ಪಿಯು ಗಣಿತದಲ್ಲಿ ಫೇಲ್‌, ಆತ್ಮಹತ್ಯೆಗೆ ಶರಣಾದ ಸಂಸದನ ಸೋದರಳಿಯ

ಸಂಸತ್‌ ಸದಸ್ಯರೊಬ್ಬರ ಸೋದರಳಿಯ ಪರೀಕ್ಷೆಯಲ್ಲಿ ಫೇಲ್ ಆಗಿರುವುದಕ್ಕೆ ಮನನೊಂದು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ನಡೆದಿದೆ.

ಹೈದರಾಬಾದ್​:ಪರೀಕ್ಷೆಯಲ್ಲಿ ಅನುತ್ತೀರ್ಣಗೊಂಡ ಹಿನ್ನೆಲೆಯಲ್ಲಿ ಟಿಡಿಪಿ ಸಂಸದನ ಸೋದರಳಿಯ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ತೆಲಂಗಾಣದ ಹೈದರಾಬಾದ್​ನಲ್ಲಿ ನಡೆದಿದೆ.

ರಾಜ್ಯಸಭಾ ಸದಸ್ಯ ಮತ್ತು ತೆಲುಗು ದೇಶಂ ಪಕ್ಷದ ನಾಯಕ ಸಿಎಂ ರಮೇಶ್​ ಸೋದರಳಿಯ ಧರ್ಮರಾಮ್​ ಆತ್ಮಹತ್ಯೆಗೆ ಶರಣಾದ ವಿದ್ಯಾರ್ಥಿ. ಇಲ್ಲಿನ ಅಮೀರ್​ಪೇಟ್​ನ ಕಾಲೇಜಿ​ನಲ್ಲಿ ಪಿಯು ವ್ಯಾಸಂಗ​ ಮಾಡುತ್ತಿದ್ದು, ಗಣಿತ ವಿಷಯದಲ್ಲಿ ಫೇಲ್​ ಆಗಿದ್ದರು. ಈ ಹಿನ್ನೆಲೆಯಲ್ಲಿ ತೀವ್ರವಾಗಿ ನೊಂದು ವಿದ್ಯಾರ್ಥಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ ಎನ್ನಲಾಗಿದೆ.

ತನ್ನ ಸೋದರತ್ತೆಗೆ ಮೊಬೈಲ್‌ನಿಂದ ಮೆಸೇಜ್​ ಕಳುಹಿಸಿರುವ ಧರ್ಮರಾಜ್‌ ಬಳಿಕ, ಮನೆಯಿರುವ ಕಟ್ಟಡದ ಆರನೇ ಅಂತಸ್ತಿನ ಮೇಲಿಂದ ಜಿಗಿದಿದ್ದಾರೆ. ಈ ಸಂದರ್ಭ ಜೋರಾಗಿ ಶಬ್ಧ ಕೇಳಿಬಂದ ಹಿನ್ನೆೆಲೆಯಲ್ಲಿ ಧರ್ಮರಾಜ್ ಸಹೋದರಿ ಕೆಳಗೆ ಬಂದು ನೋಡಿದ್ದಾರೆ. ಆಗ ತನ್ನ ಸಹೋದರ ರಕ್ತದ ಮಡುವಿನಲ್ಲಿರುವುದು ಕಂಡುಬಂದಿದೆ. ತಕ್ಷಣ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸುವ ಕೆಲಸ ಮಾಡಲಾಯಿತಾದರೂ ಪ್ರಯೋಜನವಾಗದೆ, ಅವರು ಕೊನೆಯುಸಿರೆಳೆದಿದ್ದಾರೆ.