ಗುಡ್ಡದ ಮೇಲೆ ವಾಸ, ಸಿಕ್ಕ ಸಿಕ್ಕ ಎಲೆಗಳೇ ಆಹಾರ.. ಯೋಗ ಪ್ರವೃತ್ತಿ, ಬುಡನಸಾಬ್‌ಗೆ ಗಾರೆ ಕೆಲಸವೇ ವೃತ್ತಿ..

ಮನುಷ್ಯ ತನ್ನ ಆರೋಗ್ಯಕ್ಕೆ ಹಿತಕರವಾದ ಕೆಲವೇ ಕೆಲವು ಸೊಪ್ಪು ಸೇವಿಸುತ್ತಾನೆ. ಆದರೆ, ಇಲ್ಲೊಬ್ಬ ಯುವಕ ಮಾತ್ರ ವಿವಿಧ ಸಸಿಗಳ ಎಲೆಗಳನ್ನು ತಿನ್ನುವ ಮೂಲಕ ಅಚ್ಚರಿ ಮೂಡಿಸುತ್ತಿದ್ದಾನೆ. ಈತನಿಗೆ ಸಿಹಿ-ಕಹಿ ರುಚಿಯಲ್ಲಿ ಯಾವುದೇ ವ್ಯತ್ಯಾಸವೂ ಇಲ್ಲ..

ಬೆಳಗಾವಿ :ಜಿಲ್ಲೆಯ ಸವದತ್ತಿ ತಾಲೂಕಿನ ಸುಕ್ಷೇತ್ರ ಯಲ್ಲಮ್ಮನಗುಡ್ಡದ ಮಡಿಲಲ್ಲಿರುವ ಉಗರಗೋಳದ ಯುವಕ ಬುಡನಸಾಬ್ ಹೊಸಮನಿ ಎಲೆಗಳನ್ನು ಸೇವಿಸುವ ಮೂಲಕ ಅಚ್ಚರಿ ಮೂಡಿಸಿದ್ದಾನೆ. ವೃತ್ತಿಯಿಂದ ಗೌಂಡಿ ಆಗಿರುವ ಈತ, ಪ್ರವೃತ್ತಿಯಲ್ಲಿ ಯೋಗಪಟು. ಸಾಹಸ ಮಾಡುವಲ್ಲಿ ಸದಾ ಮುಂದೆ. ಈ ಹಿಂದೆ ಚಲಿಸುತ್ತಿರುವ ಸೈಕಲ್ ಹಾಗೂ ಬೈಕ್ ಮೇಲೆಯೇ ನಿಂತು, ಮಲಗಿ ನಾನಾ ಸಾಹಸ ಮೆರೆದಿದ್ದ. ಇದೀಗ ನಾನಾ ರೀತಿಯ ಸೊಪ್ಪು ಸೇವನೆ ಮೂಲಕ ಗಮನ ಸೆಳೆಯುತ್ತಿದ್ದಾನೆ.

ಉಗರಗೋಳ ಗುಡ್ಡದ ಮೇಲಿರುವ ಪ್ರದೇಶದಲ್ಲೇ ಪುಟ್ಟದಾದ ಮನೆ ಕಟ್ಟಿಕೊಂಡಿರುವ ಬುಡನ್, ತಾನೊಬ್ಬನೇ ಅಲ್ಲಿ ವಾಸಿಸುತ್ತಿದ್ದಾನೆ. ಕತ್ತಲಾದರೆ ಆ ಪ್ರದೇಶಕ್ಕೆ ಹೋಗಲು ಎಂಥವರೂ ಹೆದರುತ್ತಾರೆ. ಆದರೆ, ಈತ ಐದಾರು ವರ್ಷಗಳಿಂದ ಇಲ್ಲಿ ವಾಸಿಸುತ್ತಿದ್ದಾನೆ. ನೈಸರ್ಗಿಕ ಪರಿಸರದಲ್ಲಿ ನೆಮ್ಮದಿಯಿಂದ ದಿನದೂಡುತ್ತಿದ್ದಾನೆ. ಅಲ್ಲದೆ, ಆ ಪರಿಸರದಲ್ಲಿ ಬೆಳೆದು ನಿಂತಿರುವ ಹಲವು ಮರಗಳ ಎಲೆಗಳನ್ನು ತಿನ್ನುತ್ತಿದ್ದಾನೆ.

ಕೇವಲ 3ನೇ ತರಗತಿ ಓದಿರುವ ಈತ, ತಾನು ಹಲವು ವರ್ಷಗಳಿಂದ ಯೋಗಾಸನ ಹಾಗೂ ಸಾಹಸ ಕಲೆ ಪ್ರದರ್ಶಿಸುತ್ತ ಬಂದಿದ್ದೇನೆ. ಈಚೆಗೆ ಜಗತ್ತಿಗೆ ಕೋವಿಡ್‌ ದಾಂಗುಡಿ ಇಟ್ಟಿದೆ. ಸೋಂಕಿನ ವಿರುದ್ಧ ಸೆಣಸಲು ರೋಗ ನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳಬೇಕಿರುವುದರಿಂದ ಇಲ್ಲಿರುವ ಎಲ್ಲ ತಪ್ಪಲುಗಳನ್ನು ತಿನ್ನುತ್ತಿದ್ದೇನೆ. ಆದರೆ, ಅವುಗಳ ಹೆಸರು ಗೊತ್ತಿಲ್ಲ ಎನ್ನುತ್ತಾನೆ ಬುಡನಸಾಬ್ ಹೊಸಮನಿ.

ಇದನ್ನೂ ಓದಿ:ಪೆಟ್ರೋಲ್ ದರ ಹೆಚ್ಚಳ.. ಬೆಳಗಾವಿಯಲ್ಲಿ ಸೈಕಲ್​ಗಳನ್ನೇ ಟಾರ್ಗೆಟ್ ಮಾಡ್ತಿದ್ದ ಕಳ್ಳ ಅರೆಸ್ಟ್‌..

ಐದಾರು ತಿಂಗಳಿಂದ ನಿತ್ಯ ಬೆಳಗ್ಗೆ ತಪ್ಪಲು ಸೇವಿಸುತ್ತಿದ್ದರೂ, ನನ್ನ ಆರೋಗ್ಯದಲ್ಲಿ ಯಾವುದೇ ಏರುಪೇರಾಗಿಲ್ಲ. ಶರೀರ ಇನ್ನಷ್ಟು ಸದೃಢವಾಗುತ್ತಿದೆ. ಶರೀರಕ್ಕೆ ಇನ್ನಷ್ಟು ಚೈತನ್ಯ ಸಿಗುತ್ತಿದ್ದು, ಇಡೀ ದಿನ ಖುಷಿಯಿಂದ ಗೌಂಡಿ ಕೆಲಸ ಮಾಡಲು ಅನುಕೂಲವಾಗಿದೆ ಎನ್ನುತ್ತಾನೆ. ಈತ ಎಲೆ ಸೇವಿಸುವುದನ್ನು ನೋಡುವುದಕ್ಕಾಗಿಯೇ ಸುತ್ತಲಿನ ಗ್ರಾಮಗಳಿಂದ ಜನರು ಬರುತ್ತಾರೆ. ಇಂತಹ ತಪ್ಪಲನ್ನು ತಿನ್ನಲು ನಿನ್ನಿಂದ ಆಗದು ಎಂದು ಸವಾಲು ಹಾಕಿದವರು ಉಂಟು.

ಬಡತನದ ಮಧ್ಯೆಯೂ ಗೌಂಡಿ ಕೆಲಸ ಮಾಡುತ್ತ ಬದುಕಿನ ಬಂಡಿ ಸಾಗಿಸುತ್ತಿರುವ ಬುಡನ್, ನಿತ್ಯ ಬೆಳಗ್ಗೆ ಮತ್ತು ಸಂಜೆ ಯೋಗಾಭ್ಯಾಸ ಮಾಡುತ್ತಾನೆ. 100ಕ್ಕೂ ಅಧಿಕ ಆಸನಗಳನ್ನು ಪ್ರದರ್ಶಿಸಿ ಸಾಧನೆ ಮೆರೆದಿದ್ದಾನೆ. ಗದುಗಿನ ತೋಂಟದಾರ್ಯ ಮಠ, ಬೆಳಗಾವಿ, ಬೆಂಗಳೂರು, ರಾಮದುರ್ಗ ಮತ್ತಿತರ ಕಡೆಗಳ ಸಂಘ-ಸಂಸ್ಥೆಗಳು ಈತನನ್ನು ಸತ್ಕರಿಸಿ ಗೌರವಿಸಿವೆ.