ಹಮಾಸ್​ ಜೊತೆಗೂಡಿದ ಇತರ ಉಗ್ರರು; ಖಾನ್ ಯೂನಿಸ್​ನಲ್ಲಿ ಭೀಕರ ಸಂಘರ್ಷ

ಗಾಜಾದ ಖಾನ್ ಯೂನಿಸ್ ಪ್ರದೇಶದಲ್ಲಿ ಇಸ್ರೇಲ್ ಮಿಲಿಟರಿ ಕಾರ್ಯಾಚರಣೆ ತೀವ್ರಗೊಂಡಿದೆ.

ಟೆಲ್ ಅವೀವ್ : ದಕ್ಷಿಣ ಗಾಜಾದ ಖಾನ್ ಯೂನಿಸ್ ಪ್ರದೇಶದಲ್ಲಿ ಇಸ್ರೇಲ್ ರಕ್ಷಣಾ ಪಡೆಗಳು (ಐಡಿಎಫ್) ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದೆ. ಫೆಲೆಸ್ತೀನ್ ಇಸ್ಲಾಮಿಕ್ ಜಿಹಾದ್ (ಪಿಐಜೆ) ಮತ್ತು ಫತಾಹ್​ನ ಅಲ್-ಅಕ್ಸಾ ಹುತಾತ್ಮರ ಬ್ರಿಗೇಡ್ ಉಗ್ರರ ಗುಂಪುಗಳು ಹಮಾಸ್​ನ ಮಿಲಿಟರಿ ವಿಭಾಗ ಅಲ್-ಖಾಸ್ಸಾಮ್ ಬ್ರಿಗೇಡ್​ನೊಂದಿಗೆ ಕೈಜೋಡಿಸಿ ಇಸ್ರೇಲ್ ವಿರುದ್ಧ ಹೋರಾಡುತ್ತಿವೆ ಎಂಬ ವರದಿಗಳ ನಂತರ ಇಸ್ರೇಲ್ ಈ ಪ್ರದೇಶದಲ್ಲಿ ತನ್ನ ದಾಳಿಗಳಲ್ಲಿನ ತೀವ್ರತೆಯನ್ನು ಹೆಚ್ಚಿಸಿದೆ.

ದಕ್ಷಿಣ ಗಾಜಾದಲ್ಲಿ ಐಡಿಎಫ್ ಪ್ರಮುಖವಾದ ಪ್ರಗತಿ ಸಾಧಿಸಿದೆ ಮತ್ತು ಅನೇಕ ಭಯೋತ್ಪಾದಕರನ್ನು ಕೊಲ್ಲಲಾಗಿದೆ ಎಂದು ಇಸ್ರೇಲ್ ರಕ್ಷಣಾ ಸಚಿವಾಲಯದ ಮೂಲಗಳು ಐಎಎನ್ಎಸ್​ಗೆ ತಿಳಿಸಿವೆ. ಇತರ ಫೆಲೆಸ್ತೀನ್ ಉಗ್ರಗಾಮಿ ಗುಂಪುಗಳ ಸೇರ್ಪಡೆಯು ಹಮಾಸ್ ನ ಯುದ್ಧ ಶಕ್ತಿಯನ್ನು ಹೆಚ್ಚಿಸಿದೆ. ಖಾನ್ ಯೂನಿಸ್​ನಲ್ಲಿ ನಡೆಯುತ್ತಿರುವ ತೀವ್ರ ಹೋರಾಟದಲ್ಲಿ ಹಮಾಸ್​ ಉಗ್ರರು ಟ್ಯಾಂಕ್ ವಿರೋಧಿ ಕ್ಷಿಪಣಿಗಳು, ರಾಕೆಟ್ ಚಾಲಿತ ಗ್ರೆನೇಡ್​ಗಳು ಮತ್ತು ಮೋರ್ಟಾರ್​ಗಳನ್ನು ಬಳಸುತ್ತಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಯುದ್ಧದಲ್ಲಿ ಹೊಸ ಉಗ್ರಗಾಮಿ ಗುಂಪುಗಳ ಸೇರ್ಪಡೆಯಿಂದ ಈ ಪ್ರದೇಶದಲ್ಲಿ ಮದ್ದುಗುಂಡುಗಳ ಬಲವನ್ನು ಹೆಚ್ಚಿಸಿದೆ ಎಂದು ಯುಎಸ್ ಮೂಲದ ಥಿಂಕ್ ಟ್ಯಾಂಕ್​ ಆಗಿರುವ ಇನ್​ಸ್ಟಿಟ್ಯೂಟ್​ ಫಾರ್ ದಿ ಸ್ಟಡಿ ಆಫ್ ವಾರ್ (ಐಎಸ್ಡಬ್ಲ್ಯೂ) ಮತ್ತು ಕ್ರಿಟಿಕಲ್ ಥ್ರೆಟ್ಸ್ ಪ್ರಾಜೆಕ್ಟ್ (ಸಿಟಿಪಿ) ಹೇಳಿದೆ. ಹಮಾಸ್​ನ ಉನ್ನತ ನಾಯಕರಾದ ಮೊಹಮ್ಮದ್ ದೀಫ್ ಮತ್ತು ಯಾಹ್ಯಾ ಸಿನ್ವರ್ ಇಬ್ಬರೂ ಖಾನ್ ಯೂನಿಸ್ ಸುರಂಗ ಜಾಲದಲ್ಲಿ ಅಡಗಿದ್ದಾರೆ ಎಂದು ನಂಬಲಾಗಿದೆ.

ಕಾಣೆಯಾದ ಮೂವರ ಬಗ್ಗೆ ಹುಡುಕಾಟ: ಅಕ್ಟೋಬರ್ 2023 ರ ಹಮಾಸ್ ದಾಳಿಯ ನಂತರ ಕಾಣೆಯಾಗಿರುವ ಮೂವರು ಇಸ್ರೇಲಿಗಳನ್ನು ಗಾಜಾದಲ್ಲಿ ಒತ್ತೆಯಾಳುಗಳಾಗಿ ಇರಿಸಿಕೊಳ್ಳಲಾಗಿದೆ ಎಂದು ಇಸ್ರೇಲ್ ರಕ್ಷಣಾ ಪಡೆ (ಐಡಿಎಫ್) ವಕ್ತಾರರು ಹೇಳಿದ್ದಾರೆ. ಗಾಜಾದಲ್ಲಿ ಬಂಧಿತರಾಗಿರುವ ಒತ್ತೆಯಾಳುಗಳ ಅಧಿಕೃತ ಸಂಖ್ಯೆಯು ಇತ್ತೀಚಿನ ಗುಪ್ತಚರ ಮಾಹಿತಿಯ ನಂತರ ಏರಿಳಿತಗೊಳ್ಳಬಹುದು ಎಂದು ಐಡಿಎಫ್ ವಕ್ತಾರ ರಿಯರ್ ಅಡ್ಮಿರಲ್ ಡೇನಿಯಲ್ ಹಗರಿ ಗುರುವಾರ ತಡರಾತ್ರಿ ಹೇಳಿಕೆಯಲ್ಲಿ ತಿಳಿಸಿದ್ದಾರೆ ಎಂದು ಸಿಎನ್ಎನ್ ವರದಿ ಮಾಡಿದೆ. ಆದಾಗ್ಯೂ, ಕಾಣೆಯಾದ ಮೂವರು ಇಸ್ರೇಲಿಗಳ ಹೆಸರನ್ನು ಅವರು ಬಹಿರಂಪಡಿಸಲಿಲ್ಲ.

ನವೆಂಬರ್ 24 ರಿಂದ 30 ರ ನಡುವಿನ ಕದನ ವಿರಾಮದ ಸಮಯದಲ್ಲಿ, 86 ಇಸ್ರೇಲಿ ಮತ್ತು 24 ವಿದೇಶಿ ಪ್ರಜೆ ಒತ್ತೆಯಾಳುಗಳನ್ನು ಬಿಡುಗಡೆ ಮಾಡಲಾಯಿತು. ಪ್ರಸ್ತುತ, ಸುಮಾರು 128 ಇಸ್ರೇಲಿಗಳು ಮತ್ತು ವಿದೇಶಿ ಪ್ರಜೆಗಳು ಗಾಜಾದಲ್ಲಿ ಬಂಧಿಗಳಾಗಿದ್ದಾರೆ ಎಂದು ಇಸ್ರೇಲ್ ಅಧಿಕಾರಿಗಳು ಅಂದಾಜಿಸಿದ್ದಾರೆ.

ಇದನ್ನೂ ಓದಿ: ತೆರಿಗೆ ಆದಾಯ ಹೆಚ್ಚಳಕ್ಕಾಗಿ ಸಿಗರೇಟು ನಿಷೇಧ ಹಿಂಪಡೆದ ನ್ಯೂಜಿಲೆಂಡ್​, ಮಲೇಷ್ಯಾ