ಕೃತಿ ಸನೋನ್ ಬಾಲಿವುಡ್‌ ಬಹುಬೇಡಿಕೆ ನಟಿಯರಲ್ಲೊಬ್ಬರು. ಮಿಮಿ ಚಿತ್ರದಲ್ಲಿನ ಅತ್ಯುತ್ತಮ ಅಭಿನಯಕ್ಕಾಗಿ ನಟಿಗೆ ಇತ್ತೀಚೆಗಷ್ಟೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯೂ ಘೋಷಣೆ ಆಗಿದೆ. ಸದಾ ತಮ್ಮ ವೃತ್ತಿಜೀವನಕ್ಕೆ ಮಹತ್ವ ಕೊಡುವ ನಟಿಯ ಹೆಸರು ಆಗಾಗ್ಗೆ ಆದಿಪುರುಷ್ ಸಹನಟ ಪ್ರಭಾಸ್ ಜೊತೆ ಕೇಳಿ ಬರುತ್ತದೆ. ಸಿನಿಮಾ ಆರಂಭವಾದಾಗಿನಿಂದಲೂ ಇವರಿಬ್ಬರ ಡೇಟಿಂಗ್ ವದಂತಿಗಳಿವೆ. ಇತ್ತೀಚೆಗಷ್ಟೇ ನಟಿ ರಿಲೇಶನ್ಶಿಪ್ ಬಗ್ಗೆ ಮಾತನಾಡಿದ್ದಾರೆ. ಬಾಳ ಸಂಗಾತಿಯಲ್ಲಿ ಇರಬೇಕಾದ ಗುಣಗಳ ಕುರಿತು ತಿಳಿಸಿದ್ದಾರೆ.
ಇತ್ತೀಚಿನ ಸಂದರ್ಶನದಲ್ಲಿ ಮಾತನಾಡಿದ ಕೃತಿ ಸನೋನ್, ಸದ್ಯ ತಾವು ಯಾವುದೇ ರಿಲೇಶನ್ಶಿಪ್ನಲ್ಲಿಲ್ಲ ಎಂಬುದನ್ನು ಖಚಿತಪಡಿಸಿದ್ದಾರೆ. ಭಾವಿ ಬಾಳಸಂಗಾತಿಯಲ್ಲಿ ಪ್ರೀತಿ, ಪ್ರಾಮಾಣಿಕತೆ, ಮಹತ್ವಾಕಾಂಕ್ಷೆಗಳಂತಹ ಗುಣಗಳನ್ನು ನಿರೀಕ್ಷಿಸುತ್ತೇನೆ, ಅವುಗಳನ್ನು ಗೌರವಿಸುವುದಾಗಿ ತಿಳಿಸಿದರು. ಏಕೆಂದರೆ ಆ ಗುಣಗಳು ತಮ್ಮನ್ನು ಪ್ರೇರೇಪಿಸುತ್ತವೆ ಎಂದು ತಿಳಿಸಿದರು. ಹಾಗೇ ತಮ್ಮ ಪಾರ್ಟ್ನರ್ ಸಕತ್ ಹೈಟ್ ಇರಬೇಕೆಂದೂ ಕೂಡ ತಿಳಿಸಿದ್ದಾರೆ. ನಟಿಯ ಎತ್ತರದ ಬಗ್ಗೆ ನಿಮಗೆ ವಿಶೇಷ ಪರಿಚಯ ಬೇಕಿಲ್ಲ. ಅದೇನೇ ಇದ್ದರೂ, ನಿಜವಾದ, ಒಳ್ಳೆ ವ್ಯಕ್ತಿಯನ್ನು ಬಾಳಸಂಗಾತಿಯಾಗಿ ಕಂಡುಕೊಳ್ಳುವುದು ನಟಿಯ ಪ್ರಾಥಮಿಕ ಬಯಕೆಯಾಗಿದೆ.
ನಟಿ ತಮ್ಮ ಬಾಳಸಂಗಾತಿಯಾಗುವವರಲ್ಲಿ ಇರಬೇಕಾದ ಗುಣಗಳ ಪೈಕಿ ಹೈಟ್ ಅನ್ನು ಉಲ್ಲೇಖಿಸಿದ ಹಿನ್ನೆಲೆ, ಸೋಷಿಯಲ್ ಮೀಡಿಯಾ ಬಳಕೆದಾರರು ಮತ್ತೆ ಪ್ಯಾನ್ ಇಂಡಿಯಾ ಸ್ಟಾರ್ ಪ್ರಭಾಸ್ ಹೆಸರನ್ನು ಈ ವಿಷಯಕ್ಕೆ ಎಳೆದು ತಂದಿದ್ದಾರೆ. ಸೋಷಿಯಲ್ ಮೀಡಿಯಾ ಪ್ಲಾಟ್‌ಫಾರ್ಮ್‌ಗಳಲ್ಲಿ ಮತ್ತೆ ಪ್ರಕೃತಿ (ಪ್ರಭಾಸ್ ಮತ್ತು ಕೃತಿಯನ್ನು ಅಭಿಮಾನಿಗಳು ಪ್ರೀತಿಯಿಂದ ಕರೆಯೋದು ಹೀಗೆ..) ಅನ್ನೋ ಹೆಸರು ಸಖತ್ ಸದ್ದು ಮಾಡುತ್ತಿದೆ.