ಅಹಮದಾಬಾದ್(ಗುಜರಾತ್):ಚೀನಾದ ಮೊಬೈಲ್ ಅಪ್ಲಿಕೇಷನ್ಗಳ ಮೂಲಕ ಸುಮಾರು 50 ಕೋಟಿ ರೂಪಾಯಿ ವಂಚಿಸಿರುವ ಘಟನೆ ಬೆಳಕಿಗೆ ಬಂದಿದೆ. ಗುಜರಾತ್ನ ಸೈಬರ್ ಕ್ರೈಂ ಪೊಲೀಸರು ಈ ಪ್ರಕರಣವನ್ನು ಭೇದಿಸಿದ್ದಾರೆ.
ಚೀನಾದ ಅಪ್ಲಿಕೇಷನ್ಗಳನ್ನು ಬಳಸಿಕೊಂಡು ವಿವಿಧ ಮಾರ್ಗಗಳ ಮೂಲಕ ಹಣವನ್ನು ದೋಚಲಾಗುತ್ತಿತ್ತು. ಈಗಾಗಲೇ ಸುಮಾರು 28 ಸಾವಿರ ಮಂದಿಗೆ ಇದೇ ರೀತಿ ವಂಚಿಸಲಾಗಿದೆ ಎಂದು ಪೊಲೀಸ್‌ ತನಿಖೆಯಿಂದ ತಿಳಿದುಬಂದಿದೆ. 6 ಸಾವಿರ ರೂಪಾಯಿ ವಂಚನೆ ಪ್ರಕರಣದ ತನಿಖೆ ವೇಳೆ ಆಘಾತಕಾರಿ ವಿಚಾರಗಳು ಬೆಳಕಿಗೆ ಬಂದಿವೆ.
ವಂಚನೆ ಹೀಗೆ ನಡೆಯುತ್ತದೆ..
ವಂಚಕರ ತಂಡವೊಂದು ಒಂದು ಅಪ್ಲಿಕೇಷನ್ ರಚಿಸಿ, ಆ ಅಪ್ಲಿಕೇಷನ್ನ ಲಿಂಕ್ ಅನ್ನು ಟೆಲಿಗ್ರಾಮ್, ವಾಟ್ಸಪ್, ಟೆಕ್ಸ್ಟ್ ಮೆಸೇಜ್ ಮುಂತಾದ ಮಾರ್ಗಗಳ ಮೂಲಕ ವ್ಯಕ್ತಿಯ ಮೊಬೈಲ್ಗೆ ಕಳುಹಿಸುತ್ತದೆ. ಆ ಲಿಂಕ್ ಮೇಲೆ ವ್ಯಕ್ತಿ ಕ್ಲಿಕ್ ಮಾಡಿದ ತಕ್ಷಣ, ವ್ಯಕ್ತಿಯ ಮೊಬೈಲ್ನಲ್ಲಿ ಅಪ್ಲಿಕೇಷನ್ ಡೌನ್‌ಲೋಡ್‌ ಆಗುತ್ತದೆ.
ಡಿಜಿಟಲ್ ವಾಲೆಟ್ ರೀತಿಯ ಅಪ್ಲಿಕೇಷನ್ ಅದಾಗಿದ್ದು, ಕಮೀಷನ್ ಮತ್ತು ಹೆಚ್ಚುವರಿ ಹಣದ ಆಮಿಷಗಳನ್ನು ತೋರಿಸಿ, ವ್ಯಕ್ತಿಯನ್ನು ಆ ಅಪ್ಲಿಕೇಷನ್ನಲ್ಲಿ ಹೂಡಿಕೆ ಮಾಡುವಂತೆ ಮಾಡಲಾಗುತ್ತದೆ. ಒಂದು ವೇಳೆ ವ್ಯಕ್ತಿ ಆ ಅಪ್ಲಿಕೇಷನ್ನಲ್ಲಿ ಹಣ ಜಮಾವಣೆ ಮಾಡಿದರೆ, ಆತನ ಅಪ್ಲಿಕೇಷನ್ ವಾಲೆಟ್ನಲ್ಲಿ ಹಣ ಇರುವುದಾಗಿ ತೋರಿಸಲಾಗುತ್ತದೆ.
ಒಂದು ವೇಳೆ ವ್ಯಕ್ತಿ ಹಣವನ್ನು ವಿತ್ ಡ್ರಾ ಮಾಡಲು ಯತ್ನಿಸಿದರೆ, ತಾಂತ್ರಿಕ ದೋಷ ಎಂದು ತೋರಿಸಲಾಗುತ್ತದೆ. ವ್ಯಕ್ತಿ ಹಣವನ್ನು ವಿತ್ ಡ್ರಾ ಮಾಡಲು ಸತತವಾಗಿ ಪ್ರಯತ್ನಪಟ್ಟರೆ, ಆ ಅಪ್ಲಿಕೇಷನ್ ತಾನಾಗಿಯೇ ಕ್ಲೋಸ್ ಆಗುತ್ತದೆ. ಈ ಮೂಲಕ ವ್ಯಕ್ತಿ ಹಣ ಕಳೆದುಕೊಳ್ಳುತ್ತಾನೆ.
ಅಹಮದಾಬಾದ್ ಸೈಬರ್ ಕ್ರೈಂ ಪೊಲೀಸರು 6 ಸಾವಿರ ರೂಪಾಯಿ ವಂಚನೆ ದೂರನ್ನು ತನಿಖೆ ನಡೆಸಿದಾಗ ಈ ಬೃಹತ್ ಮೊತ್ತದ ಹಗರಣ ಗೊತ್ತಾಗಿದೆ. ಯಾಸಿನ್ ಖುರೇಶಿ, ದಿಲೀಪ್ ಗೊಜಿಯಾ, ಧರ್ಮೇಂದ್ರ ಸಿಂಗ್ ರಾಥೋರ್, ರಾಹುಲ್ ವಾಧರ್, ಜಯೇಶ್ ಜಾಗಿಯಾ ಮತ್ತು ತುಷಾರ್ ಘೆಟಿಯಾ ಎಂಬುವವರನ್ನು ಬಂಧಿಸಲಾಗಿದೆ. ಈ ಜಾಲದ ರೂವಾರಿಗಳು ಚೀನಾದಿಂದ ಕಾರ್ಯ ನಿರ್ವಹಿಸುತ್ತಿದ್ದಾರೆಂದು ತಿಳಿದುಬಂದಿದ್ದು ತನಿಖೆ ನಡೆಯುತ್ತಿದೆ.
ಇದನ್ನೂ ಓದಿ:ಐಸಿಸ್ ನಂಟು: ಉಳ್ಳಾಲ ಮಾಜಿ ಶಾಸಕ ಬಿಎಂ ಇದಿನಬ್ಬ ಮೊಮ್ಮಗ ಸೇರಿ ನಾಲ್ವರ ಬಂಧನ
