'ಕೆಂಡ' ಚಿತ್ರಕ್ಕೆ ಆಸ್ಕರ್, ಬಾಫ್ಟಾ ಖ್ಯಾತಿಯ ಕಿಲ್ಜಾಯ್ ಫಿಲಂಸ್ ಸಂಸ್ಥೆ ಸಾಥ್

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿರುವ ಕಿಲ್ಜಾಯ್ ಫಿಲಂ ಪ್ರೊಡಕ್ಷನ್ ಕಂಪನಿ 'ಕೆಂಡ' ಚಿತ್ರವನ್ನು ಬೆಂಬಲಿಸಿದೆ.

ಕನ್ನಡ ಚಿತ್ರರಂಗದಲ್ಲಿ 'ಗಂಟುಮೂಟೆ' ಸಿನಿಮಾದ ಮೂಲಕ ಭರವಸೆಯ ನಿರ್ದೇಶಕಿಯಾಗಿ ಗುರುತಿಸಿಕೊಂಡಿರುವ ರೂಪಾ ರಾವ್ ಇದೀಗ 'ಕೆಂಡ' ಚಿತ್ರದ ಮೂಲಕ ನಿರ್ಮಾಪಕಿಯಾಗುತ್ತಿದ್ದಾರೆ. ಈ ಚಿತ್ರ ಒಂದಲ್ಲೊಂದು ವಿಚಾರಕ್ಕೆ ಗಾಂಧಿನಗರದಲ್ಲಿ ಸದ್ದು ಮಾಡುತ್ತಿದೆ. 'ಕೆಂಡ' ಚಿತ್ರತಂಡದಿಂದ ಮತ್ತೊಂದು ಸಮ್ಮೋಹಕ ವಿಚಾರ ಹೊರಬಿದ್ದಿದೆ. ಅಂತಾರಾಷ್ಟ್ರೀಯ ಸಿನಿಮಾ ನಿರ್ಮಾಣ ಸಂಸ್ಥೆಯಾದ ಕಿಲ್ಜಾಯ್ ಫಿಲಂಸ್ ಈ ಚಿತ್ರದ ನಿರ್ಮಾಣದಲ್ಲಿ ಸಾಥ್ ಕೊಟ್ಟಿದೆ. ಈ ಮೂಲಕ ಅಂತಾರಾಷ್ಟ್ರೀಯ ಮಟ್ಟದ ಸಿನಿಮಾ ಪ್ರೇಮಿಗಳನ್ನು ಪರಿಣಾಮಕಾರಿಯಾಗಿ ತಲುಪಬಹುದು.

ಇತ್ತೀಚಿನ ದಿನಗಳಲ್ಲಿ ಕನ್ನಡ ಚಿತ್ರರಂಗದ ಪ್ರತಿಭೆಗಳು ರಾಜ್ಯದ ಗಡಿ ದಾಟಿ ತಮ್ಮ ಕಲೆ ಪ್ರದರ್ಶನ ಮಾಡುತ್ತಿದ್ದಾರೆ. 'ಕೆಂಡ'ದ ಮೂಲಕ ದಾಖಲಾಗಿರುವ ಈ ದಾಖಲೆ ಆ ಎಲ್ಲ ಪ್ರತಿಭೆಗಳಿಗೆ ಮತ್ತಷ್ಟು ಮೆರುಗು ತಂದಿದೆ. ಕಿಲ್ಜಾಯ್ ಫಿಲಂಸ್ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಾನ್ಯತೆ ಮತ್ತು ಘನತೆ ಹೊಂದಿರುವ ನಿರ್ಮಾಣ ಸಂಸ್ಥೆ. ನ್ಯೂಯಾರ್ಕ್ ಹಾಗೂ ಬರ್ಲಿನ್ ಮೂಲದ ಈ ಸಂಸ್ಥೆಯು ಬಾಫ್ಟಾ, ಆಸ್ಕರ್​ನಂತಹ ಪ್ರಶಸ್ತಿ ಪಡೆದುಕೊಂಡ ಅನೇಕ ಸಿನಿಮಾಗಳನ್ನು ನಿರ್ಮಿಸಿದೆ. ಈ ಸಂಸ್ಥೆಯಿಂದ ಹಲವಾರು ಪ್ರತಿಭಾನ್ವಿತ ನಿರ್ದೇಶಕರು ಪ್ರವರ್ಧಮಾನಕ್ಕೆ ಬಂದಿದ್ದಾರೆ.

ಕಿಲ್ಜಾಯ್ 'ಕೆಂಡ' ಚಿತ್ರದ ವಿತರಣಾ ಹಕ್ಕುಗಳನ್ನು ಪಡೆದುಕೊಂಡಿದೆ. ಅದಲ್ಲದೇ, ಹೆಮ್ಮೆಯಿಂದ ಈ ವಿಚಾರವನ್ನು ಅಧಿಕೃತವಾಗಿ ಘೋಷಿಸಿದೆ. ಈ ಸಂಸ್ಥೆ ವ್ಯವಹಾರಿಕವಾಗಿ ಮುಂದುವರೆಯಬೇಕೆಂದರೆ ಸಾಕಷ್ಟು ಕಟ್ಟುನಿಟ್ಟಾದ ಮಾನದಂಡಗಳನ್ನು ಹೊಂದಿದೆ. ಅದೆಲ್ಲದರಲ್ಲಿ ನಿರ್ದೇಶಕ ಸಹದೇವ್ ಕೆಲವಡಿ ಪಾಸ್ ಆಗಿದ್ದಾರೆ.

ಈ ಸಿನಿಮಾವನ್ನು ಸಹದೇವ್ ಕಟ್ಟಿಕೊಟ್ಟಿರುವ ರೀತಿಗೆ ಈ ಸಂಸ್ಥೆಯ ಮಂದಿ ಖುಷಿಯಾಗಿದ್ದಾರೆ. ಇದು ಕೆಂಡ ಚಿತ್ರ ತಂಡದಲ್ಲಿ ಹೊಸ ಹುರುಪು ಮೂಡಿಸಿದೆ. ಜೊತೆಗೆ, ಕಿಲ್ಜಾಯ್ ಸಂಸ್ಥೆಯ ಮೂಲಕ ಕೆಂಡ ವಿಶ್ವಾದ್ಯಂತ ಕಮಾಲ್​ ಮಾಡಲಿದೆ. ಹಾಗೆಯೇ, ಸಹದೇವ್ ಕೆಲವಡಿ ನಿರ್ದೇಶಕರಾಗಿ ವಿಶ್ವಮಟ್ಟದಲ್ಲಿ ಗಮನ ಸೆಳೆಯುವ ಲಕ್ಷಣಗಳು ದಟ್ಟವಾಗಿವೆ. ಈ ಪಲ್ಲಟದಿಂದಾಗಿ ರೂಪಾ ರಾವ್ ಮತ್ತು ಸಹದೇವ್ ಸಾರಥ್ಯದ ಅಮೇಯುಕ್ತಿ ಸ್ಟುಡಿಯೋಸ್ ಎಂಬ ನಿರ್ಮಾಣ ಸಂಸ್ಥೆಗೂ ಮತ್ತಷ್ಟು ಶಕ್ತಿ ಬಂದಿದೆ. ರಂಗಭೂಮಿ ಪ್ರತಿಭೆಗಳೇ ಚಿತ್ರದಲ್ಲಿ ಪ್ರಧಾನ ಪಾತ್ರಗಳನ್ನು ನಿರ್ವಹಿಸಿದ್ದಾರೆ.

ಬಿ.ವಿ.ಭರತ್, ಪ್ರಣವ್ ಶ್ರೀಧರ್, ವಿನೋದ್ ರವೀಂದ್ರನ್, ಗೋಪಾಲ ದೇಶಪಾಂಡೆ ಮುಂತಾದವರ ತಾರಾಗಣ ಚಿತ್ರದಲ್ಲಿದೆ.