ಚೀನಾ ಸೇರಿ ಪೂರ್ವ ಏಷ್ಯಾ ರಾಷ್ಟ್ರಗಳ ಆರ್ಥಿಕತೆ ಮೇಲೆ ಕೊರೊನಾ ಹೊಡೆತ

ಕೋವಿಡ್-19 ವಿಶ್ವದ 185ಕ್ಕೂ ಹೆಚ್ಚು ರಾಷ್ಟ್ರಗಳನ್ನು ಇನ್ನಿಲ್ಲದಂತೆ ಕಾಡುತ್ತಿದೆ. ವೈರಸ್‌ ಹರಡುವುದನ್ನು ತಡೆಯುವ ಸಲುವಾಗಿ ತೆಗೆದುಕೊಂಡು ಕಠಿಣ ಮುನ್ನೆಚ್ಚರಿಕಾ ಕ್ರಮಗಳು ವಿಶ್ವವನ್ನೇ ಸ್ತಬ್ಧವನ್ನಾಗಿಸಿದೆ. ಯಾವುದೇ ರೀತಿಯ ಅಂತರರಾಷ್ಟ್ರೀಯ ವ್ಯಾಪಾರ-ವಹಿವಾಟುಗಳು ನಡೆಯುತ್ತಿಲ್ಲ. ಅಂಗಡಿ- ಮುಂಗಟ್ಟುಗಳು ಬಂದ್ ಆಗಿವೆ. ಜನಜೀವನ ಸಂಪೂರ್ಣ ನಿಂತುಹೋಗಿದೆ. ಈ ನಡುವೆ ಚೀನಾಗೆ ವಿಶ್ವಬ್ಯಾಂಕ್ ಎಚ್ಚರಿಕೆ ಕೊಟ್ಟಿದೆ.

ವಾಷಿಂಗ್ಟನ್: ಕೊರೊನಾ ವೈರಸ್ ಸಾಂಕ್ರಾಮಿಕ ರೋಗ ಚೀನಾದ ಆರ್ಥಿಕಾಭಿವೃದ್ಧಿಯನ್ನು ಸಂಪೂರ್ಣ ಬುಡಮೇಲು ಮಾಡಬಹುದು ಎಂದು ವಿಶ್ವ ಬ್ಯಾಂಕ್ ಗಂಭೀರ ಎಚ್ಚರಿಕೆ ಕೊಟ್ಟಿದೆ. ಈ ಮೂಲಕ ಪೂರ್ವ ಏಷ್ಯಾ ಭಾಗದಲ್ಲಿ ಸುಮಾರು 11 ಮಿಲಿಯನ್‌ (1 ಕೋಟಿಗೂ ಹೆಚ್ಚು) ಮಂದಿ ಬಡತನದ ಕೂಪಕ್ಕೆ ಬೀಳಲಿದ್ದಾರೆ ಎಂದು ಹೇಳಿದೆ.

ಈಗಾಗಲೇ ಜಗತ್ತಿನ ಆರ್ಥಿಕ ಬೆಳವಣಿಗೆಯನ್ನು ಕೊರೊನಾ ರೋಗ ಅಲ್ಲೋಲ ಕಲ್ಲೋಲ ಮಾಡುತ್ತಿದೆ. ಕೊರೊನಾ ರೋಗದ ಹರಡುವಿಕೆ ಪೂರ್ವ ಏಷ್ಯಾ ಭಾಗದ ದೇಶಗಳನ್ನು ತೀವ್ರವಾಗಿ ಕಾಡಲಿದೆ ಎನ್ನುವ ಭವಿಷ್ಯವನ್ನು ವಿಶ್ವಬ್ಯಾಂಕ್‌ನ ಮುಖ್ಯ ಆರ್ಥಿಕ ತಜ್ಞ ಆದಿತ್ಯ ಮಟ್ಟು ನುಡಿದಿದ್ದಾರೆ.

ಕೊರೊನಾ ಹೊರತಾದ ಅತ್ಯುತ್ತಮ ಪರಿಸ್ಥಿತಿಯಲ್ಲೂ ಈ ಪ್ರದೇಶ ಆರ್ಥಿಕ ಹೊಡೆತಕ್ಕೆ ಗುರಿಯಾಗಲಿರುವುದು ನಿಸ್ಸಂಶಯ. ಯಾಕೆಂದರೆ, 2019 ರಲ್ಲಿ ಚೀನಾದ ಆರ್ಥಿಕ ವೃದ್ಧಿ ಶೇ 2.3 ರ ಪ್ರಮಾಣದ ನಿಧಾನಗತಿಯಲ್ಲಿ ಸಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.