ಹೈದರಾಬಾದ್: ಸಾರ್ವಜನಿಕ ಸ್ಥಳದಲ್ಲಿ ತನ್ನ ಗೆಳತಿಗೆ ಕಪಾಳಮೋಕ್ಷ ಮಾಡಿದ ಯುವಕನನ್ನು ಟಾಲಿವುಡ್ ನಾಯಕ ನಟ ನಾಗಶೌರ್ಯ ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ. ಚಲನಚಿತ್ರಗಳಲ್ಲಿ ಮಹಿಳಾ ಹಕ್ಕುಗಳಿಗಾಗಿ ಹೋರಾಡುತ್ತಿರುವ ನಟ, ಕಣ್ಣ ಮುಂದೆಯೇ ಅನ್ಯಾಯ ನಡೆಯುತ್ತಿರುವುದನ್ನು ನೋಡಿ, ಕೂಡಲೇ ಯುವತಿಯ ರಕ್ಷಣೆಗೆ ಧಾವಿಸುವ ಮೂಲಕ ನಿಜ ಜೀವನದಲ್ಲೂ ಹೀರೋ ಆಗಿ ಮೆರೆದರು. ಈ ಮೂಲಕ ಅಭಿಮಾನಿಗಳ ಮನಗೆದ್ದರು.
ವಿವರ: ಹೈದರಾಬಾದ್‌ನ ನಡುರಸ್ತೆಯ ಮೇಲೆ ತನ್ನ ಗೆಳತಿಯ ಕೆನ್ನೆಗೆ ಯುವಕನೊಬ್ಬ ಹೊಡೆಯುತ್ತಿರುವುದನ್ನು ಗಮನಿಸಿದ ನಾಗ ಶೌರ್ಯ, ಕೂಡಲೇ ತಮ್ಮ ಕಾರು ನಿಲ್ಲಿಸಿ ಆ ಯುವಕನ ಬಳಿ ಹೋಗಿ ಕ್ಷಮೆ ಕೇಳುವಂತೆ ಹೇಳಿದ್ದಾರೆ. ಸ್ಥಳದಲ್ಲಿ ಗೊಂದಲದ ವಾತಾವರಣ ನಿರ್ಮಣವಾಗುತ್ತಿದಂತೆ ಕಪಾಳಮೋಕ್ಷ ಮಾಡಿದ ಯುವಕ, "ಅವಳು ನನ್ನ ಲವರ್" ಎಂದುಬಿಟ್ಟ. ಇದಕ್ಕೆ ಉತ್ತರಿಸಿದ ನಟ, "ಅವಳು ನಿನ್ನ ಲವರ್ ಆಗಿರಬಹುದು, ಹಾಗಂತ, ಈ ರೀತಿ ಅನುಚಿತವಾಗಿ ವರ್ತಿಸಬಹುದೇ? ಹೊಡೆಯುವ ಹಕ್ಕು ನಿನಗಿಲ್ಲ. ಅವಳಿಗೆ ರಸ್ತೆಯಲ್ಲಿ ಏಕೆ ಕಪಾಳಮೋಕ್ಷ ಮಾಡಿದ್ದೀಯಾ?, ಅವಳ ಬಳಿ ಕ್ಷಮೆ ಕೇಳು" ಎಂದು ಚಾಟಿ ಬೀಸಿದ್ದಾರೆ.
ಇದನ್ನೂ ಓದಿ:ನಾನಿ ಕನ್ನಡ ಚಿತ್ರರಂಗದ ಮತ್ತು ಕಾಂತಾರ ಬಗ್ಗೆ ಏನು ಹೇಳಿದ್ದಾರೆ ನೋಡಿ...!
ಘಟನೆಯ ಸಂಪೂರ್ಣ ವಿಡಿಯೋವನ್ನು ನೆಟ್ಟಿಗರೊಬ್ಬರು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದು, ವೈರಲ್ ಆಗಿದೆ. ಇದರಲ್ಲಿ ಯುವತಿಗೆ ಕಪಾಳಮೋಕ್ಷ ಮಾಡಿದ್ದಕ್ಕಾಗಿ ಕ್ಷಮೆ ಯಾಚಿಸುವಂತೆ ವ್ಯಕ್ತಿಗೆ ಪದೇ ಪದೇ ನಟ ಹೇಳುತ್ತಿರುವುದನ್ನು ಕಾಣಬಹುದು. ಅಷ್ಟೇ ಅಲ್ಲದೇ, ಘಟನೆ ನಡೆಯುತ್ತಿದ್ದಂತೆ ಅಲ್ಲೇ ಇದ್ದ ಸ್ಥಳೀಯರು ನಾಗಶೌರ್ಯಗೆ ಬೆಂಬಲಿಸಿ, ಯುವಕನಿಗೆ ಕ್ಷಮೆಯಾಚಿಸುವಂತೆ ಸೂಚಿಸಿದ್ದಾರೆ.