ಬಂಧಿತ ಅಲ್-ಖೈದಾ ಉಗ್ರರು ಎನ್​ಐಎ ಕಸ್ಟಡಿಗೆ

ಕೇರಳದ ಎರ್ನಾಕುಲಂನಲ್ಲಿ ಅರೆಸ್ಟ್​ ಆಗಿದ್ದ ಮುರ್ಷಿದ್ ಹಸನ್, ಯಾಕುಬ್ ಬಿಸ್ವಾಸ್, ಮುಷರಫ್ ಹೊಸೆನ್ ಹೆಸರಿನ ಉಗ್ರರನ್ನು ಇಂದು ಕೊಚ್ಚಿಯ ಎರ್ನಾಕುಲಂ ಕೋರ್ಟ್​ ಮುಂದೆ ಹಾಜರು ಪಡಿಸಲಾಗಿತ್ತು..

ಎರ್ನಾಕುಲಂ :ಕೇರಳದ ಎರ್ನಾಕುಲಂನಲ್ಲಿ ಅರೆಸ್ಟ್​ ಆಗಿದ್ದ ಅಲ್-ಖೈದಾ ಸಂಘಟನೆಯ ಮೂವರು ಉಗ್ರರನ್ನು ಎರ್ನಾಕುಲಂ ನ್ಯಾಯಾಲಯ ಎನ್​ಐಎ ಕಸ್ಟಡಿಗೆ ನೀಡಿದೆ. ನಿನ್ನೆ ಅನೇಕ ಸ್ಥಳಗಳಲ್ಲಿ ಏಕಕಾಲದಲ್ಲಿ ದಾಳಿ ನಡೆಸಿದ್ದ ರಾಷ್ಟ್ರೀಯ ತನಿಖಾ ದಳ (ಎನ್‌ಐಎ), ಪಶ್ಚಿಮ ಬಂಗಾಳದಲ್ಲಿ ಆರು ಮತ್ತು ಕೇರಳದಲ್ಲಿ ಮೂವರು ಉಗ್ರರನ್ನು ಬಂಧಿಸಿತ್ತು.

ಬಂಧಿತ 9 ಉಗ್ರರು ಪಾಕಿಸ್ತಾನ ಪ್ರಾಯೋಜಿತ ಅಲ್-ಖೈದಾ ಸಂಘಟನೆಗೆ ಸೇರಿದವರಾಗಿದ್ದರು. ಇವರು ಪಟಾಕಿಯಲ್ಲಿನ ಪೊಟ್ಯಾಶಿಯಂ ಬಳಸಿ ಸುಧಾರಿತ ಸ್ಫೋಟಕಗಳನ್ನು ತಯಾರಿಸಿದ್ದರು. ಅಲ್ಲದೇ ವಿವಿಧೆಡೆ ಸ್ಫೋಟಕ್ಕೆ ಸಂಚು ರೂಪಿಸಿದ್ದರು ಎಂಬ ಮಾಹಿತಿ ತನಿಖೆ ವೇಳೆ ಬಹಿರಂಗವಾಗಿತ್ತು.

ಕೇರಳದ ಎರ್ನಾಕುಲಂನಲ್ಲಿ ಅರೆಸ್ಟ್​ ಆಗಿದ್ದ ಮುರ್ಷಿದ್ ಹಸನ್, ಯಾಕುಬ್ ಬಿಸ್ವಾಸ್, ಮುಷರಫ್ ಹೊಸೆನ್ ಹೆಸರಿನ ಉಗ್ರರನ್ನು ಇಂದು ಕೊಚ್ಚಿಯ ಎರ್ನಾಕುಲಂ ಕೋರ್ಟ್​ ಮುಂದೆ ಹಾಜರು ಪಡಿಸಲಾಗಿತ್ತು. ವಿಚಾರಣೆ ನಡೆಸಿದ ನ್ಯಾಯಾಲಯ ಉಗ್ರರನ್ನು ಎನ್​ಐಎ ಕಸ್ಟಡಿಗೆ ನೀಡಿ ಆದೇಶಿಸಿದೆ. ಹೀಗಾಗಿ, ಉಗ್ರರನ್ನು ಕೊಚ್ಚಿಯಿಂದ ದೆಹಲಿಯಲ್ಲಿರುವ ಎನ್‌ಐಎ ಕಚೇರಿಗೆ ಕರೆದಂತು, ವಿಚಾರಣೆ ನಡೆಸಲಾಗುವುದು.