ಬೆಳಗಾವಿ ಬಸ್​​ ಡಿಪೊದಲ್ಲೇ ಕಂಡಕ್ಟರ್​​ ನೇಣಿಗೆ ಶರಣು...!

ಕರ್ತವ್ಯ ನಿಯೋಜನೆಗೆ ಅಧಿಕಾರಿಗಳು ಸತಾಯಿಸುತ್ತಿದ್ದಾರೆ ಎಂದು ಆರೋಪಿಸಿ ಬಸ್​ ಡಿಪೋದಲ್ಲೇ ಕಂಡಕ್ಟರ್​ವೋರ್ವ ನೇಣಿಗೆ ಶರಣಾಗಿದ್ದಾರೆ. ಕುಟುಂಬಸ್ಥರ ಆಕ್ರಂದನ ಮುಗಿಲುಮುಟ್ಟಿದೆ.

ಬೆಳಗಾವಿ: ನಗರದ ಕೆಎಸ್ಆರ್ ಟಿಸಿ 2ನೇ ಡಿಪೊದಲ್ಲೇ ಬಸ್ ನಿರ್ವಾಹಕ(ಕಂಡಕ್ಟರ್​) ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ತಾಲೂಕಿನ ಕೇದನೂರು‌ ಗ್ರಾಮದ ಆನಂದ ಹರಿಜನ (55) ಆತ್ಮಹತ್ಯೆಗೆ ಶರಣಾಗಿರುವ ಕಂಡಕ್ಟರ್​​.

ಇತ್ತೀಚಿಗೆ ಆನಂದ ಹರಿಜನ ಅವರನ್ನು ಹುಬ್ಬಳ್ಳಿಗೆ ವರ್ಗಾವಣೆ ಮಾಡಲಾಗಿತ್ತು.‌ ಆದರೆ, ಕರ್ತವ್ಯ ನಿಯೋಜನೆಗೆ ಹಿರಿಯ ಅಧಿಕಾರಿಗಳು ಸತಾಯಿಸುತ್ತಿದ್ದರು ಎನ್ನಲಾಗ್ತಿದೆ. ಅಧಿಕಾರಿಗಳ ವರ್ತನೆಗೆ ಬೇಸತ್ತು ನಿರ್ವಾಹಕ ಆನಂದ ಹರಿಜನ ನೇಣಿಗೆ ಕೊರಳೊಡ್ಡಿದ್ದಾರೆ.ಸ್ಥಳಕ್ಕೆ ಮಾರ್ಕೆಟ್ ಠಾಣೆಯ ಪೊಲೀಸರು ಹಾಗೂ ಸಾರಿಗೆ ಅಧಿಕಾರಿಗಳು ಭೇಟಿ‌‌ ನೀಡಿದ್ದರು. ಈ ಕುರಿತು ಮಾರ್ಕೆಟ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.