ಶಾರ್ಟ್ ​ಕಟ್​ ಎಂದೇಳಿ ಕೆಸರು ರಸ್ತೆಯಲ್ಲಿ ಕೈಬಿಟ್ಟ ಗೂಗಲ್​ ಮ್ಯಾಪ್...! ನೂರಾರು ಕಾರುಗಳು ಜಾಮ್

ಮಳೆಯ ಪರಿಣಾಮ ಕಚ್ಚಾ ರಸ್ತೆ ಸಂಪೂರ್ಣ ಕೆಸರುಮಯವಾಗಿದ್ದ ಕಾರಣ ಶಾರ್ಟ್​ಕಟ್​ ರಸ್ತೆಯಲ್ಲಿ ತೆರಳಿದ್ದ ನೂರಾರು ಕಾರುಗಳು ಗಂಟೆಗಳ ಕಾಲ ಸಂಕಷ್ಟಕ್ಕೆ ಸಿಲುಕಿ ಒದ್ದಾಡಿದವು. ಅಷ್ಟಕ್ಕೂ ಇದು ಗೂಗಲ್​ ಮ್ಯಾಪ್​ ತೋರಿಸಿದ ಶಾರ್ಟ್​ ಕಟ್​​ ದಾರಿ...!

ಕೊಲರಾಡೋ(ಅಮೆರಿಕ): ಅಪರಿಚಿತವಾದ ಊರಿಗೆ ಹೋಗೋದಾದ್ರೆ ಇಂದಿನ ಜಮಾನದಲ್ಲಿ ನಮಗೆ ಗೂಗಲ್​​ ಮ್ಯಾಪ್ ಸಹಾಯ ಮಾಡುತ್ತೆ​​. ಆದ್ರೆ ಇದನ್ನೇ ನಂಬಿ ಹೋದವರಿಗೆ ಶಾಕ್​ ಆಗಿದೆ. ನೂರಕ್ಕೂ ಅಧಿಕ ಕಾರುಗಳು ಕೆಸರು ರಸ್ತೆಯಲ್ಲಿ ಸಿಲುಕಿ ಒದ್ದಾಡಿದ ಘಟನೆಯೊಂದು ಅಮೆರಿಕದಲ್ಲಿ ನಡೆದಿದೆ.

ಕೊಲರಾಡೋದ ಡೆನ್ವರ್​ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ತೆರಳುವ ರಸ್ತೆಗೆ ಗೂಗಲ್​ ಮ್ಯಾಪ್​ ಸಹಾಯ ಪಡೆದ ನೂರಾರು ಕಾರು ಚಾಲಕರು ಅರ್ಧ ದಾರಿಯಲ್ಲಿ ಕೆಸರಿನ ರಸ್ತೆಯಲ್ಲಿ ಸಿಲುಕಿದ್ದಾರೆ. ಮಳೆಯ ಪರಿಣಾಮ ಕಚ್ಚಾ ರಸ್ತೆ ಸಂಪೂರ್ಣ ಕೆಸರುಮಯವಾಗಿತ್ತು.

ವಿಮಾನ ನಿಲ್ದಾಣಕ್ಕೆ ಸಮೀಪದ ದಾರಿ ಎಂದು ಗೂಗಲ್​ ಮ್ಯಾಪ್​ ತೋರಿಸಿದ್ದು, ಅರ್ಧ ದಾರಿಯಲ್ಲಿ ಎಲ್ಲ ಕಾರುಗಳು ಮುಂದಕ್ಕೆ ತೆರಳಲಾಗದೆ ಹಲವು ಗಂಟೆಗಳ ಕಾಲ ಇಕ್ಕಟ್ಟಿಗೆ ಸಿಲುಕಿದ್ದವು. ಕೆಲ ಕಾರುಗಳು ಒಂದರ್ಧ ಗಂಟೆಯಲ್ಲಿ ಹೇಗೋ ಮುಂದುವರೆದಿದ್ದರೆ ಉಳಿದ ಕಾರುಗಳು ಹಲವು ಗಂಟೆಗಳ ಕಾಲ ಮುಂದಕ್ಕೆ ಚಲಿಸಲಾಗದೆ ಪರದಾಡಿದವು.