ಬೀಜಿಂಗ್(ಚೀನಾ): ಪ್ರಪಂಚದಲ್ಲೇ ಭಯ ಹುಟ್ಟಿಸಿರುವ ಕೊರೊನಾ ವೈರಸ್(COVID-19) ಈಗಾಗಲೇ ಸಾವಿರಾರು ಜೀವಗಳನ್ನು ಬಲಿ ಪಡೆದಿದೆ. ಇನ್ನು ಈ ವೈರಸ್ ಬಗ್ಗೆ ಸಂಶೋಧನೆ ನಡೆಯುತ್ತಿದ್ದು, ಇದರಿಂದ ತಾಯಿಯ ಗರ್ಭದಲ್ಲಿರುವ ಶಿಶುವಿಗೆ ಯಾವುದೇ ರೀತಿಯ ತೊಂದರೆಯಾಗುವುದಿಲ್ಲ ಎಂದು ದಿ ಲ್ಯಾನ್ಸೆಟ್ ಜರ್ನಲ್ನಲ್ಲಿ ಪ್ರಕಟವಾಗಿದೆ.
ಈ ಬಗ್ಗೆ ಚೀನಾದ ಪೀಕಿಂಗ್ ವಿವಿ ಅಧ್ಯಯನ ನಡೆಸಿದ್ದು, ಕೊರೊನಾವೈರಸ್ಗೆ ತುತ್ತಾದ ಗರ್ಭಿಣಿಯರ ಪರೀಕ್ಷೆ ನಡೆಸಿ, ಈ ವೈರಸ್ನಿಂದಾಗಿ ಗರ್ಭದಲ್ಲಿರುವ ಶಿಶುವಿಗೆ ವೈರಸ್ ಹರಡುವ ಸಾಧ್ಯತೆ ಇಲ್ಲ. ಆದರೆ ತಾಯಿ ಈ ವೈರಸ್ನಿಂದ ಬಳಲುತ್ತಿದ್ದರೆ ಜನನ ನಂತರ ಮಗುವಿನ ಆರೋಗ್ಯದಲ್ಲಿ ಸ್ವಲ್ಪ ಏರುಪೇರು ಕಾಣಿಸಲಿದೆ ಎಂದು ತಿಳಿಸಿದೆ.
ಈ ಸಂಶೋಧನೆಗೆ 9 ಗರ್ಭಿಣಿಯರನ್ನು ಬಳಸಿಕೊಳ್ಳಲಾಗಿದೆ. ಈ ಎಲ್ಲಾ ಮಹಿಳೆಯರು ಮಗುವಿಗೆ ಸಾಮಾನ್ಯವಾಗಿಯೇ ಜನ್ಮ ನೀಡಿದ್ದಾರೆ. ಆದರೆ ಇಬ್ಬರು ಮಹಿಳೆಯರ ಭ್ರೂಣದಲ್ಲಿ ಸ್ವಲ್ಪ ಮಟ್ಟಿನ ತೊಂದರೆ ಕಾಣಿಸಿಕೊಂಡಿತ್ತು ಎಂದು ಸಂಶೋಧನೆಯಲ್ಲಿ ತಿಳಿಸಲಾಗಿದೆ.
ಗರ್ಭಧಾರಣೆಯ ಮೊದಲ ಅಥವಾ ಎರಡನೆಯ ತಿಂಗಳಲ್ಲಿ ತಾಯಂದಿರು ಈ ವೈರಸ್ ಸೋಂಕಿಗೆ ಒಳಗಾಗುವುದರಿಂದ ಉಂಟಾಗುವ ಪರಿಣಾಮಗಳು ಮತ್ತು ಶಿಶು ಜನನದ ಸಮಯದಲ್ಲಿ ಈ ವೈರಸ್ ತಾಯಿಯಿಂದ ಮಗುವಿಗೆ ರವಾನೆಯಾಗುವುದು ಕಷ್ಟ ಎಂದು ಸಂಶೋಧಕರು ತಿಳಿಸಿದ್ದಾರೆ.
ಈ ಹಿಂದೆ COVID-19 ಸೋಂಕಿಗೆ ಒಳಗಾದ ತಾಯಿಗೆ ನವಜಾತ ಶಿಶುವೊಂದು ಜನಿಸಿದ 36 ಗಂಟೆಗಳ ಒಳಗೆ ಈ ಸೋಂಕು ಮಗುವಿಗೆ ಸಹ ಹರಡಿದೆ ಎನ್ನಲಾಗಿದ್ದು, ಈ ಹಿನ್ನೆಲೆ ಹಲವಾರು ಜನರಲ್ಲಿ ಈ ಬಗ್ಗೆ ಪ್ರಶ್ನೆ ಮೂಡಿದ್ದರಿಂದ ಸಂಶೋಧನೆ ಕೈಗೊಳ್ಳಲಾಗಿತ್ತು.
ಇನ್ನು ಈ ಬಗ್ಗೆ ಚೀನಾದ ಪೀಕಿಂಗ್ ವಿವಿ ಆಸ್ಪತ್ರೆಯ ಪ್ರೊಫೆಸರ್ ಹುಯಿಕ್ಸಿಯಾ ಯಾಂಗ್ ಹೇಳಿಕೆ ನೀಡಿದ್ದು, COVID-19 ನ ಪರಿಣಾಮಗಳ ಬಗ್ಗೆ ಅಸ್ತಿತ್ವದಲ್ಲಿರುವ ಅಧ್ಯಯನಗಳು ಸಾಮಾನ್ಯ ಜನರಿಗೆ ಅನ್ವಯಿಸುತ್ತವೆ ಹಾಗೂ ಗರ್ಭಿಣಿಯರಲ್ಲಿನ ವೈರಸ್ ಬಗ್ಗೆ ಸೀಮಿತವಾದ ಮಾಹಿತಿಗಳು ಮಾತ್ರ ಲಭ್ಯವಾಗಿರುವುದು ಎಂದಿದ್ದಾರೆ.
ಈ ವೈರಸ್ ಬಗ್ಗೆ ಅಧ್ಯಯನ ಮಾಡುವುದು ಬಹಳ ಮುಖ್ಯವಾಗಿದೆ, ಗರ್ಭಿಣಿಯಾದ ವೇಳೆ ವಿಶೇಷವಾಗಿ ಉಸಿರಾಟದ ಸಮಸ್ಯೆಗಳು ಮತ್ತು ತೀವ್ರವಾದ ನ್ಯುಮೋನಿಯಾ ಸಮಸ್ಯೆ ಉಂಟಾಗುವ ಸಾಧ್ಯತೆ ಇರುತ್ತದೆ. ಗರ್ಭಿಣಿಯರಿಗೆ ರೋಗನಿರೋಧಕ ಶಕ್ತಿ ಕಡಿಮೆ ಇರುವುದರಿಂದ ಮತ್ತು ಗರ್ಭಧಾರಣೆಗೆ ಸಂಬಂಧಿಸಿದ ದೈಹಿಕ ಬದಲಾವಣೆಗಳಿಂದಾಗಿ ಹೆಚ್ಚಿನ ಅಪಾಯವನ್ನು ಕೆಲವು ಬಾರಿ ಎದುರಿಸುವ ಪರಿಸ್ಥಿತಿ ಉಂಟಾಗುತ್ತದೆ ಎಂದು ಯಾಂಗ್ ಅಭಿಪ್ರಾಯಪಟ್ಟಿದ್ದಾರೆ.
ಈ ಸಂಶೋಧನೆಯ ಮೂಲಕ ಗರ್ಭಾವಸ್ಥೆಯಲ್ಲಿ ಅಥವಾ ಜನನದ ಸಮಯದಲ್ಲಿ ಕೊರೊನಾ ವೈರಸ್ ತಾಯಿಯಿಂದ ಮಗುವಿಗೆ ಹರಡಿತು ಎಂಬುದಕ್ಕೆ ಯಾವುದೇ ಪುರಾವೆಗಳಿಲ್ಲ ಎಂದು ಸ್ಪಷ್ಟಪಡಿಸಿದೆ.
