ಚೆನ್ನೈ (ತಮಿಳುನಾಡು):ಚೋಳ ಸಾಮ್ರಾಜ್ಯಕ್ಕಾಗಿ ನಡೆದ ಹೋರಾಟ, ರಕ್ತಚರಿತ್ರೆಯನ್ನು ಕಟ್ಟಿಕೊಡುವ "ಪೊನ್ನಿಯನ್ ಸೆಲ್ವಂ" ಸಿನಿಮಾದ ಎರಡನೇ ಭಾಗದ ಟ್ರೇಲರ್ ಬಿಡುಗಡೆ ಸಮಾರಂಭ ಗುರುವಾರ ನಡೆದಿದ್ದು ಹಲವು ವಿಶೇಷತೆಗಳಿಂದ ಕೂಡಿತ್ತು. ಒಂದೆಡೆ, ಟ್ರೇಲರ್ಗೆ ಮೆಚ್ಚುಗೆ ವ್ಯಕ್ತವಾದರೆ, ನಾಯಕಿಯರಾದ ಐಶ್ವರ್ಯಾ ರೈ ಮತ್ತು ತ್ರಿಶಾ ರಾಣಿಯರ ಲುಕ್ನಲ್ಲಿ ಮಿಂಚಿದರು.
ಥೇಟ್ ರಾಣಿಯರಂತೆ ಸಿಂಗರಿಸಿಕೊಂಡಿದ್ದ ನಟಿಯರು ರೆಡ್ ಕಾರ್ಪೆಟ್ ಮೇಲೆ ನಡೆದು ಬರುತ್ತಿದ್ದರೆ, ಅಭಿಮಾನಿಗಳ ಕರತಾಡನದ ಸದ್ದು ಜೋರಾಗಿತ್ತು. ಮಾಜಿ ವಿಶ್ವಸುಂದರಿ ಐಶ್ವರ್ಯಾ ಗುಲಾಬಿ ಬಣ್ಣದ ಡ್ರೆಸ್ನಲ್ಲಿ ಕಂಗೊಳಿಸಿದರು. ಗುಲಾಬಿ ಕ್ಯಾನ್ವಾಸ್ ಅನ್ನು ಚಿನ್ನದ ಎಳೆಗಳಿಂದ ಕಸೂತಿ ಮಾಡಲಾಗಿತ್ತು. ಸಿಂಹಾಸನದ ಮೇಲೆ ಕುಳಿತು ನೀಡಿದ ಪೋಸ್ ಗಮನ ಸೆಳೆಯಿತು. ಲೈಕಾ ಪ್ರೊಡಕ್ಷನ್ಸ್ ತನ್ನ ಅಧಿಕೃತ ಟ್ವಿಟರ್ ಪುಟದಲ್ಲಿ ವಿಡಿಯೋವನ್ನು ಹಂಚಿಕೊಂಡಿದೆ. ಸೊಗಸುಗಾತಿ, ಮೋಡಿಮಾಡುವ ಸೌಂದರ್ಯವತಿ ನಂದಿನಿ ಸಮಾರಂಭದ ಶ್ರೇಷ್ಠತೆ ಹೆಚ್ಚಿಸಿದರು ಎಂದು ಬರೆದುಕೊಂಡಿದೆ.
ರಾಜಕುಮಾರಿ ಕುಂದವೈ ಪಾತ್ರದಲ್ಲಿ ನಟಿಸಿರುವ ತ್ರಿಶಾ, ನೀಲಿ ಬಣ್ಣದ ಸೀರೆಯಲ್ಲಿ ರೆಡ್ ಕಾರ್ಪೆಟ್ ಮೇಲೆ ಆಗಮಿಸಿದರು. ಲೈಕಾ ಪ್ರೊಡಕ್ಷನ್ಸ್‌ನ ಟ್ವಿಟರ್ನಲ್ಲಿ ನಟಿ ಸಿಂಹಾಸನದ ಮೇಲೆ ಕುಳಿತಿರುವ ವಿಡಿಯೋವನ್ನು ಹಂಚಿಕೊಂಡಿದೆ. "ತ್ರಿಶಾಕೃಷ್ಣನ್ ಸಹ ರಾಜಮನೆತನದ ಸಾಕಾರ" ಎಂದು ಶೀರ್ಷಿಕೆ ನೀಡಿದೆ. ಇನ್ನೊಂದೆಡೆ ಕೊಡುಂಬಳೂರಿನ ರಾಜಕುಮಾರಿ ವನತಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಸೋಭಿತಾ ಧೂಳಿಪಾಲ, ಪಿಂಕ್ ಸೀರೆಯಲ್ಲಿ ಆಕರ್ಷಕವಾಗಿ ಕಂಡುಬಂದರು.
ಟ್ರೇಲರ್ಗೆ ಮೆಚ್ಚುಗೆ:ಪೊನ್ನಿಯನ್ ಸೆಲ್ವಂ ಸಾವಿನ ನಂತರ ಹೊಸ ರಾಜನ ಹೆಸರು ಘೋಷಿಸಲಾಗುತ್ತದೆ. ಅಲ್ಲಿಂದ ಕಿತ್ತಾಟ ಆರಂಭವಾಗುತ್ತದೆ. ರಾಣಿ ನಂದಿನಿ(ಐಶ್ವರ್ಯಾ ರೈ) ಚೋಳರ ಸಾಮ್ರಾಜ್ಯವನ್ನು ನಾವು ನಾಶ ಮಾಡುತ್ತೇವೆ ಎಂದು ಶಪಥ ಮಾಡಿ, ಕರಿಕಾಲನ್(ವಿಕ್ರಮ್) ಎದೆಗೆ ಖಡ್ಗ ಚುಚ್ಚುತ್ತಾಳೆ. ಈ ಮೂಲಕ ಟ್ರೇಲರ್ ಕೊನೆಗೊಳ್ಳುತ್ತದೆ. ಮುಂದಿನ ಭಾಗದ ಕುತೂಹಲವನ್ನು ಹೆಚ್ಚಿಸುವ ಚಿತ್ರ ಭಾರಿ ನಿರೀಕ್ಷೆ ಮೂಡಿಸಿದೆ. ಪೊನ್ನಿಯನ್ ಸೆಲ್ವಂ ಮೊದಲ ಭಾಗ ವಿಶ್ವದಾದ್ಯಂತ 480 ಕೋಟಿ ರೂಪಾಯಿಗಳನ್ನು ಗಳಿಸಿತ್ತು.