ದೇವೇಗೌಡ್ರ ಬಗ್ಗೆ ಮಾತಾಡಲ್ಲ, ಹೆಚ್​ಡಿಕೆ ಬಗ್ಗೆಯೂ ಏನೂ ಹೇಳಲ್ಲ: ಚೆಲುವರಾಯಸ್ವಾಮಿ

ಮಂಡ್ಯ ಹಾಲು ಒಕ್ಕೂಟ ಸ್ಥಳೀಯ ಚುನಾವಣೆಯ ಜೆಡಿಎಸ್ ಅಭ್ಯರ್ಥಿಯ ಅನರ್ಹತೆಗೆ ನಾನು ಕಾರಣ ಎಂದು ದೇವೇಗೌಡರು ಆರೋಪಿಸಿದ್ದಾರೆ. ಅವರು ದೊಡ್ಡವರಿದ್ದಾರೆ. ಅವರ ಬಗ್ಗೆ ಮಾತನಾಡಲ್ಲ. ಆದರೆ ನಮಗೆ ಕಲಿಸಿಕೊಟ್ಟಿದ್ದೇ ಕುಮಾರಸ್ವಾಮಿ, ರೇವಣ್ಣ. ಯಾವ್ಯಾವ ಪಕ್ಷದವರ ಜೊತೆ ಹೇಗೆ, ಯಾವ ಸಂದರ್ಭ ಮಾತನಾಡಬೇಕು ಎನ್ನುವುದನ್ನು ಅವರೇ ನಮಗೆ ಕಲಿಸಿಕೊಟ್ಟಿದ್ದಾರೆ. ಅದರಂತೆಯೇ ನಾವು ಮಾಡಬೇಕಾಗುತ್ತದೆ ಎಂದರು.

ಬೆಂಗಳೂರು:ದೇವೇಗೌಡರು ದೊಡ್ಡವರಿದ್ದಾರೆ. ಅವರ ಬಗ್ಗೆ ಮಾತನಾಡಲ್ಲ. ಇಷ್ಟು ದಿನ ಕುಮಾರಸ್ವಾಮಿ ಬಗ್ಗೆ ಮಾತಾಡ್ತಾ ಇದ್ದೆ. ಇನ್ಮುಂದೆ ಕುಮಾರಸ್ವಾಮಿ ಬಗ್ಗೆಯೂ ಏನೂ ಮಾತನಾಡಲ್ಲ ಎಂದು ಮಾಜಿ ಸಚಿವ ಎನ್.ಚೆಲುವರಾಯಸ್ವಾಮಿ ಹೇಳಿದ್ದಾರೆ.

ನಗರದಲ್ಲಿ ಕಾಂಗ್ರೆಸ್ ನಾಯಕರು ನಡೆಸಿದ ಸಭೆಯಲ್ಲಿ ಪಾಲ್ಗೊಂಡು ಬಳಿಕ ಮಾತನಾಡಿದ ಅವರು, ಮಂಡ್ಯ ಹಾಲು ಒಕ್ಕೂಟ ಸ್ಥಳೀಯ ಚುನಾವಣೆಯ ಜೆಡಿಎಸ್ ಅಭ್ಯರ್ಥಿಯ ಅನರ್ಹತೆಗೆ ನಾನು ಕಾರಣ ಎಂದು ದೇವೇಗೌಡರು ಆರೋಪಿಸಿದ್ದಾರೆ. ಅವರು ದೊಡ್ಡವರಿದ್ದಾರೆ. ಅವರ ಬಗ್ಗೆ ಮಾತನಾಡಲ್ಲ. ಆದರೆ ನಮಗೆ ಕಲಿಸಿಕೊಟ್ಟಿದ್ದೇ ಕುಮಾರಸ್ವಾಮಿ, ರೇವಣ್ಣ. ಇದೇ ನಮ್ಮ ಸಮ್ಮಿಶ್ರ ಸರ್ಕಾರ ಇದ್ದಾಗ ಕಾಂಗ್ರೆಸ್​ನ ಹತ್ತು ಜನರನ್ನು ಅಮಾನತುಗೊಳಿಸಿ ಚುನಾವಣೆಗೆ ನಿಲ್ಲದಂತೆ ಮಾಡಿದ್ದರು. ಸಹಕಾರ ಸಂಸ್ಥೆಗಳಲ್ಲಿ ಅವರಿಗೊಂದು ಕಾನೂನು ನಮಗೊಂದು ಕಾನೂನು ಅಂತ ಬೇರೆ ಇರಲ್ಲ. ಅವರಿಗೆ ಇರುವ ಕಾನೂನು ನಮಗೂ ಇರುತ್ತದೆ ಎಂದರು.

ನಮ್ಮ ಮಾಗಡಿ ಬಾಲಕೃಷ್ಣ ಕ್ಷೇತ್ರದಲ್ಲೂ ಈ ರೀತಿ ಆಯ್ತು. ಕಾಂಗ್ರೆಸ್​ನಿಂದ ಆಯ್ಕೆಯಾಗಿದ್ದ 8 ಮಂದಿ ಅಧ್ಯಕ್ಷರ ಚುನಾವಣೆಯಲ್ಲಿ ಪಾಲ್ಗೊಳ್ಳಬೇಕಿತ್ತು. ಆದರೆ ಅವರನ್ನು ರಾತ್ರೋರಾತ್ರಿ ಅಮಾನತುಗೊಳಿಸಲಾಯಿತು. ಮೂರ್ತಿ ಎಂಬುವರು ಒಂದು ಅವಕಾಶ ಕಳೆದುಕೊಂಡಿದ್ದರು. ಎಲ್ಲವನ್ನೂ ನಮ್ಮ ನಾಯಕರೇ ನಮಗೆ ಕಲಿಸಿಕೊಟ್ಟಿದ್ದಾರೆ. ಇವರ ಸಹೋದರ ಒಕ್ಕೂಟದಲ್ಲಿ ಕಾರ್ಯದರ್ಶಿಯಾಗಿರುವ ಹಿನ್ನೆಲೆ ಕುಟುಂಬದ ಮತ್ತೊಬ್ಬ ಸದಸ್ಯ ಸ್ಪರ್ಧೆ ಮಾಡಬಾರದು ಎನ್ನುವ ಕಾರಣ ನೀಡಿ ಅಮಾನತುಗೊಳಿಸಲಾಗಿದೆ. ಇಲ್ಲಿ ನನ್ನ ಕೈವಾಡವೇನು ಇಲ್ಲ ಎಂದರು.

ಯಾವ್ಯಾವ ಪಕ್ಷದವರ ಜೊತೆ ಹೇಗೆ, ಯಾವ ಸಂದರ್ಭ ಮಾತನಾಡಬೇಕು ಎನ್ನುವುದನ್ನು ಅವರೇ ನಮಗೆ ಕಲಿಸಿಕೊಟ್ಟಿದ್ದಾರೆ. ಅದರಂತೆಯೇ ನಾವು ಮಾಡಬೇಕಾಗುತ್ತದೆ ಎಂದು ಪರೋಕ್ಷವಾಗಿ ದೇವೇಗೌಡ ಹಾಗೂ ಕುಮಾರಸ್ವಾಮಿಯವರ ಕಾಲೆಳೆಯುವ ಪ್ರಯತ್ನ ಮಾಡಿದರು.

ಸ್ನೇಹ-ವಿಶ್ವಾಸ ಎಲ್ಲರೊಂದಿಗೂ ಇದೆ...

ನನಗೆ ಸ್ನೇಹ ಹಾಗೂ ವಿಶ್ವಾಸ ಎಲ್ಲರೊಂದಿಗೂ ಇದೆ. ಎಲ್ಲಾ ಪಕ್ಷದಲ್ಲಿ ನನ್ನ ಆಪ್ತರಿದ್ದಾರೆ. ನಾವು ಬಿಜೆಪಿ ಅವರ ಜೊತೆ ಮಾತಾಡಿದ್ರೆ ಬಿಜೆಪಿಗೆ ಹೋಗ್ತೀವಿ ಅಂತಾ ಅರ್ಥನಾ? ನಾನು ಕಾಂಗ್ರೆಸ್ಸಿಗ. ಬಿಜೆಪಿಗೆ ಹೋಗುತ್ತೇನೆ ಎಂದು ಎಲ್ಲಿಯೂ ಹೇಳಿಲ್ಲ. ಬಿಜೆಪಿಯವರು ನನ್ನನ್ನು ಕರೆದಿಲ್ಲ. ಸ್ನೇಹ, ವಿಶ್ವಾಸದಿಂದ ಎಲ್ಲರ ಜೊತೆ ಇದೇ ರೀತಿ ಇದ್ದೇನೆ. ಇವರು ಬಿಜೆಪಿ ಹಾಗೂ ಕಾಂಗ್ರೆಸ್ ಜೊತೆ ಸರ್ಕಾರ ಮಾಡಿಲ್ಲವಾ. ದೊಡ್ಡವರ ಬಗ್ಗೆ ಚರ್ಚೆ ಬೇಕಾ? ಇದರಿಂದಾಗಿ ಇನ್ನು ಮುಂದೆ ಅವರು ಮಾತನಾಡಿದ್ದನ್ನು ಕೇವಲ ಕೇಳಿಸಿಕೊಳ್ಳಬೇಕು ಎಂದುಕೊಂಡಿದ್ದೇನೆ. ಅವರ ಬಗ್ಗೆ ಮಾತನಾಡುವುದಿಲ್ಲ ಎಂದರು.