಪತ್ತೆ: WHO