ಹೈದರಾಬಾದ್ (ತೆಲಂಗಾಣ): ಬಾಲಿವುಡ್ ನಟ - ನಿರ್ದೇಶಕ ಅಜಯ್ ದೇವಗನ್ ಅವರು ತಮ್ಮ ಹೊಸ ಚಿತ್ರ 'ರನ್‌ವೇ 34' ಬಿಡುಗಡೆಗೆ ಸಜ್ಜಾಗುತ್ತಿದ್ದಾರೆ. ಚಿತ್ರದ ನಿರ್ದೇಶಕ ಮತ್ತು ನಿರ್ಮಾಪಕರೂ ಆಗಿರುವ ಅವರು ಸದ್ಯ ಚಿತ್ರದ ಪ್ರಚಾರದಲ್ಲಿ ನಿರತರಾಗಿದ್ದಾರೆ. ಪ್ರಚಾರದ ಸಮಯದಲ್ಲಿ, ಅಜಯ್ ತಮ್ಮ ಮಗಳು ನೈಸಾ ದೇವಗನ್ ಅವರ ಬಾಲಿವುಡ್ ಕನಸುಗಳ ಬಗ್ಗೆ ಮಾತನಾಡಿದರು.
ರನ್‌ವೇ 34 ರ ಪ್ರಚಾರದ ಸಂದರ್ಶನದಲ್ಲಿ, ನಿಮ್ಮ ಮಕ್ಕಳು ನೈಸಾ ಮತ್ತು ಯುಗ್ ಅವರು ಸಿನಿಮಾ ರಂಗ ಪ್ರವೇಶಿಸಲು ಬಯಸುತ್ತೀರಾ ಎಂದು ಕೇಳಲಾಯಿತು. ಅದಕ್ಕೆ ಉತ್ತರಿಸಿದ ಅಜಯ್ ದೇವಗನ್ ನೈಸಾ ಮತ್ತು ಯುಗ್ ಅವರಿಗೆ ಯಾವುದೇ ರೀತಿಯ ಒತ್ತಡ ಹೇರುವುದಿಲ್ಲ. ಇಲ್ಲಿಯವರೆಗೆ ಅವರು ಅದರಲ್ಲಿ ಆಸಕ್ತಿ ತೋರಿಸಿಲ್ಲ. ಸದ್ಯ ನೈಸಾ ವಿದೇಶದಲ್ಲಿ ಓದುತ್ತಿದ್ದಾಳೆ. ನಾನು ಮತ್ತು ಕಾಜೋಲ್ ಮಕ್ಕಳು ತಮ್ಮ ಭವಿಷ್ಯಕ್ಕಾಗಿ ಏನು ನಿರ್ಧರಿಸಿದರೂ ಅವರಿಗೆ ಸಹಾಯ ಮಾಡುತ್ತೇವೆ ಎಂದು ಹೇಳಿದರು.