'ಜವಾನ್'.ಇದೀಗ ವಿಶ್ವದಾದ್ಯಂತ ಕೇಳಿಬರುತ್ತಿರುವ ಹೆಸರು. ಸೆಪ್ಟೆಂಬರ್ 7ರಂದು ತೆರೆಕಂಡು ಬಾಕ್ಸ್ ಆಫೀಸ್ನಲ್ಲಿ ಧೂಳೆಬ್ಬಿಸುತ್ತಿರುವ ಚಿತ್ರ. ಬಾಲಿವುಡ್ ನಟ ಶಾರುಖ್ ಖಾನ್ ನಟನೆಗೆ ಎಲ್ಲೆಡೆ ಭರಪೂರ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸಿನಿಮಾ ಪ್ರೇಕ್ಷಕರಿಂದ ಸಕಾರಾತ್ಮಕ ಪ್ರತಿಕ್ರಿಯೆ ಗಳಿಸುತ್ತಿದೆ. ಕಲೆಕ್ಷನ್ ವಿಚಾರದಲ್ಲಿ ವೇಗದ ಓಟ ಮುಂದುವರೆಸಿದೆ. ಈವರೆಗಿನ ಎಲ್ಲಾ ನಿರೀಕ್ಷೆಗಳನ್ನೂ ಮೀರಿ ಚಿತ್ರ ಪ್ರದರ್ಶನ ಕಾಣುತ್ತಿದೆ. ದಿನ ಕಳೆದಂತೆ 'ಜವಾನ್' ಹೊಸ ಹೊಸ ದಾಖಲೆಗಳನ್ನು ಬರೆಯುತ್ತಿದೆ.
ಜವಾನ್ 3ನೇ ದಿನದ ಕಲೆಕ್ಷನ್:ಗುರುವಾರ ಬಿಡುಗಡೆಯಾದ 'ಜವಾನ್' ಸಿನಿಮಾ ಇಂದು ನಾಲ್ಕನೇ ದಿನಕ್ಕೆ ಕಾಲಿಟ್ಟಿದೆ. ಥಿಯೇಟರ್ಗಳಲ್ಲಿ ಶಿಳ್ಳೆ, ಚಪ್ಪಾಳೆಗಳ ಸದ್ದು ಜೋರಾಗಿದೆ. ಮೊದಲ ದಿನ ಅಂದಾಜು 75 ಕೋಟಿ ರೂ. ಬಾಚಿಕೊಂಡ ಚಿತ್ರ ಎರಡನೇ ದಿನ ಸುಮಾರು 53 ಕೋಟಿ ರೂ. ಗಳಿಸಿದೆ. ಮೂರನೇ ದಿನ 74 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್ ಮಾಡಿ ಯಶಸ್ಸಿನ ಯಾತ್ರೆ ಮುಂದುವರೆಸಿದೆ. ಎರಡೇ ದಿನದಲ್ಲಿ ವಿಶ್ವಾದ್ಯಂತ 240 ಕೋಟಿ ರೂಪಾಯಿ ಗಳಿಸಿದ್ದ 'ಜವಾನ್' ಮೂರನೇ ದಿನದ ಕಲೆಕ್ಷನ್ನೊಂದಿಗೆ 300 ಕೋಟಿ ರೂಪಾಯಿ ಗಡಿ ದಾಟಿದೆ.
ವಾರಾಂತ್ಯವಾದ ಇಂದು 'ಜವಾನ್' ಮತ್ತಷ್ಟು ಕಲೆಕ್ಷನ್ ಮಾಡಲಿದೆ. ಶೀಘ್ರದಲ್ಲೇ 500 ಕೋಟಿ ಗಡಿ ದಾಟಲಿದೆ ಎನ್ನುತ್ತಿವೆ ಟ್ರೇಡ್ ಮೂಲಗಳು. ಮೊದಲ ದಿನದ ಗಳಿಕೆಯಲ್ಲೇ ದಾಖಲೆ ಬರೆದ ಸಿನಿಮಾ, ಶಾರುಖ್ ಮಾತ್ರವಲ್ಲದೇ ನಯನತಾರಾ, ವಿಜಯ್ ಸೇತುಪತಿ ಅವರಿಗೂ ಉತ್ತಮ ಹೆಸರು ತಂದುಕೊಟ್ಟಿದೆ. 'ಜವಾನ್' ಇನ್ನೂ ಅಧಿಕ ಕಲೆಕ್ಷನ್ ಮಾಡುವ ನಿರೀಕ್ಷೆಯಿದ್ದೂ, ಈವರೆಗಿನ ಎಲ್ಲಾ ದಾಖಲೆಗಳನ್ನು ಪುಡಿಗಟ್ಟಲಿದೆ ಎನ್ನಲಾಗಿದೆ.