ಕಾಬೂಲ್ (ಅಫ್ಘಾನಿಸ್ತಾನ): ಇಡೀ ಅಫ್ಘಾನಿಸ್ತಾನವನ್ನೇ ತಾಲಿಬಾನ್ ವಶಪಡಿಸಿಕೊಂಡಿದ್ದರೂ ಕಾಬೂಲ್‌ನ ಈಶಾನ್ಯದಿಂದ 100 ಕಿಲೋಮೀಟರ್‌ಗಳಷ್ಟು ದೂರದಲ್ಲಿರುವ ಪಂಜ್‌ಶೀರ್ ಪ್ರಾಂತ್ಯ ಈಗಲೂ ಕೂಡ ತಾಲಿಬಾನ್ ಮುಕ್ತವಾಗಿರುವ ಏಕೈಕ ಪ್ರದೇಶವಾಗಿದೆ. ಈ ಪ್ರಾಂತ್ಯವನ್ನು ಇಲ್ಲಿಯವರೆಗೆ ಯಾವ ವಿದೇಶಿಗರೂ ಹಾಗೂ ತಾಲಿಬಾನಿಗಳು ಸ್ವಾಧೀನಪಡಿಸಿಕೊಳ್ಳಲು ಸಾಧ್ಯವಾಗಿಲ್ಲ.
ಅಫ್ಘಾನಿಸ್ತಾನದ 34 ಪ್ರಾಂತ್ಯಗಳಲ್ಲಿ ಒಂದಾಗಿರುವ ಪಂಜಶೀರ್, ಒಂದು ಸುಂದರವಾದ ಕಣಿವೆ. ಸುಮಾರು 1,73,000 ಜನಸಂಖ್ಯೆಯನ್ನು ಹೊಂದಿರುವ ಈ ಪ್ರಾಂತ್ಯದ ರಾಜಧಾನಿ ಬಜಾರಕ್ ಆಗಿದೆ. ನಾನು ದೇಶ ಬಿಟ್ಟು ಓಡಿ ಹೋಗಲ್ಲ. ಯಾವುದೇ ಕಾರಣಕ್ಕೂ ತಾಲಿಬಾನ್ಗೆ ಶರಣಾಗಲ್ಲ. ನಾನೇ ಅಫ್ಘನ್ ಅಧ್ಯಕ್ಷ ಎಂದು ಅಫ್ಘಾನಿಸ್ತಾನದ ಮಾಜಿ ಉಪಾಧ್ಯಕ್ಷ ಅಮರುಲ್ಲಾ ಸಲೇಹ್ ಅವರು ಈ ಪ್ರದೇಶದಲ್ಲಿದ್ದುಕೊಂಡೇ ಹೇಳಿಕೆ ನೀಡಿದ್ದರು.
ಇದನ್ನೂ ಓದಿ: ನಾನೇ ಆಫ್ಘನ್ ಅಧ್ಯಕ್ಷ ಎಂದಿದ್ದ ಅಮರುಲ್ಲಾ ಸಲೇಹ್ Twitter ಖಾತೆ ಸಸ್ಪೆಂಡ್..!
ತಾಲಿಬಾನ್ ವಿರುದ್ಧದ ಪ್ರತಿರೋಧಕ್ಕೆ ಭದ್ರಕೋಟೆಯಾಗಿ ಕಾರ್ಯನಿರ್ವಹಿಸುವ ಪಂಜ್‌ಶಿರ್ ಪ್ರಾಂತ್ಯದ ಬಗ್ಗೆ ನೀವು ತಿಳುದುಕೊಳ್ಳಬೇಕಾದ ಅಂಶಗಳು ಇಲ್ಲಿವೆ.
- 1980ರ ದಶಕದಲ್ಲಿ ಸೋವಿಯತ್ ವಿರುದ್ಧ ಮತ್ತು ನಂತರ 1990ರಲ್ಲಿ ತಾಲಿಬಾನ್ ವಿರುದ್ಧ ಹೋರಾಟದ ಭದ್ರಕೋಟೆಯಾಗಿತ್ತು ಈ ಪ್ರಾಂತ್ಯ.
- ಅಮರುಲ್ಲಾ ಸಲೇಹ್ ಪಂಜಶೀರ್ ಪ್ರಾಂತ್ಯದಲ್ಲಿ ಜನಿಸಿದವರು ಮತ್ತು ಇಲ್ಲಿಯೇ ತರಬೇತಿ ಪಡೆದವರು.
- ಇದು ಯಾವಾಗಲೂ ಪ್ರತಿರೋಧದ ಭದ್ರಕೋಟೆಯಾಗಿ ಉಳಿದಿದ್ದರಿಂದ, ಅದನ್ನು ಎಂದಿಗೂ ಯಾವುದೇ ಪಡೆಗಳು ವಶಪಡಿಸಿಕೊಂಡಿಲ್ಲ.
- 10ನೇ ಶತಮಾನದಲ್ಲಿ ಘಜ್ನಿಯ ಸುಲ್ತಾನ್ ಮಹ್ಮದ್ಗಾಗಿ ಐವರು ಸಹೋದರರು ಇಲ್ಲಿ ಅಣೆಕಟ್ಟನ್ನು ನಿರ್ಮಿಸಿ, ಪ್ರವಾಹವನ್ನು ತಡೆಯುವಲ್ಲಿ ಯಶಸ್ವಿಯಾಗಿದ್ದರು. ಹೀಗಾಗಿ ಪಂಜಶೀರ್ ಕಣಿವೆಯನ್ನು 'ಐದು ಸಿಂಹಗಳ ಕಣಿವೆ' ಎಂದು ಕರೆಯಲಾಗುತ್ತದೆ.
- ಈ ಕಣಿವೆಯು ಒಂದು ಲಕ್ಷಕ್ಕೂ ಹೆಚ್ಚು ಜನರಿಗೆ ನೆಲೆಯಾಗಿದೆ ಮತ್ತು ತಾಜಿಕ್‌ ಜನಾಂಗದವರನ್ನು ಅತಿ ಹೆಚ್ಚು ಹೊಂದಿದೆ ಪ್ರದೇಶವಾಗಿದೆ.
- ಪಂಜಶೀರ್ ಮೂಲದ ರಾಜಕಾರಣಿ ಮತ್ತು ಸೇನಾ ಕಮಾಂಡರ್ ಆಗಿದ್ದ ಅಹ್ಮದ್ ಶಾ ಮಸೂದ್ರನ್ನು 2001ರಲ್ಲಿ ಅಲ್ ಖೈದಾ ಮತ್ತು ತಾಲಿಬಾನ್ಗಳು ನಡೆಸಿದ ದಾಳಿಯಲ್ಲಿ ಕೊಲ್ಲಲಾಗಿತ್ತು. ಈ ಬಳಿಕ ತಾಲಿಬಾನ್ ವಿರುದ್ಧ ಮತ್ತಷ್ಟು ಪ್ರಬಲರಾದರು ಪಂಜಶೀರ್ ಜನತೆ.
